કોર્પોરેટ ટેક્સમાં આપવામાં આવેલી રાહતની અસર આજે સોમવારે શેરબજારમાં જોવા મળી છે. જેને લઇને સેન્સેક્સ 1200 પોઇન્ટ વધીને 39,312 પોઇન્ટ સાથે ખુલ્યો, જ્યારે નેશનલ સ્ટોક એક્સચેન્જ નિફ્ટી 276 પોઇન્ટ વધીને 11550 સુધી પહોંચેલી જોવા મળી. વિદેશી સંસ્થાકીય રોકાણકારો તેમજ ઘરેલું રોકાણકારોએ શેરબજારમાં ખરીદી કરી.
આ કારણોસર જોવા મળ્યો ઉછાળો
શુક્રવારે નાણામંત્રી નિર્મલા સીતારમણે કોર્પોરેટ સેકટરને રાહત આપી હતી. નિર્મલા સીતારમણે કોર્પોરેટ ટેક્સમાં ઘટાડાની જાહેરાત કરી હતી. જેને લઇને શેરબજારમાં ઉછાળો જોવા મળ્યો છે.
આ શેરમાં જોવા મળ્યો વધારો
શેરબજારમાં ઉછાળો આવતા કેટલાક સેકટરના શેરમાં વધારો જોવા મળ્યો છે. જેમાં દિગ્ગજ શેરની વાત કરીએ તો સોમવારે બ્રિટાનિયા ઇન્ડસ્ટ્રીઝ, ITC, ઇન્ડસન્ડ બેંક અને L&Tના શેરમાં વધારો જોવા મળ્યો.
સેકટર ઇન્ડેક્સ પર નજર નાંખીએ તો...
સેકટર ઇન્ડેકસ પર નજર નાંખીએ તો આઇટી સિવાય બધા સેકટર ગ્રીન ઝોન પર ખુલ્યાં છે. જેમાં FMCG, ઇન્ફ્રા, બેંક, મેટર અને એનર્જી સામેલ છે.
નાણામંત્રી નિર્મલા સીતારમણે શુક્રવારે કોર્પોરેટ ટેક્સમાં રાહતને લઇને જેવી જાહેરાત કરી કે તરત શેરબજારે વધાવી લીધી હતી. જેને લઇને શેરબજારમાં એક દાયકાની સૌથી મોટી એક દિવસની તેજી જોવા મળી. ઘરેલી સંસ્થાગત નિવેશકો (DII)એ શુક્રવારના કારોબારના સેશન દરમિયાન 3,000 કરોડ રૂપિયાનું રોકાણ કર્યું.
છેલ્લા થોડા સમયથી સુસ્ત ચાલી રહેલી અર્થવ્યવસ્થાને શુક્રવારે નાણામંત્રી નિર્મલા સીતારમણ જ્યારે બૂસ્ટ આપવા હાજર થયા હતા. જેમાં નાણામંત્રીએ કોર્પોરેટ સેકટરને લઇને ઘણા મોટા એલાન કર્યા હતા. જેનું શેરબજારે ભવ્ય સ્વાગત કર્યું.
સરકારના બૂસ્ટ ડોઝના કારણે કારોબર દરમિયાન શેરબજારમાં ઇતિહાસની એક દિવસીય સૌથી મોટી તેજી જોવા મળી. જેમાં એક સમયે સેન્સેક્સમાં 2250 પોઇન્ટ વધેલો જોવા મળ્યો હતો. જો કે અંતમાં સેન્સેક્સ 1921 પોઇન્ટ ઉછળીને 38,014 પર જ્યારે નિફ્ટી 569 પોઇન્ટ વધીને 11,274 પોઇન્ટ પર બંધ જોવા મળી હતી.