રાજકોટ ભાજપનું એક જુથ વિધાનસભા ચૂંટણીની ટિકિટ માટે થયું સક્રિય, જમણવાર યોજી સ્થાનિકને ટિકિટ અપાય તેવો સરી-સંચો કર્યો
ચૂંટણી પહેલા રાજકોટમાં ભાજપની ગુપચુપ બેઠક
ખાનગી બેઠકમાં ભાજપ નેતાને ટિકિટ મળે તેનુ આયોજન
ખાનગી બેઠકમાં ફોટો-વીડિયો પણ ન લેવા દેવાયા
ચૂંટણી સામે આવતા જ ગુજરાતમાં રાજકિય ગતિવિધિઓ તેજ થઈ ગઈ છે. ટિકિટ માટેની લાઇન દોરી અત્યારથી કરવામાં કાર્યકર્તા અને નેતાઑ જોતરાઈ ગયા છે. ખાસ કરીને જુથવાદના કારણે હંમેશા ચર્ચામાં રહેતા રાજકોટ ભાજપનું એક જુથ સક્રિય થયું છે.
વિધાનસભામાં ટિકિટની માગણીને લઈ અત્યારથી જ લોબિંગ
રાજકોટમાં વિધાનસભાની ચૂંટણીને લઇ શહેર ભાજપમાં ગુપચુપ બેઠકો શરૂ કરવામાં આવી છે. થોડા દિવસ પહેલા દક્ષિણ રાજકોટના નેતાઑએ છૂપી રીતે એક જમવાણનું આયોજન કર્યું હતું. તેમાં ટિકિટની માંગણીને લઈ ચર્ચાઓ થઈ હોવાની માહિતી ભાજપના જ ખાસ સૂત્રો દ્વારા મળી રહી છે.
રાજકોટ ભાજપમાં ચર્ચાનો વિષય એક જ આયોજન કોનું હતું?
આપનેએ પણ જણાવી દઈએ કે પ્રદેશના એક નેતાના વધતા કદને લઇ ભાજપનું એક જૂથ સક્રિય થયું છે.ડિનરમાં સ્થાનિક ભાજપ આગેવાનને જ ટિકિટ મળે તેવુ નક્કી કરવામાં આવ્યું છે.જમણવારમાં કોર્પોરેટર સહિત 100 જેટલા કાર્યકર્તા હાજર રહ્યાં હતા. પણ નેતા-કાર્યકર્તાઓને ફોટો-વીડિયો પણ ન લેવા દેવાયા હતા. કોના ઇશારે જમણવાર યોજાયો એ બાબત શહેર ભાજપમાં ચર્ચાનો વિષય બની છે.
ગઈકાલે જ સી આર પાટીલે કાર્યકર્તા અને નેતાઑને ચેતવ્યા હતા
હજુ તો ગઈ કાલના રોજ જ રાજકોટમાં પ્રદેશ ભાજપ પ્રમુખ સી આર પાટિલે ભાજપના કાર્યકરોનો ક્લાસ લીધો હતો. જેમાં તેઓએ ભ્રષ્ટાચાર કરતા પદાધિકારીના નામ કાર્યકર્તાઓને ખાનગીમાં આપવા કહ્યું હતું. પાટીલે કાર્યકર્તાઓને ભ્રષ્ટાચારીઓ સામે તપાસ કરાવીને કાર્યવાહી કરવા માટે કહ્યું હતું. ભ્રષ્ટાચાર કરતા હોદ્દેદાર કે પદાધિકારીઓને ટિકિટ નહીં મળે એવો પણ પાટીલે ઉલ્લેખ કર્યો હતો. રાજકોટમાં હેમુ ગઢવી હોલમાં સી.આર પાટીલે ભાજપના કાર્યકરો સાથે બેઠક કરી હતી. બંધ બારણે કાર્યકરો સાથે પ્રદેશ પ્રમુખે બેઠક કરી હતી.સી.આર પાટીલે કાર્યકર્તાઓ સાથેની બેઠકમાં જણાવ્યું કે, 'ભાજપના કાર્યકર્તાઓ ટોપી પહેરજો, પણ કોઇને ટોપી પહેરાવતા નહીં. કોઇ ખોટું કરતું હોય તો તેની માહિતી મને આપજો. હું નામ પણ ગુપ્ત રાખીશ અને તપાસ પણ કરાવીશ.'