પોરબંદરમાં મેગા ડિમોલિશન મામલે હાલ સમગ્ર શહેરમાં શાંતિનું વાતાવરણ બની રહે તે માટે જિલ્લા કલેકટર દ્વારા જાહેરનામું બહાર પાડી શહેરમાં 144 કલમ લાગુ કરી દેવામાં આવી છે
પોરબંદર મેગા ડીમોલેશનનો મામલો
હાલ સમગ્ર શહેરમાં શાંતિનું વાતાવરણ
કીર્તિમંદિર, ઉદ્યોગનગર, રાણાવાવ અને કુતિયાણા શહેરમાં 144 કલમ લાગુ
પોરબંદરમાં તંત્ર દ્વારા મેગા ડિમોલિશન હાથ ધરવામાં આવી રહ્યું છે. જેને લઈને જીલ્લા કલેક્ટરે જાહેરનામુ બહાર પાડ્યું છે. આ કામગીરી દરમિયાન શાંતિ જળવાઇ રહે તે માંટે કીર્તિમંદિર, ઉદ્યોગનગર, રાણાવાવ અને કુતિયાણામાં કલમ 144 લાગુ કરવામાં આવી છે. આ જાહેરનામુ આગામી 10 ઓક્ટોબર સુધી કલમ 144 લાગુ રહેશે. વધુમાં શહેરમાં શાંતિનો ભંગ ન થાય તે માટે જૂનાગઢ અને ગીર સોમનાથથી પોલીસ પણ બોલાવવામાં આવી હોવાનું જાણવા મળી રહ્યું છે. વધુમાં SRPની ટીમ પણ પોરબંદરમાં તૈનાત કરાશે .
લોકોએ આક્રોશ સાથે કૂચ યોજી હતી
બેટ દ્વારકા બાદ દરિયા કિનારા વિસ્તારની સુરક્ષાને ધ્યાને લઈને, હવે પોરબંદર જિલ્લામાં પણ ગેરકાયદેસર બાંધકામ પર બુલડોઝર ફેરવવામાં આવ્યું છે. પોરબંદરમાં ગેરકાયદેસર દબાણ પર પોલીસે સખત કાર્યવાહી શરૂ કરી છે ત્યારે કેટલાક તત્વોના પેટમાં તેલ રેડાઈ રહ્યું છે.આજે પોરબંદરમાં ડિમોલિશનની કાર્યવાહી દરમિયાન કેટલાક લોકોએ આક્રોશ સાથે કૂચ યોજી હતી.
મેમણવાડા વિસ્તારમાં ટોળે ટોળા રસ્તા પર ઉતાર્યા
પોરબંદર જિલ્લાના દરિયાઇ પટ્ટીના વિસ્તારમાં તેમજ ગોસા, નવાગામ જેવા શહેરમાં ગેરકાયદેસર બાંધકામને તોડી પાડવા માટે તંત્ર દ્રારા કાર્યવાહી હાથ ધરવામાં આવી છે. ત્યારે આજે પોરબંદરમાં મેગા ડિમોલેશન કાર્યવાહી વખતે વાતાવરણમાં તંગદિલી સર્જાઈ હતી. રોષે ભરાયેલા લઘુમતી સમાજના લોકોએ આક્રોશમાં સાથે વિવાદવાળા સ્થળ પર પહોંચવા કુચ કરી હતી. શહેરના મેમણવાડા વિસ્તારમાં મહિલાઓ તથા પુરુષોના ટોળે ટોળા રસ્તા પર ઉતરી આવ્યા હતા. જો કે આ ટોળાને ત્યાં પહોંચતા રોકવા પોલીસે પણ તાત્કાલિક બંદોબસ્ત ગોઠવ્યો હતો અને પરિસ્થિતિ પર કાબુ મેળવવા ઘટના સ્થળે પોલીસ કાફલો પહોંચ્યો હતો.
શહેરના વાતાવરણમાં સર્જાઇ હતી તંગદિલી
પરંતુ બેકાબુ બનેલા ટોળાએ પોલીસને પણ દાદ આપી ન હતી. પોલીસ સાથે ઘર્ષણ થતા પોલીસે ટીયર ગેસ છોડવાની ફરજ પડી હતી.આમ, પોરબંદર જિલ્લામાં મેગા ડિમોલેશનની કાર્યવાહીને લઈને 8 જેટલા સ્થળો પર દબાણ દૂર કરતા શહેરના વાતાવરણમાં તંગદિલી જોવા મળી રહી છે. શહેરના મેમણવાડા વિસ્તારમાંથી નીકળેલા ટોળા પર પર કાબુ મેળવવા માટે ત્રણથી વધુ ટીયર ગેસ છોડવામાં આવ્યા હતા. ધટનામાં પોલીસ અને ટોળા આમને સામને આવી જતા વાતાવરણ તંગ જોવા મળ્યું હતુ.