બજેટ ઈમ્પેક્ટ / સેન્સેક્સમાં 500થી વધુ પોઈન્ટનો કડાકોઃ નિફ્ટીમાં પણ ઘટાડો

આજે સેન્સેક્સ ૨૫૦ પોઇન્ટના ઘટાડા સાથે ૩૯,૨૬૨ અને નિફ્ટી ૮૫ પોઇન્ટના ઘટાડા સાથે ૧૧,૭૨૫ પર ખૂલી હતી. ત્યારબાદ બજારમાં ચોમેરથી વેચવાલી જોવા મળતાં સેન્સેક્સ વધુ તૂટ્યો હતો. આ લખાઇ રહ્યું છે ત્યારે સેન્સેક્સ ૪૦૬ પોઇન્ટના કડાકા સાથે ૩૯,૧૦૭ પર અને નિફ્ટી ૧૨૭ પોઇન્ટના ઘટાડા સાથે ૧૧,૬૮૩ પર ટ્રેડ કરી રહી છે.
 

બેન્ક, ફાઇનાન્સ, મેટલ અને ઓટો જેવાં તમામ મુખ્ય સેક્ટરમાં આજે કડાકો જોવા મળી રહ્યો છે. એક તબક્કે સેન્સેક્સ ૪૫૦ પોઇન્ટથી વધુ તૂટીને ૩૯,૦૫૬ પર પહોંચી ગયો હતો. નિફ્ટીના તમામ ૧૧ ઇન્ડેક્સમાં ઘટાડો જોવા મળ્યો છે. સેન્સેક્સના ૩૦માંથી ૨૭ શેર રેડ ઝોનમાં ચાલ્યા ગયા છે.
 

ઓટો ઇન્ડેક્સ ત્રણ વર્ષની સૌથી નીચી સપાટીએ પહોંચી ગયો છે. મારુતિના શેરમાં ત્રણ ટકાનો તો હીરો મોટો કોર્પમાં ચાર ટકાનો કડાકો બોલી ગયો છે. બજાજ ઓટો, મહિન્દ્રા એન્ડ મહિન્દ્રા, યસ બેન્ક, એલએન્ડટી અને ઓએનજીસી સહિત તમામ શેરમાં બે ટકાથી વધુ ઘટાડો જોવા મળ્યો છે. રિલાયન્સ ઇન્ડસ્ટ્રીઝ પણ એક ટકા તૂટ્યો છે.

રૂપિયો ૧૫ પૈસા તૂટ્યો
રૂપિયાની પણ આજે નબળી શરૂઆત થઈ હતી. ડોલર સામે ૧૫ પૈસા તૂટીને રૂપિયો ૬૮.૫૭ની સપાટીએ ખૂલ્યો છે, જોકે આ અગાઉ શુક્રવારે રૂપિયો આઠ પૈસાના વધારા સાથે ડોલર સામે ૬૮.૪૨ની સપાટીએ બંધ રહ્યો હતો.