સિક્યુરીટી ચૂક / VIDEO : અગરતલા ગેસ્ટ હાઉસ પાસે અમિત શાહના કાફલાની પાછળ અજાણ્યાએ દોડાવી કાર, પોલીસ દોડતી થઈ

• ત્રિપુરાની રાજધાની અગરતલામાં અમિત શાહની સિક્યુરીટીમાં ખામી
• તેમના કાફલાની પાછળ દોડી અજાણી કાર
• પોલીસ દ્વારા રોકવામાં આવતા પણ ન રોકાઈ 

કેન્દ્રીય ગૃહમંત્રી અમિત શાહ ધૂળેટીના દિવસે ત્રિપુરાની રાજધાની અગરતલામાં હતા. અગરતલાના સ્ટેટ ગેસ્ટ હાઉસમાંથી બહાર નીકળ્યાં બાદ અમિત શાહની સિક્યુરીટીમાં ચૂકની ઘટના જોવા મળી હતી. હકીકતમાં અગરતલા ગેસ્ટહાઉસમાંથી જેવો અમિત શાહનો કાફલો પસાર થયો કે તરત તેની પાછળ એક કાર લાગી ગઈ હતી. કેમેરામાં કેદ થયેલા આ સુરક્ષા ભંગમાં તેમના કાફલાની પાછળ એક સફેદ ટાટા ટાઈગર કાર દોડતી જોવા મળતી હતી. અમિત શાહનો કાફલો ત્યાંથી પસાર થઈ રહ્યો હોવાથી પોલીસે કારને રોકવાનો પ્રયાસ કર્યો હતો. પરંતુ કાર કાફલા પાસેથી પસાર થઈ હતી. આ જોઈને પોલીસને પરસેવો વળી ગયો હતો. પોલીસે જણાવ્યું કે તેઓ આ મામલાની તપાસ કરી રહ્યા છે.

ગત વર્ષે પણ મુંબઈમાં શાહના કાર્યક્રમમાં ચૂક જોવા મળી હતી 
ગત વર્ષે મુંબઈ પોલીસે એક કાર્યક્રમમાં અમિત શાહને મળવા જઈ રહેલા આંધ્રપ્રદેશના સાંસદના પર્સનલ આસિસ્ટન્ટનો ઢોંગ કરવા બદલ 32 વર્ષીય વ્યક્તિની ધરપકડ કરી હતી. આ વ્યક્તિ મહારાષ્ટ્રના મુખ્ય પ્રધાન એકનાથ શિંદે અને તેમના નાયબ દેવેન્દ્ર ફડણવીસના નિવાસસ્થાનોની બહાર ગૃહ મંત્રાલય (એમએચએ) ના સભ્ય હોવાનો ઢોંગ કરતા જોવા મળ્યો હતો કારણ કે તેણે તેની રિબન ટેગ પણ રાખી હતી.

 ભાજપ અને ટીપરા મોથા વચ્ચે ગઠબંધન કરવા અગરતલામાં શાહના ધામા 
અમિત શાહ ગઈકાલે અગરતલામાં ત્રિપુરાના પૂર્વ રાજવી પ્રદ્યોત માણિક્ય દેબબુર્માને મળવા અને ભાજપ અને ટીપરા મોથા વચ્ચે ગઠબંધન અંગે ચર્ચા કરવા માટે આવ્યા હતા. તેમણે તાજેતરમાં જ શપથ લીધેલા ત્રિપુરાના મુખ્યમંત્રી માણિક સાહા સાથે પણ બેઠક કરી હતી.