રાજકોટ / જીવના જોખમે વિદ્યાર્થીઓ પાસે સફાઈ કરાવતા શાળા નં. 81 વિવાદમાં, NSUIનો શિક્ષણ સમિતિમાં હોબાળો, સર્જાયા ટીંગાટોળીના દ્રશ્યો

• રાજકોટની શાળા નંબર 81નો વીડિયો વાયરલ થવા મામલે તપાસના આદેશ
• કોઠારીયા સોલવન્ટની સ્કૂલનો વીડિયો થયો હતો વાયરલ
• NSUIના હોદ્દેદારો અને કાર્યકર્તાઓએ કર્યા ઉગ્ર સૂત્રોચાર
• એ ડિવિઝન પોલીસે NSUI હોદ્દેદારો અને કાર્યકર્તાઓની કરાઇ અટકાયત 

 રાજકોટની શાળા નંબર 81 નો વીડિયો વાયરલ થતા આ મામલે તપાસના આદેશ કરવામા આવ્યા છે. સ્કૂલમાં વિધાર્થીઓ પાસે સાફ સફાઈનો વીડિયો વાયરલ થતા શિક્ષણ સમિતિના અધિકારીઓએ સ્કૂલની તપાસ હાથ ધરી હતા. ત્યારે આ બાબતે પ્રાથમિક શિક્ષણ સમિતિના ચેરમેન અતુલ પંડિતે સ્કૂલની મુલાકાત લીધી હતી.  કોઠારી સોલવન્ટ સ્કૂલનો વીડિયો વાયરલ થતા શિક્ષણ સમિતિ દ્વારા મુલાકાત લેવામાં આવતા આચાર્યની બેદરકારી સામે આવી હતી. આચાર્ય દ્વારા વિધાર્થીઓ પાસે જોખમી રીતે સફાઈ કરાવી હતી.  ત્યારે સ્કૂલના આચાર્ય સામે કાર્યવાહિ થઈ શકે છે.

વિદ્યાર્થી સંગઠન દ્વારા વિરોધ પ્રદર્શન કરાયું
રાજકોટની શાળા નં. 81 ના વિદ્યાર્થીઓ પાસે સાફ સફાઈ કરાવવા મામલે વિદ્યાર્થી સંગઠન દ્વારા વિરોધ પ્રદર્શન કરવામાં આવ્યું હતું. ત્યારે સ્કૂલના પ્રિન્સિપાલ દ્વારા જોખમી રીતે વિદ્યાર્થીઓ પાસે સફાઈ કરાવતા વિવાદ થવા પામ્યો છે. જેને લઈને વિદ્યાર્થી સંગઠન NSUI દ્વારા નગર પ્રાથમિક શિક્ષણ સમિતિની કચેરીએ સૂત્રોચ્ચાર કરી વિરોધ નોંધાવ્યો હતો અને જવાબદાર સામે કાર્યવાહિની માંગ કરી હતી. વિરોધ કરી રહેલ NSUI હોદ્દેદારો તેમજ કાર્યકર્તાઓની એ ડીવિઝન પોલીસે અટકાયત કરી પોલીસ મથકે લઈ જવામાં આવ્યા હતા.

અકસ્માત બને તો જવાબદાર કોણ ?
હાલ તો અહીં સવાલ સૌથી મોટો એ થઈ રહ્યો છે કે જો આ સફાઈ દરમિયાન કોઈ અણબનાવ બને કે કોઈ અકસ્માત સર્જાયો હોત તો જવાબદાર કોણ ? માત્ર સાફ સફાઈ જ મુદ્દો નહિ પરંતુ આ વખતે તો શાળાના શિક્ષકોએ હદ વટાવી બાળકોના જીવ જોખમમાં મૂકી દીધા છે. 

પ્રિન્સિપાલે કર્યો પોતાનો લુલો બચાવ
વિદ્યાર્થીઓને સ્કૂલમાં છજ્જા પર ચડાવી વિદ્યાર્થીઓ પાસે સફાઈ કરાવતો વીડિયો બહાર આવતા પ્રિસિપાલે આ રીતે છજા પર ચડાવીને સફાઈ કરવાની કામગીરીને મોટિવેશનલ પ્રવૃત્તિ ગણાવી દીધી હતી.

થોડા સમય અગાઉ પંચમહાલની એક સ્કૂલ વિવાદમાં આવી હતી
થોડા સમય પહેલા પંચમહાલના ઘોઘંબાની જોરાપુરા પ્રાથમિક શાળાના વિદ્યાર્થીઓ પાસે કામ કરાવાયું હોવાનું પ્રકાશમાં આવ્યું હતું. ત્યારે આ વિદ્યાર્થીઓને જીવના જોખમે શાળાની છત પર પતરાની સાફ સફાઈ કરાવવામાં આવી રહી છે. 15 ફૂટ ઉંચાઈએ આવેલા પતરા ઉપર વિદ્યાર્થીઓ પાસે સાવરણો લઈને સાફ સફાઈ કરાવવામાં આવી રહી છે.