અત્યારસુધી શિક્ષકના હાથમાં તમે પુસ્તક અને ચોક કે બોલપેન સાથે જોયા હશે. પરંતુ કોરોનાએ શિક્ષકોને પણ પેટિયું રળવા અન્ય ધંધા તરફ વાળી દીધા છે. રાજ્યની જેમ સુરતમાં શૈક્ષણિક કાર્ય બંધ હોવાના કારણે ટ્યુશન કલાસીસ સંચાલકોની હાલત પણ કફોડી બની છે. આ જ કારણ છે કે શિક્ષકોએ હવે અન્ય ધંધા રોજગારી તરફ વળવાનો વારો આવ્યો છે.
કોરોનાના કારણે રાજ્યમાં શાળાઓ બંધ
શિક્ષકોએ રોજગારી માટે શરૂ કર્યો બીજો બિઝનેસ
સુરતના શિક્ષકે શરૂ કર્યો કેટરિંગનો બિઝનેસ
માર્ચ મહિનાથી શાળાઓ અને ટ્યુશન કલાસીસ બંધ છે, તેવામાં શિક્ષકો પાસે પણ રોજગારીનું કોઈ સાધન બચ્યું નથી. સુરતના ટ્યુશન ક્લાસિસના શિક્ષકોનું માનવું છે કે તેઓને બીજું કંઈ કામ પણ આવડતું નથી, જેથી તેમને જે પણ નાનું મોટું કામ આવડે છે તે કરીને પરિવારનું ગુજરાન ચલાવવા સિવાય તેમની પાસે કોઈ વિકલ્પ પણ બચતો નથી.
સુરતના ખરવરનગરમાં વર્ષોથી ટ્યુશન કલાસીસ ચલાવતા તેમજ પૂર્વ કોર્પોરેટર એવા શૈલેષ જરીવાળા હવે લૉકડાઉન પછી કલાસીસ બંધ હોવાથી કેટરિંગના ધંધા તરફ વળ્યાં છે. શૈલેષભાઇ અને તેમના પત્નીને રસોઈનો શોખ હોવાથી હવે તેમણે ઘરે બેઠા કેટરિંગનો બિઝનેસ શરૂ કરીને ઘરે બેસીને જ ઓર્ડર લેવાનું શરૂ કરીને ભોજન બનાવવાની શરૂઆત કરી છે, જે ધંધો પણ હવે જામવા પણ લાગ્યો છે.
તે જ રીતે ભાઠેનામાં ટ્યુશન કલાસીસ ચલાવતા ક્રિષ્ના રાણા પણ હવે સુરતી નાસ્તાની બનાવટમાં લાગી ગયા છે. તેઓ જાણે છે કે સુરતીઓની સવાર ખમણ, સમોસા વગર અધૂરી છે, જેથી તેઓએ વિદ્યાર્થીઓ ટ્યુશન ન આવતા હોવાથી હવે સવાર સવારમાં સમોસાની રોટલી બનાવવાનું શરૂ કર્યું છે. સમોસાની રોટલી સાથે હવે તેઓ સમોસા ઓર્ડર મુજબ બનાવીને આપવાના કામમાં જોતરાઈ ગયા છે.
આ જ રીતે ઉધનમાં ટ્યુશન કલાસ ચલાવતા શિક્ષક જય પંચાલે હવે ડેરી અને બેકરી પ્રોડક્ટની દુકાન શરૂ કરી છે. તો કતારગામ વિસ્તારના એક શિક્ષકે એમ્બ્રોઇડરી ખાતામાં કામ શરૂ કરી દીધું છે. આવા તો એક નહિ પણ અસંખ્ય ઉદાહરણો છે, જ્યાં ટ્યુશન કલાસીસ શરૂ નહીં થઇ શકવાના કારણે શિક્ષકોને પેન પુસ્તક છોડી અન્ય ધંધા તરફ વળવું પડ્યું છે.
આમ, હવે જ્યારે શૈક્ષણિક કાર્ય ક્યારે શરૂ થશે અને વિદ્યાર્થીઓ ફરી પાછા ટ્યુશન કલાસ ક્યારે આવશે તેની રાહ જોવાને બદલે પરિવારનું ગુજરાન ચલાવવા હવે શિક્ષકોએ પણ રોજગારી બદલીને બીજો રસ્તો અપનાવવો પડ્યો છે.