આજે ટ્રેડિંગના અંતિમ દિવસે બેન્કિંગ, ફાઇનાન્શિયલ અને ઓટોમોબાઇલ શેરમાં તેજીના સહારે શેરબજાર મજબૂતી સાથે ખૂલ્યું હતું. સેન્સેક્સ ૧૧૫ પોઇન્ટના ઉછાળા સાથે ૪૦,૪૦૧ પર અને નિફ્ટી ૩૨ પોઇન્ટના ઉછાળા સાથે ૧૧,૯૦૪ પર ખૂલી હતી.
ટ્રેડિંગના અંતિમ દિવસે બેન્કિંગ, ફાઇનાન્શિયલ અને ઓટોમોબાઇલ શેરમાં તેજી
નિફ્ટી ૩૨ પોઇન્ટના ઉછાળા સાથે ૧૧,૯૦૪ પર ખૂલી
ટ્રેડિંગમાં લગભગ તમામ સેક્ટોરલ ઇન્ડેક્સ ગ્રીન ઝોનમાં
ત્યાર બાદ સેન્સેક્સ-નિફ્ટીમાં તેજીનો માહોલ ચાલુ રહ્યો હતો અને આ લખાઇ રહ્યું છે ત્યારે સવારે ૧૦.૧૫ કલાકે સેન્સેક્સ ૨૦૬ પોઇન્ટના ઉછાળા સાથે ૪૦,૪૯૨ અને નિફ્ટી ૫૩ પોઇન્ટના ઉછાળા સાથે ૧૧,૯૨૬ પર ટ્રેડ કરી રહી છે. આમ સેન્સેક્સ ૪૦,૫૦૦ની આસપાસ ટ્રેડ કરી રહ્યો છે.
આજે વોડાફોન-આઇડિયા અને ભારતી એરટેલમાં કોર્પોરેટ ઇતિહાસની રૂ.૭૪ હજાર કરોડ જેટલી સૌથી મોટી ખોટના કારણે તેના શેર ૧૦ ટકા સુધી ગગડી ગયા હતા. આજે ટાટા મોટર્સ ડીવીડીઆરના શેરમાં ૪.૩૦ ટકાની તેજી જોવા મળી હતી. ગ્લેનમાર્કના શેરમાં પણ છ ટકા જેટલી તેજી જોવા મળી હતી.
આજના ટ્રેડિંગમાં લગભગ તમામ સેક્ટોરલ ઇન્ડેક્સ ગ્રીન ઝોનમાં કામ કરી રહ્યા છે. નિફ્ટીના ઓટો ઇન્ડેક્સમાં એક ટકાની તેજી જોવા મળી છે. એસબીઆઇમાં ૧.૯૪ ટકા, ઓએનજીસીમાં ૧.૬૫ ટકાની તેજી જોવા મળી રહી છે, જ્યારે ટીસીએસ, એનપીટીસી, બીપીસીએલ અને રિલાયન્સમાં ઘટાડો જોવા મળ્યો છે.
રૂપિયો ૧૭ પૈસા મજબૂત
રૂપિયાની આજે મજબૂત શરૂઆત થઇ છે. ડોલર સામે રૂપિયો ૧૭ પૈસા મજબૂત થઇને ૭૧.૮૦ની સપાટીએ ખૂલ્યો છે, જ્યારે ગઇ કાલે પણ રૂપિયો ૧૨ પૈસા મજબૂત થઇને ડોલર સામે ૭૧.૭૯ની સપાટીએ બંધ રહ્યો હતો.