બહુ કરી / લીંબુના ભાવ જુઓ ક્યારથી ઘટી શકે છે, જાણીને દાંત ખાટા થઈ જશે

• ઉનાળામાં લીંબુના ભાવ આસમાને 
• લીંબુના પાક ઉતારા પર વાતાવરણની અસર
• લીંબુની માગ વધી અને આવક ઓછી

બજારમાં હાલ ચર્ચા કોઈ વસ્તુની છે તે બસ મોંઘવારીની છે.તેમાં પણ હાલ ટ્રેન્ડમાં લીંબુ ચાલી રહ્યા છે. કારણ કે, લીંબુની ખટાશ એટલી વધી ગઈ છે કે, એક-એક ટીપું લોકોની દાઢો વળગી રહ્યું છે.ગરમીથી રાહત આપતા પીણા પણ લીંબુના કારણે ખિસ્સુ ખાલી કરી રહ્યા છે. ત્યારે શા માટે આસમાને પહોંચ્યા છે લીંબુના ભાવ તે જાણવા માટે VTV ન્યૂઝ ની ટીમ લીબુંના બાગ સુધી પહોંચ્યું.

 આગામી સમયમાં લીંબુના ભાવમાં વધારો થાય તેવી શક્યતાઓ 

ઉનાળાનો પ્રારંભ થતાં બપોરના સમયે ગરમીનો અહેસાસ થઈ રહ્યો છે ત્યારે ગરમીથી રાહત પામવા લોકો ઠંડાપીણાં, રસ અને લીંબુ શરબત પાણીનો ઉપયોગ કરતા જોવા મળે છે ત્યારે ઉનાળાની ઋતુ શરૂ થતાં જ લીંબુની માગ વધી ગઇ છે. લીંબુ માર્કેટમાં સ્થાનિક આવક ઓછી આવી રહી છે જેની સામે સતત માગમાં વધારો રહેતાં લીંબુના ભાવમાં ભારે ઉછાળો આવ્યો છે. આગામી સમયમાં ઉનાળાની ગરમી વધશે તેમ લીબુ ની માગ પણ વધશે જેને લઈ આગામી સમયમાં ભાવવધારો થાય તેવી શક્યતાઓ શેવાય રહી છે.

આ વર્ષે સતત માવઠું થતાં લીંબુના પાકના ઉતારા પર અસર થઈ છે- ખેડૂત

જેતપુર તાલુકાના ખીરસરા ગામમાં લીંબુની ખેતીનો વ્યવસાય કરતા ખેડૂતે VTV ન્યૂઝ સામે વ્યથા ઠાલવી હતી કે પોતાની 4 વીઘા જમીનમાં 225 જેટલી કલમો વાવેલી પરતું આ વર્ષે સતત વાતાવરણમાં પલટો આવતાં વાદળછાયું વાતાવરણ રહેતાં અને માવઠું થતાં લીંબુડી પર આવેલા ફૂલ ઝરી ગયા હતા. જેને કારણે નવા લીંબુના પાકના ઉતારા પર અસર થઈ છે. તેમજ વાવાઝોડા ના અસરના કારણે લીંબુનું ઉત્પાદન ઘટ્યું છે. જેથી ઉત્પાદન ઘટતા સામે લીંબુની માંગ હોવાથી આ વર્ષે સ્થાનિક આવક માપસરની જોવા મળી રહી હોઈ જેથી લીંબુના ભાવમાં વધારો જોવા મળ્યો છે. 

માર્કેટમાં પહેલીવાર લીંબુ અન્ય જગ્યા એથી મંગવવા પડી રહ્યા છે-વેપારી

આ અંગે જેતપુર માર્કેટિંગ યાર્ડનાં વેપારી રાજુભાઈ વેકરીયા એ જણાવ્યું હતું કે ઉનાળામાં લીંબુની માગ વધારે હોય છે જેની સામે અત્યારે સ્થાનિક આવક ખુબ જ ઓછી છે. ભાવમાં ગત વર્ષ કરતા ચાર ગણો વધારો જોવા મળ્યો છે હાલ મદ્રાસી લીંબુની આવક થઈ રહી છે.માર્કેટમાં પહેલીવાર લીંબુ અન્ય જગ્યા એથી મંગવવા પડી રહ્યા છે. હાલ હોલસેલ માર્કેટમાં લીંબુના ભાવો કિલો 200 થી 300 રૂપિયા સુધી પહોંચ્યા છે. ઉનાળામાં લીંબુની માગ સતત વધી રહી છે.

ગત વર્ષ કરતાં ચાલુ વર્ષે લીંબુના ભાવમાં ચાર ઘણો વધારો 

જો કે જેતપુર માર્કેટમાં સ્થાનિક આવક માપસરની જોવા મળી રહી છે જ્યારે માગ વધારે હોવાથી લીંબુના ભાવમાં વધારો જોવા મળ્યો છે. 20 કિલોના ભાવ રૂ 800 થી 1000 સુધીના જોવા મળ્યા છે. હજુ પણ ભાવ વધારો થશે તેમ માગ પરથી જોવા મળી રહ્યું છે.ગત વર્ષે લીંબુના ભાવ રૂ 200 થી 600ના હતા જેમાં ચાલુ વર્ષે ચાર ગણો વધારો જોવા મળી રહ્યો છે.