કારોબારી સપ્તાહના અંતિમ દિવસે એટલે કે આજે શેરબજારમાં ભારે ચઢાવ-ઉતાર બાદ ઐતિહાસિક ઊંચાઈએ બંધ થયું હતું.
શેરબજારમાં જોરદાર તેજી
સેન્સેક્સ પહેલીવાર 60 હજારને પાર બંધ થયો
સેન્સેક્સ પણ 163 પોઈન્ટ્સ વધીને 60,048 પર બંધ
બોમ્બે સ્ટોક એક્સચેન્જનો મુખ્ય ઈન્ડેક્ષ સેન્સેક્સ 163.11 અંકોના ઉછાળા સાથે 60,048.47ના સ્તરે બંધ રહ્યો. આ સેન્સેક્સ નિફ્ટી બંધ થવાની ઐતિહાસિક સપાટી છે.
નિફ્ટીમાં પણ ઊછાળો
આ તરફ નિફ્ટીપણ 30.25 અંકના વધારા સાથે 17,853.20ના સ્તરે બંધ થયું. ગત સપ્તાહે 710 અંક અથવા 1.21 ટકાનો વધારો થયો હતો.
ઉછાળાના મુખ્ય કારણો શું ?
- IPOનું બજાર જામ્યું છે, રોકાણકારો ઉત્સાહભેર રોકાણ કરી રહ્યા છે.
- બીજા ક્વાર્ટરમાં કંપનીઓના પરિણામો પણ સારા આવવાની આશા છે.
- કોરોના વાયરસની 2 લહેરનો સામનો કરી ચૂકેલ દેશની અર્થવ્યવસ્થા મજબૂતી સાથે પાટા પર પરત ફરી રહી છે.
- રસીકરણથી રોકાણકારોમાં કોરોનાનો ડર ખતમ થઈ રહ્યો છે.
ભારતીય શેરબજારે નવો ઈતિહારસ રહ્યો છે. સેન્સેક્સે 60 હજારની સપાટી વટાવી દીધી, છેલ્લા 7 વર્ષમાં સેન્સેક્સ 25 હજારથી વધીને 60 હજાર સુધી પહોંચી ગયું.સેન્સેક્સે કેવી રીતે આ સફર નક્કી કરી અને કેવા ઉતારચઢાવ આવ્યા તેના પર પણ એક નજર કરીએ. મોદી સરકાર બની ત્યારે સેન્સેક્સ 25 હજારની સપાટીએ હતું. ત્યાર બાદ 3 વર્ષમાં સેન્સેક્સ 30 હજારને પાર પહોંચી ગયું. ત્યાર બાદ એક વર્ષમાં 35 હજાર અને બાદમાં 22 મહિનામાં 40 હજારની સપાટીએ પહોંચી ગયું. જોકે કોરોના મહામારી આવતાં જ સેન્સેક્સમાં કડાકો બોલ્યો અને માર્ચ 2020માં સેન્સેક્સ તૂટીને ફરી એકવાર 25 હજારે આવી ગયું હતું. જોકે મે અને જૂન મહિનાથી સેન્સેક્સ વધવા લાગ્યું અને ફરી એકવાર તેજી આવતા માત્ર દોઢ વર્ષમાં સેન્સેક્સ 25 હજારથી 60 હજારની સપાટીએ પહોંચી ગયું.
વર્ષ 2014 માં નરેન્દ્ર મોદીના આગમનને બજારએ આવકાર્યું હતું
વર્ષ 2013 માં, BSE સેન્સેક્સ 18 જાન્યુઆરી 2013 ના રોજ 20 હજારની ઉપર બંધ થયો હતો. પરંતુ 20 થી 25 હજાર સુધી પહોંચવામાં માત્ર દોઢ વર્ષ લાગ્યું. વર્ષ 2014 માં નરેન્દ્ર મોદીના નેતૃત્વમાં કેન્દ્રમાં એનડીએ સરકારની રચના થઈ હતી. જેથી શેરબજારમાં પણ ઉત્સાહનું વાતાવરણ સર્જાયું હતું. 16 મે 2014 ના રોજ સેન્સેક્સ 25,364 ની સપાટીએ પહોંચી ગયો હતો, જોકે તે 25 હજારની નીચે બંધ થયો હતો.5 જૂન 2014 ના રોજ સેન્સેક્સ 25019.51 પર બંધ થયો હતો. આ પછી, સેન્સેક્સને 25 હજારથી 30 હજાર સુધી પહોંચવામાં વધુ ત્રણ વર્ષ લાગ્યા.
કોરોના સંકટ દરમિયાન ભારે ઉતાર -ચઢાવ
પરંતુ આ પછી વર્ષ 2020 નો કોરોનાનો ભયાનક તબક્કો આવ્યો. જાન્યુઆરી 2020 માં સેન્સેક્સ 42 હજારની નજીક પહોંચી ગયો અને માર્ચ 2020 માં લોકડાઉન બાદ 25981.24 સુધી પહોંચી ગયો. જોકે, એપ્રિલ અને મેના અંતથી સેન્સેક્સ ફરી વધવા લાગ્યો.
માત્ર 8 મહિનામાં 50 થી 60 હજાર પર આંક પહોંચ્યો
સેન્સેક્સને 50 હજારથી 60 હજાર સુધી પહોંચવામાં માત્ર 8 મહિના લાગ્યા. 21 જાન્યુઆરી 2021 ના રોજ, સેન્સેક્સ 50 હજારને પાર કરી ગયો, આજે એટલે કે 24 સપ્ટેમ્બર 2021 ના રોજ, તે 60 હજારનો આંકડો પાર કરી ગયો છે. ચીનની રિયલ એસ્ટેટ કંપની એવરગ્રાન્ડે નાદારીની ધાર પર છે અને તેની અસર સમગ્ર વિશ્વના શેરબજારો પર પડી છે. આ હોવા છતાં, ભારતીય બજારે સારું પ્રદર્શન કર્યું છે.