ભારત સહિત દુનિયાભરમાં ગ્લોબલ વોર્મિંગ અને પર્યાવરણ માટે ખતરનાક એવા કાર્બનના કચરાના નિકાલની મોટી સમસ્યા છે, જોકે હવે વિજ્ઞાનીઓએ એવી ટેકનિક વિકસાવી છે કે જેનાથી કેળાંની છાલથી લઈ કારનાં ટાયર સુધીના કાર્બન આધારિત કોઇ પણ કચરાને વન્ડર મટીરિયલ ગણાતા ગ્રાફિનમાં ફેરવી નાખે છે.
નવી ટેકનિકથી ફેંકી દેવાયેલા ખોરાક, પ્લાસ્ટિક સહિતના કચરામાંથી સરળતાથી ગ્રાફિન બનાવી શકાય છે
કાર-કપડાં-સિમેન્ટ સહિતના ઉત્પાદનમાં ગ્રાફિન વપરાય છે
'ફ્લેશ ગ્રાફિન' ટેકનિક ઝડપી અને સસ્તી છે. કાર્બનયુક્ત કચરાને તેમાં ર,૭ર૭ ડિગ્રી સેલ્સિયસ સુધી ગરમ કરવામાં આવે છે. આ ટેકનિકથી કાર્બનના અણુ તૂટે છે અને થોડી સેકન્ડમાં તે ગ્રાફિનમાં ફેરવાઇ જાય છે. આ ટેકનિકથી દુનિયાભરમાં ઠલવાતા કાર્બનયુક્ત કચરાનો અસરકારક રીતે નિકાલ થઇ શકશે. ગ્રાફિનનો ઉપયોગ મોબાઇલ સહિતના ડિવાઇસની હળવી અને પાવરફૂલ બેટરી સહિત ટેક્નોલોજીમાં થઇ શકે છે. રાઇસ યુનિવર્સિટીના રસાયણશાસ્ત્રી જેમ્સ ટુર કહે છે, આ એક મોટી શોધ છે. દુનિયાભરમાં ખરાબ થઇ જવાના કારણે ૩૦ થી ૪૦ ટકા ખોરાક ફેંકવામાં આવે છે. આ ઉપરાંત પ્લાસ્ટિકનો કચરો વિશ્વવ્યાપી ચિંતાનો વિષય છે. આ ટેકનિકથી પ્લાસ્ટિક કચરો અને રબરનાં ટાયર સહિત કોઈ પણ નક્કર કાર્બન આધારિત પદાર્થને ગ્રાફિનમાં ફેરવી શકાય છે. હાલની ટેકનિક એવી છે, જેમાં ઓછી ગુણવત્તાવાળું કે ઉચ્ચ ગુણવત્તાવાળું ગ્રાફિન પેદા કરી શકાય છે, પરંતુ નવી ટેકનિકથી ઓછા સમયમાં અને મોટી માત્રામાં ગ્રાફિન મળી શકશે.
જો ગ્રાફિન સસ્તી રીતે પેદા કરી શકાય તો તેનો અર્થ એ છે કે તેનો ઉપયોગ અનેક રીતે થઇ શકે છે. કાર-કપડાં-સિમેન્ટ સહિતના ઉત્પાદનમાં ગ્રાફિન વપરાશે. મકાનના બાંધકામમાં વપરાતા કોંક્રીટને મજબૂત કરવા તેનો ઉપયોગ થઇ શકશે. સિમેન્ટથી કોંક્રીટ બનાવવાની પ્રક્રિયામાં આઠ ટકા કાર્બન ડાયોક્સાઇડ પેદા થાય છે. ગ્રાફિનથી મજબૂત બનાવી આપણે મકાન બનાવવા માટે ઓછા કોંક્રીટનો ઉપયોગ કરી શકીએ છીએ. તેના ઉત્પાદન અને પરિવહનનો ખર્ચ પણ ઘણો ઓછો થશે.
જેમ્સ ટુર કહે છે કે મુખ્યત્વે અમે કાર્બન ડાયોક્સાઇડ અને મિથેન જેવા ગ્રીન હાઉસ વાયુનો ઉપયોગ કરી રહ્યા છીએ, જે લેન્ડફિલ્ડમાં ફેંકાતા નકામા ખોરાકમાંથી પેદા થતા હોય છે. અમે તે કાર્બનને ગ્રાફિનમાં રૂપાંતરિત કરી રહ્યા છીએ અને તેને કોંક્રીટમાં ઉમેરી રહ્યા છીએ, જેનાથી કોંક્રીટ બનાવતી વખતે ઉત્પન્ન થતા કાર્બન ડાયોક્સાઇડની માત્રા ઓછી થશે. આ બાબત સમગ્ર પૃથ્વી માટે આશીર્વાદ સમાન સાબિત થશે. વિજ્ઞાનીઓ કહે છે કે નવી ટેકનિકથી વેસ્ટ ફૂડ, પ્લાસ્ટિક વેસ્ટ, પેટ્રોલિયમ, કોલસો, લાકડા સહિત કાર્બન ધરાવતી અનેક ચીજોને ગ્રાફિનમાં ફેરવી શકાશે. સૌથી મહત્ત્વની બાબત એ છે કે કાર્બન કચરાને ગ્રાફિનમાં ફેરવવા સોલવન્ટ, કેમિકલ કે બીજાં કોઇ તત્ત્વોની જરૂર નથી. માત્ર ચોક્કસ રીતે કચરાને ગરમ કરી ગ્રાફિન મેળવવામાં આવે છે.
આ ઉપરાંત આ પ્રક્રિયામાં બિન-કાર્બન તત્ત્વો ગેસ સ્વરૂપે મુક્ત થાય છે તેમજ ગરમી પણ ઘણી ઓછી ઉત્પન્ન કરે છે. ગ્રાફિન પર ઘણા સમયથી સંશોધકોની નજર છે. ખાસ કરીને બેટરી સહિત ઇલેક્ટ્રોનિક્સની ચીજવસ્તુઓ માટે પણ તે ક્રાંતિકારી સાબિત થઇ શકે છે. વિવિધ ફેક્ટરીમાં પેદા થતા પ્રદૂષિત કચરાને સાફ કરવામાં પણ ગ્રાફિન બહુ જ ઉપયોગી હોવાનું સાબિત થયું છે. વિજ્ઞાનીઓ કહે છે કે કાર્બન કચરાને કંચન એટલે ગ્રાફિનરૂપી સોનામાં ફેરવવાની ટેકનિક દુનિયાને પ્રદૂષણથી તો બચાવશે જ, પરંતુ એક નવા અર્થતંત્રને પણ જન્મ આપશે.