દેશની સૌથી મોટી બેંક ભારતીય સ્ટેટ બેંકે ફિકસ્ડ ટર્મ ડિપોઝીટ પર વ્યાજ દરોમાં વધારો કરવાની જાહેરાત કરી છે. બેંકે 1 કરોડ રૂપિયાથી ઓછી ટર્મ ડિપોઝીટ પર વ્યાજ દરો વધારવાની જાહેરાત કરી છે.
સોમવારે બેંકે એવી જાણકારી આપી છે કે બેંક હવે એક વર્ષથી લઇને 3 વર્ષ સુધીના રિટેલ ડોમેસ્ટિક ટર્મ ડિપોઝીટ પર વધારે વ્યાજ આપશે.
SBI પ્રમાણે એક વર્ષથી લઇને 2 વર્ષ સુધી 1 કરોડ રૂપિયાથી ઓછા રિટેલ ડોમેસ્ટિક ટર્મ ડિપોઝીટ પર હવે તમને 6.65 ટકા વર્ષના દરથી વ્યાજ મળશે. પહેલાના 6.40 ટકાની સરખામણીમાં આ વધારે છે.
આ સાથે જ 2 થી 3 વર્ષના રિટેલ ડોમેસ્ટિક ટર્મ ડિપોઝીટ પર પણ વ્યાજના દર તમને પહેલાની સરખામણીએ વધીને 6.65 ટકા મળશે. પહેલા આ 6.60 ટકાના દરથી મળતો હતો.
SBIના આ નિર્ણયથી સૌથી વધારે લાભ વરિષ્ઠ નાગરિકોને મળશે. વરિષ્ઠ નાગરિકોને 1 કરોડ રૂપિયાથી ઓછી ડિપોઝીટ પર વધારે વ્યાજ મળશે.
હવે વરિષ્ઠ નાગરિકોને એક વર્ષથી 2 વર્ષના સમય માટે ફિક્સ્ડ ડિપોઝીટ પર 6.90 ટકાની જગ્યાએ 7.15 ટકા અને 2-3 વર્ષના સમય માટે 7.10 ટકાની જગ્યાએ 7.15 ટકા વ્યાજ આપવામાં આવશે. વધેલા દર સોમવારથી લાગૂ થઇ ચૂક્યા છે.