રાજકોટમાં ચૌકાવનારૂ કૌભાંડ ઝડપાયું, આધાર કાર્ડ અને પાનકાર્ડની કોપીની સામે 5 હજાર રૂપિયા આપવામાં આવતા હતા અને આ માટે મોટી સંખ્યામાં લોકો રૂપિયા લેવા માટે ઉમટ્યા હતા.
રાજકોટમાં બ્લેકના રૂપિયા વ્હાઈટ કરવાનું કૌભાંડ!
ST સ્ટેન્ડના ત્રીજા માળે ચાલતું હતું ષડયંત્ર
ઓફિસ સંચાલકે લોકોને વહેંચ્યા રૂપિયા
રાજકોટમાં આંગડીયાના બ્લેકના રૂપિયા વ્હાઈટ કરવાનું ચૌકાવનારૂ કૌભાંડ ઝડપાયું છે. ST સ્ટેન્ડના ત્રીજા માળે એક ઓફિસમાંથી લોકોને રૂપિયા વહેંચવામાં આવ્યા હોવાની ઘટના પ્રકાશમાં આવી છે.
બે મહિનાથી ચાલતા કૌભાંડનો પર્દાફાશ
તમને જણાવી દઈએ કે, આ કૌભાંડી ઘટનામાં આધાર કાર્ડ અને પાનકાર્ડની કોપીની સામે 5 હજાર રૂપિયા આપવામાં આવતા હતા અને આ માટે મોટી સંખ્યામાં લોકો રૂપિયા લેવા માટે ઉમટ્યા હતા. VTV NEWSની ટીમ ઘટનાસ્થળે પહોંચતા ઓફિસ સંચાલક ફરાર થયો હતો. રૂપિયા કેમ વહેંચવામાં આવી રહ્યા છે એ અંગે સવાલ પૂછતા સંચાલક ત્યાંથી રફ્ફુ ચક્કર થયો હતો. અત્રે ઉલ્લેખનીય છે કે, છેલ્લા બે મહિનાથી આ પ્રકારે રૂપિયાની વહેંચણી થઈ રહી હતી.
પોલીસને કેમ હજુ સુધી ન આવી ગંધ?
VTV NEWSની ટીમ ઘટનાસ્થળે પહોંચી સમગ્ર કૌભાંડ જાણવાની કોશિષ કરી હતી ત્યારે આ કૌભાંડ ચલાવતો સંચાલક તેની એક ઓફિસમાં લોક મારી દીધો હતો તેમજ બીજી ઓફિસમાંથી દસ્તાવેજો લઈ ફરાર થઈ ગયો હતો તેને સવાલ કરતા તેણે ગોળ ગોળ જવાબ આપ્યા હતા અને કહ્યું કે, આધારકાર્ડ અને પાનકાર્ડનું કામ કરીએ છીએ તો વળી એવો પણ જવાબ આપ્યો હતો કે, લોન આપવાનો કામ કરીએ છીએ. ત્યાર બાદ તેને લોનના ડોક્યુમેન્ટ બતાવવાનું કહેતા તે ત્યાંથી નાસી છૂટ્યો હતો.