ક્રાઇમનું પાટનગર / ગાંધીનગરમાં પોઇન્ટ બ્લેન્ક રેન્જથી ગોળી મારી સચિવાલયના પ્યુનની હત્યા, CCTVમાં બુકાનીધારી હત્યારાઓ દેખાયા

• ગાંધીનગર યુવકની હત્યાનો મામલો
• સચિવાલયના પ્યુનની હત્યા કરી 2 આરોપી ફરાર
• એલસીબી, એસઓજી સહિતની ટીમો દ્વારા તપાસ

પાટનગર ગાંધીનગરમાં યુવકની પોઈન્ટ બ્લેંક રેંજથી ગોળી મારી હત્યા કરી દેતા ચકચાર મચી ગઈ છે. સચિવાલયમા પ્યુન તરીકે કોંટ્રાક્ટ પર કામ કરતા યુવકની સેક્ટર ૧૦મા હત્યા કરી દેવામાં આવી હતી જેને લઈ ગાંધીનગર પોલીસે તપાસનો દોર શરૂ કર્યો છે. ગાંધીનગરની સેક્ટર સાત પોલીસની રેન્જ બનેલા આ બનાવમાં હત્યાનો ગુનો નોંધી સીસીટીવીના આધારે તપાસનો ધમધમાટ શરૂ કર્યો છે

શું છે સમગ્ર બનાવ?
ગાંધીનગરમાં બીજ નિગમની કચેરી પાસે યુવકની ગોળી મારી હત્યા કરી દેવામાં આવી. પ્રાથમિક તપાસમા પોલીસે મૃતક યુવક કિરણજી મકવાણા હોવાનું સામે આવ્યું છે જે ઈંદ્રોડાનો રહેવાસી છે. પોલીસે ઘટના સ્થળેથી પીસ્તોલ તથા કાર્ટરીજ પણ કબ્જે કરી છે. પોલીસે કરેલી પ્રાથમિક પૂછપરછમા બાઈક પર આવેલા બે શખ્સોએ પોઈન્ટ બ્લેન્ક રેંજથી હત્યા કરી ફરાર થઈ ગયા હતા. 

ગાંધીનગર પોલીસે આરોપીઓનું પગેરૂ મેળવ્યું
મૃતકના ભાઈ અને પરિવારના સભ્યો પણ ઘટના સ્થળ પર પહોંચ્યા હતા. પોલીસે મૃતકના પરિવારના સભ્યો સાથે પ્રાથમિક ચર્ચા કરી હતી. સુત્રોનું માનીએ તો યુવકની હત્યા અગાઉ થયેલી તકરાર કે સ્ત્રી પાત્રના કારણે થઈ હોઈ શકે છે. 

ટેકનીકલ સર્વેલન્સના આધારે પોલીસે તપાસ શરૂ કરી 
આરોપીઓના પોલીસને સીસીટીવી ફૂટેજ મળ્યા છે. આ સીસીટીવી ફૂટેજમા બે આરોપીઓ બાઈક પર જઈ રહ્યા છે. એક આરોપી બુકાનીધારી છે જ્યારે અન્ય એક આરોપી હેલ્મેટ પહેરી પાછળ સવાર છે જેણે ફાયરિંગ કર્યું હોવાનું અનુમાન છે. પોલીસે ટેક્નિકલ સર્વેલન્સના આધારે તથા વિવિધ ટીમો બનાવી તપાસ શરૂ કરી છે.