વૈજ્ઞાનિકોએ કોરોના વાયરસ ફેફસાના કોષોને કેટલી ગંભીર રીતે નુકશાન પહોંચાડે છે તેની તસ્વીર જાહેર કરી છે.
આ તસ્વીરમાં સ્પષ્ટ જોઈ શકાય છે કે કેવી રીતે વાયરસ ફેફસાના કોષોનો ભરડો લે છે. યુનિવર્સીટી ઓફ નોર્થ કેરોલિનાના ચિલ્ડરન્સ રિસર્ચ ઇન્સ્ટિટ્યૂટે સાર્સ Cov-2ની આ તસ્વીર લઇને સ્પષ્ટતાથી સમજાવ્યું છે કે શ્વસનતંત્રમાં આ વાયરસ કેવી રીતે અસર કરે છે.
આ હાઈ પાવર્ડ માઈક્રોસ્કોપિક ઇમેજથી વાયરસના પાર્ટિકલ્સ કેવી રીતે શ્વસનતંત્રની સપાટી ઉપર બેસે છે અને કેવી રીતે ટીશ્યુઝને નુકશાન કરે છે. આ ઇમેજ લેવા વૈજ્ઞાનિકોએ ફેફસાના કોષો કાઢીને તેને એક કસનળીમાં મુક્યા અને તેની અંદર કોરોનાના કણોને નાખ્યા. આમ કર્યા બાદ તેને 96 કલાક સુધી રહેવા દીધા બાદ તેનું ઇલેક્ટ્રોન માઇક્રોસ્કોપમાં સ્કેનિંગ કર્યું.
વૈજ્ઞાનિકોએ નોંધ્યું કે આ વાયરસના આગમન પછી ફેફસાના કોષોની સપાટી જેને Cilia કહે છે તેની ટોચ ઉપર મ્યુક્સ જામી ગયું હતું. વૈજ્ઞાનિકો સમજાવે છે કે આ મ્યુક્સ વાયરસને પોતાની અંદર ચોંટાડી દે છે જેથી વાયરસ ફેફસામાં વધુ ન ફેલાય.
આ તસ્વીરના રિસર્ચના આધારે વૈજ્ઞાનિકો જાણી શક્યા છે કે કોરોના વાયરસની સંખ્યા સંક્રમિત દર્દીના શરીરમાં ખૂબ વધારે સંખ્યામાં હોય છે અને આ જ કારણ છે કે આ રોગ ખૂબ ચેપી છે.
નિષ્ણાતો કહે છે કે આ તસ્વીરો ઉપરથી એવું ચોક્કસ કહી શકાય કે સંક્રમિતો અને સ્વસ્થ લોકો બંને માટે માસ્ક પહેરવો અનિવાર્ય છે.