સુપ્રીમ કોર્ટે એડજેસ્ટ ગ્રોસ રેવેન્યુ (AGR) મામલે મંગળવારે કરેલી સુનાવણીમાં ટેલીકોમ કંપનીઓને મોટી રાહત આપી છે. સુપ્રીમે કંપનીઓને AGR બાકી ચૂકવવા માટે 10 વર્ષનો સમય આપ્યો છે. આ નિર્ણયથી વોડાફોન આઇડિયા અને એરટેલ કંપનીઓને મોટી રાહત મળી છે.
સુપ્રીમ કોર્ટે જણાવ્યું કે ટેલીકોમ કંપનીઓને AGR બાકીના 10 ટકા 31 માર્ચ 2021 સુધીમાં ચુકવવાના રહેશે. ઉલ્લેખનીય છે કે કેટલીક કંપનીઓને લેણી નીકળતી રકમના 10 ટકા ચુકવી દીધા છે. જસ્ટિસ મિશ્રાએ કહ્યું કે કોવિડ સંકટને ધ્યાનમાં લઇને આ અવધિ વધારવામાં આવી છે.
ટેલીકોમ યૂઝર્સ માટે સારા સમાચાર
આ ટેલીકોમ યૂઝર્સ માટે પણ સારા સમાચાર છે, કારણ કે હવે ટેલીકોમ કંપનીઓ ટેરિફ હાલમાં વધારશે નહીં. જસ્ટિસ મિશ્રાએ 2 સપ્ટમ્બરે એટલે કે બુધવારના રોજ નિવૃત્ત થઇ રહ્યાં છે. કોર્ટે જણાવ્યું હતું કે આ નિર્ણય ત્રણ આધાર પર થશે.
પહેલું ટેલિકોમ કંપનીઓને AGR લેણા ચુકવવા માટે ટુકડા-ટુકડામાં AGR લેણા ચુકવવા માટે સમયગાળો આપવામાં આવે, બીજુ - જે કંપનીઓ નાદારી પ્રક્રિયામાંથી પસાર થઇ રહી છે તેમના બાકી રહેલા નાણા કેવી રીતે વસૂલવામાં આવે અને ત્રીજુ-શું આવી કંપનીઓ દ્વારા પોતાના સ્પેકટ્રમને વેચવાનું કાયદેસર છે.
વોડાફોન આઇડિયા અને ભારતી એરટેલે AGR લેણા ચૂકવવા માટે 15 વર્ષનો સમયગાળો માંગ્યો હતો. હજુ સુધી 15 ટેલિકોમ કંપનીઓ માત્ર 30,254 કરોડ રૂપિયા ચૂકવ્યાં છે, જ્યારે કુલ ચૂકવણી 1.69 લાખ કરોડ રૂપિયા છે.
શું હોય છે AGR
એડજસ્ટેડ ગ્રોસ રેવેન્યુ (AGR) સંદેશાવ્યવહાર મંત્રાલયના દૂરસંચાર વિભાગના (DoT) દ્વારા ટેલીકોમ કંપનીઓ પાસેથી લેવામાં આવનાર ઉપયોગ અને લાઇસન્સ ફી છે. જેના બે ભાગ હોય છે, સ્પેકટ્રમ ઉપયોગ ચાર્જ અને લાઇસન્સ ફી, જે ક્રમશ 3-5 ટકા અને 8 ટકા હોય છે.