વેસ્ટર્ન ડિસ્ટર્બન્સ સર્જાતા આગામી ત્રણ દિવસો સુધી વરસાદ પડવાની સંભાવના, આજે અમદાવાદ, ગાંધીનગર સહિતના અમુક વિસ્તારોમાં માવઠું થયું
ગુજરાતમાં વેસ્ટર્ન ડિસ્ટર્બન્સની અસર
મધ્ય ગુજરાત, ઉત્તર ગુજરાતમાં પડી શકે છે વરસાદ
અમદાવાદમાં મોડી રાતથી કમોસમી વરસાદ
અમદાવાદ સહિત રાજ્યમાં કમોસમી વરસાદનું કમઠણ સર્જાયુ
હવામાન વિભાગની આગાહી મુજબ કમોસમી વરસાદનો કહેર વર્તાવવાનો શરૂ થયો છે. અમદાવાદ, ગાંધીનગર, બાવળા , મહેમદાવાદ સહિતના જિલ્લાઓમાં બુધવાર મોડી રાતથી કમોસમી ઝરમર વરસાદ વરસ્યો હતો. બીજી તરફ અમદાવાદ શહેરમાં બુધવાર મોડી રાતથી પડેલા કમોસમી વરસાદના કારણે બોડકદેવ, સોલા, ઈસ્કોન, શિવરંજીની, મણિનગર, એલિસબ્રીજ, નારોલ, નિકોલ, વસ્ત્રાલ, બાપુનગર ખોખરા, સહિતના વિસ્તારોના માર્ગ વરસાદી પાણીથી ભીંજાયા હતાં. તો વળી રાજ્યના હવામાન વિભાગની આગાહી પ્રમાણે આજ થી 11મી જાન્યુઆરી સુધી રાજ્યમાં વરસાદી માહોલ યથાવત રહેશે. જેને લઈને ખેડૂતોના શ્વાસ અધ્ધર થયા છે.
રાજ્યમાં ત્રણ દિવસ સુધી રહેશે વરસાદી માહોલ : હવામાન વિભાગ
રાજ્યભરમાં કમોસમી વરસાદને લઇ હવામાન વિભાગનુ વેધર બુલેટીન જાહેર કર્યું છે. જેમાં રાજ્યમાં આગામી ત્રણ દિવસોમાં વરસાદી માહોલ યથાવત રહેતા ખેડૂતોને સતર્ક કરવામાં આવ્યાં છે. હવામાન વિભાગની આગાહી અનુસાર 6 જાન્યુઆરી એટલે કે, આજે અમદાવાદ,ગાંધીનગર,વડોદરા, બનાસકાંઠા,સાબરકાંઠા,દીવ-દમણ, કચ્છ મોરબી અમરેલી જામનગર રાજકોટ સહિતના જિલ્લાઓમાં આજે વરસાદી માહોલ રહેશે. જ્યારે 7 જાન્યુઆરી એટલે કે, આવતી કાલે અમરેલી,જામનગર,દ્વારકા , પોરબંદર, ગીરસોમનાથ, કચ્છ,દીવમાં વરસાદી માહોલ રહેશે. તેમજ 8મી જાન્યુઆરીએ ઉત્તર ગુજરાતના મહેસાણા, દાહોદ,પંચમહાલ,અરવલ્લીમાં વરસાદી માહોલ રહેવાની સંભાવના વ્યક્ત કરવામાં આવી છે.
અરવલ્લી જિલ્લામાં કમોસમી વરસાદ સવારથી ધુમ્મસ ભર્યુ વાતાવરણ સર્જાયું હતું. તો વળી મોડાસા, શામળાજી, ભિલોડા, માલપુરમાં ઝરમર કમોસમી વરસાદ હળવા ઝાપટાં પડતાં ખેડૂતોના જીવ પડીકે બંધાયા હતાં.
સાબરકાંઠામાં પણ વહેલી સવારે વાતાવરણમાં પલટો
હવામાન વિભાગની આગાહી વચ્ચે સાબરકાંઠામાં પણ વહેલી સવારે વાતાવરણમાં પલટો જોવા મળ્યો હતો. જેમાં ઇડર,વડાલી,ખેડબ્રહ્મા,હિંમતનગરમાં કમોસમી વરસાદથી વિઝીબિલિટીમાં થયો ઘટાડો થયો હતો. બીજી બાજુ વરસાદી વાતાવરણથી ખેડૂતોમાં ઘઉં,બટાકા,ચણા,વરીયાળી, જીરુ સહિતના રવિ પાકમાં નુકસાનની ભીતિ વર્તાવવા માડી હતી.