દુનિયાની સૌથી મોંઘી ક્રિકેટ લીગ આઇપીએલ યુવા ખેલાડીઓ માટે સૌથી મોટું પ્લેટફોર્મ છે.
જસપ્રીત બૂમરાહ, હાર્દિક પંડ્યા, દીપક ચાહર, નવદીપ સૈની, કૃણાલ પંડ્યા જેવા ખેલાડીઓએ આઇપીએલમાં દમ દેખાડીને ટીમ ઇન્ડિયામાં સ્થાન મેળવ્યું છે. આ વખત દેવદત્ત પડિક્કલ, શુભમન ગિલ, રાહુલ તેવટિયા, તુષાર દેશપાંડે જેવા યુવા ખેલાડી કમાલ દેખાડી રહ્યા છે. શુભમન ગિલ ટીમ ઇન્ડિયા તરફથી બે વન ડે રમી ચૂક્યો છે, જ્યારે પડિક્કલ અને તેવટિયાએ ટીમ ઇન્ડિયાનાં દ્વાર ખખડાવ્યાં છે.
આ યુવા ખેલાડીઓ સામે મહેન્દ્રસિંહ ધોની, દિનેશ કાર્તિક અને રોબિન ઉથપ્પા જેવા સિનિયર ખેલાડી ફિક્કા નજરે પડી રહ્યા છે. લગભગ દરેક સિઝનમાં હીરો રહેલા આ સિનિયર ખેલાડી આ વખતે સ્ટ્રગલ કરી રહ્યા છે. આર. અશ્વિન અને પીયૂષ ચાવલા સહિત પાંચ સિનિયર બોલર વર્તમાન આઇપીએલમાં હજુ સુધી એક પણ મેઇડન ઓવર ફેંકી શક્યા નથી.
રોયલ ચેલેન્જર્સ બેંગલુરુ (આરસીબી)ના ઓપનર પડિક્કલ અને સનરાઇઝર્સ હૈદરાબાદ (એસઆરએચ)ના બેટ્સમેન પ્રિયમ ગર્ગની આ ડેબ્યૂ સિઝનમાં છે. પડિક્કલે અત્યાર સુધી નવ ઇનિંગ્સમાં ૨૯૬ અને પ્રિયમે સાત ઇનિંગ્સમાં ૧૦૬ રન બનાવ્યા છે. આ દરમિયાન પડિક્કલે ત્રણ અને પ્રિયમે એક અર્ધસદી સાથે પોતાની ટીમને જીત અપાવી છે.
સીએસકેનો કેપ્ટન મહેન્દ્રસિંહ ધોની અને અડધી ટૂર્નામેન્ટ બાદ કેકેઆરની કેપ્ટનશિપ છોડી દેનાર દિનેશ કાર્તિક આ સિઝનમાં એક-એક રન માટે ઝઝૂમી રહ્યા છે. આ બંને અત્યાર સુધીમાં નવ-નવ મેચ રમ્યા, જેમાં કાર્તિકે ૧૪૧ અને ધોનીએ ૧૩૬ રન બનાવ્યા છે. બંનેના કુલ રન શુભમન (૩૧૧ રન)થી પણ ઓછા છે. રાજસ્થાન રોયલ્સના રોબિન ઉથપ્પાનું બેટ પણ આ સિઝનમાં શાંત રહ્યું છે. તેણે સાત મેચમાં ૧૪૧ રન જ બનાવ્યા છે.
પડિક્કલ-પ્રિયમે ડેબ્યૂ સિઝનમાં દમ દેખાડ્યો
કેકેઆરનો શુભમન ગિલ પોતાની ત્રીજી અને મુંબઈ ઇન્ડિયન્સનો ઇશાન કિશન પાંચમી આઇપીએલ સિઝન રમી રહ્યા છે. શુભમને નવ મેચમાં બે અર્ધસદી સાથે ૩૧૧ અને ઈશાને સાત મેચમાં એક અર્ધસદી સાથે ૧૯૩ રન બનાવ્યા છે.
ઓલરાઉન્ડર તેવટિયાથી પાછળ છે સિનિયર જાડેજા
આઇપીએલની ૧૮૦ મેચ રમી ચૂકેલો સિનિયર ઓલરાઉન્ડર રવીન્દ્ર જાડેજા ૩૦ મેચ રમેલા જુનિયર રાહુલ તેવટિયાથી દરેક મામલામાં પાછળ છે. તેવટિયાએ આ સિઝનની નવ મેચમાં ૨૨૨ રન બનાવ્યા છે અને છ વિકેટ પણ ઝડપી છે, જ્યારે જાડેજા નવ મેચમાં ૧૫૯ રન બનાવી શક્યો છે અને તેને ચાર જ વિકેટ મળી છે.
રવિ બિશ્નોઈ અને ત્યાગીનું શાનદાર ડેબ્યૂ
કિંગ્સ ઈલેવન પંજાબના રવિ બિશ્નોઈ અને રાજસ્થાન રોયલ્સના કાર્તિક ત્યાગીની આ ડેબ્યૂ સિઝન છે. બંનેએ પોતાની શાનદાર બોલિંગથી બધાંનું ધ્યાન ખેંચ્યું છે. રવિએ નવ મેચમાં નવ અને ત્યાગીએ પાંચ મેચમાં પાંચ વિકેટ ઝડપી છે.
સિઝનમાં સૌથી વધુ યોર્કર નટરાજનના નામ પર
સનરાઇઝર્સ હૈદરાબાદનાે ફાસ્ટ બોલર ટી. નટરાજન આ સિઝનમાં યોર્કર સ્પેશિયાલિસ્ટ બનીને ઊભરી આવ્યો છે. આઇપીએલમાં પોતાની બીજી જ સિઝન રમી રહેલા નટરાજને અત્યાર સુધી રમેલી નવ મેચમાં ૧૧ વિકેટ ઝડપી છે. આ દરમિયાન તેણે સૌથી વધુ ૨૯ યોર્કર બોલ ફેંક્યા છે, જ્યારે દુનિયાના ટોચના ફાસ્ટ બોલરમાં જેની ગણના થાય છે એ જસપ્રીત બૂમરાહ ૧૭ યોર્કર જ ફેંકી શક્યો છે. જોકે બૂમરાહ વિકેટ ઝડપવાના મામલે આગળ છે. તેણે નવ મેચમાં ૧૫ વિકેટ ઝડપી છે. નટરાજન ઉપરાંત શિવમ માવી, મુરુગન અશ્વિન અને કાર્તિક ત્યાગી જેવા જુનિયર્સે શાનદાર પ્રદર્શન કર્યું છે.
કુલદીપ-વિજય શંકર વિકેટ માટે તરસ્યા
ટીમ ઇન્ડિયા તરફથી રમી ચૂકેલા કુલદીપ યાદવ અને વિજય શંકર આ સિઝનમાં વિકેટ માટે રીતસર તરસી રહ્યા છે. ચાર-ચાર મેચ રમ્યા બાદ શંકરે ફક્ત બે અને કુલદીપે ફક્ત એક જ વિકેટ ઝડપી છે. આ ઉપરાંત આર. અશ્વિન, પીયૂષ ચાવલા, જયદેવ ઉનડકટ પણ પોતાની પ્રતિષ્ઠા અનુસાર દેખાવ કરી શક્યા નથી. આ બધા સિનિયર બોલર વર્તમાન સિઝનમાં હજુ સુધી એક પણ મેઇડન ઓવર ફેંકી શક્યા નથી.