સતત 2 દિવસથી IT વિભાગનું મોરબીના અગ્રણી ક્યુટોન સિરામિક ગ્રુપ પર સર્ચ ઓપરેશન ચાલી રહ્યું છે. જેમાં અત્યાર સુધીમાં કુલ 200 કરોડના બિનહિસાબી વ્યવહારો હાથ લાગ્યા છે.
દરોડામાં અંદાજે 200 કરોડના બિનહિસાબી વ્યવહાર ઝડપાયા
રાજકોટ ભાજપના સિનિયર આગેવાનના દસ્તાવેજ કબજે કરાયા
IT વિભાગ સંભવત: ભાજપના અગ્રણીની કરી શકે છે પૂછપરછ
ઇન્કમટેક્સ વિભાગ (IT વિભાગ) દ્વારા મોરબીના અગ્રણી ક્યુટોન સિરામિક ગ્રુપ પર 2 દિવસથી સામુહિક દરોડા પાડવામાં આવ્યા છે. ત્યારે આ દરોડા દરમ્યાન IT વિભાગને અંદાજે 200 કરોડના બિનહિસાબી વ્યવહારો હાથ લાગ્યા છે. તેમજ ભાજપના સિનિયર આગેવાનનું સાહિત્ય પણ હાથ લાગ્યું છે.
રાજકોટમાં ITની ટીમે બે ફાયનાન્સ સહિત 3 સ્થળોએ તપાસ હાથ ધરી છે. IT વિભાગના દરોડામાં રાજકોટ ભાજપના સિનિયર આગેવાનના દસ્તાવેજ કબજે કરાયા છે. આથી, ભાજપના સિનિયર આગેવાનના કર્મચારીની પૂછપરછ હાથ ધરવામાં આવી રહી છે. સિરામિક ગ્રુપ સાથે વ્યવહારમાં રાજકોટ ભાજપના સિનિયર નેતાનું નામ સામે આવ્યું છે. આથી, IT વિભાગ સંભવત: ભાજપના અગ્રણીની પૂછપરછ હાથ ધરી શકે છે.
અત્યાર સુધી રેડમાં શું શું મળ્યું?
અંદાજે 200 કરોડના બિનહિસાબી વ્યવહાર ઝડપાયા
ભાજપના સિનિયર આગેવાનના દસ્તાવેજ કબજે કરાયા
દરોડામાં 1 કરોડ રોકડા, 2 કરોડના દાગીના પણ મળ્યા
IT વિભાગ દ્વારા 12 લોકર સીલ કરવામાં આવ્યાં
મોટી રકમના વહેવારો થયાના દસ્તાવેજો પણ જપ્ત કરાયા
25થી વધુ સ્થળો પર ચાલી રહી છે તપાસ
મોરબીના અગ્રણી ક્યુટોન સિરામિક ગ્રુપના ઉત્પાદન અને વેચાણ મથકો ઉપર 9 ઓગસ્ટની વહેલી સવારથી ઇન્કમટેક્સના દરોડા પાડયા છે. મોરબીની સાથે–સાથે અમદાવાદ ખાતે પણ ક્યુટોન ગ્રુપના ધંધાદારી સ્થળો ઇન્કમટેક્સની રડાર હતા, આ કંપનીને સંલગ્ન કુલ મળી 25 થી વધુ સ્થળો પર તપાસ ચાલી રહી હોવાનું બહાર આવ્યું છે.
અભિનેતા અનિલ કપૂર છે કંપનીના બ્રાન્ડ એમ્બેસેડર
ઉલ્લેખનીય છે કે, આ કંપનીના બ્રાન્ડ એમ્બેસેડર અનિલ કપૂર છે. જેથી IT અનિલ કપૂરના ચોપડે બતાવેલી રકમના હિસાબોની તપાસ પણ કરી શકે છે.
હજુ પણ તપાસ ચાલશે
ક્યુટોન સિરામિક વાંકાનેર સહિતના યુનિટો અને 6 સપ્લાય સ્થળો ઉપર ઇન્કમટેક્સ વિભાગે મેગા સર્ચ ઓપરેશન શરૂ કર્યું છે 2 દિવસથી ચાલી રહેલી આ તપાસમાં રાજકોટથી 1 ડઝનથી વધુ અધિકારી તપાસમાં જોડાયા છે. મોટા પ્રમાણમાં બેનામી વ્યવહાર સામે આવે તેવી આશંકા વ્યક્ત કરવામાં આવી રહી છે. મોરબીની સાથે અમદાવાદ ખાતે ક્યુટોન ગ્રુપ સાથે જોડાયેલ વ્યાપાર સ્થળો ઉપર પણ સર્ચ ઓપરેશન ચાલી રહ્યું હોવાની વિગતો પ્રકાશમાં આવી છે. હજુ પણ થોડા દિવસો સુધી IT હિસાબો ખંગાળી શકે છે.