ટેક્નોલોજી / આર્ટિફિશિયલ થ્રોટ ડિવાઇસથી હવે મુંગા લોકો પણ બોલતા થશે

અમેરિકાના વિજ્ઞાનીઓએ વેરેબલ આર્ટિફિશિયલ થ્રોટ નામનું ડિવાઇસ બનાવ્યું છે. તેની વિશેષતા એ છે કે તેને ટેટુની જેમ જ ગળા પર લગાવી શકાય છે. જે ગળાની મુવમેન્ટને અવાજમાં કન્વર્ટ કરે છે. વિજ્ઞાનીઓએ આર્ટિફિશિયલ થ્રોટનો પ્રોટોટાઇપ તૈયાર કર્યો છે. જેને લાંબો સમય પહેરી રાખવાથી પણ કોઇ સમસ્યા થતી નથી.

ઉપરાંત તે વારંવાર પહેરવા અને કાઢવા પણ એકદમ સરળ છે. વિજ્ઞાનીઓએ પોલિવિનોલ આલ્કોહોલની પાતળી શીટ પર ગ્રાફિન નામના મટિરિયલથી આ ડિવાઇસ બનાવ્યું છે. જે માત્ર 0.6 ઇંચ બાય 1.2 ઇંચની સાઇઝનું છે. તેને માત્ર થોડું પાણી લગાવીને ગળા પર ચોંટાડી દેવાનું હોય છે. જે હાથમાં પહેરેલા ખાસ આર્મબેન્ડ સાથે ઇલેકટ્રોડથી જોડાયેલું હોય છે.

આર્મબેન્ડમાં સર્કિટ બોર્ડ, માઇક્રો કમ્પ્યુટર, પાવર એમ્પિલફાયર તથા ડિકોડરનો બનેલો હોય છે. જયારે ડિવાઇસ લગાવીને વ્યકિત કોઇ શબ્દ બોલવા પ્રયત્ન કરે છે, જેમ કે ઓકે અને નો, ત્યારે ગળાના સ્નાયુઓની મુવમેન્ટને સાઉન્ડમાં કન્વર્ટ કરે છે.

વિજ્ઞાનીઓ કહે છે કે ભવિષ્યમાં મુંગા લોકોને આ માટે ટ્રેનીંગ આપીને પહેલા એક શબ્દ અને પછી વાક્યોના સિગ્નલ મોકલતા એટલે કે ખાસ પ્રકારે બોલતા શિખવાડી શકાશે, જેના સિગ્નલ અવાજમાં ફેરવી શકાશે.