ગીર સોમનાથ: કોડીનારમાં SBI બેંકના કેશ ડિપોઝીટ મશીનમાં કુલદીપ ખેર નામના વ્યક્તિએ 2 હજારના દરની 29 નોટો કુલ રકમ 58 હજાર રૂપિયા જમા કરાવ્યા હતા. આ શખ્સે પોતાના ખાતામાં 1 મહિના પહેલા રૂપિયા જમા કરાવ્યા હતા. ત્યારે હવે આ ઘટનાની જાણ બેંકના અધિકારીઓને થતા પોલીસ સ્ટેશનમાં ફરિયાદ નોંધવામાં આવી હતી.
પોલીસે ઘટનાનો ગુનો નોંધી આરોપીની અટકાયત કરીને આગળની કાર્યવાહી હાથ ધરી છે. મહત્વનુ છે કે આરોપીએ 1 મહિના પહેલા બેંકમાં નકલી નોટો જમા કરાવી હતી. 1 મહિનો થયા બાદ તપાસ શરૂ કરવામાં આવતા બેંકના અધિકારીઓ સામે પણ સવાલ ઉઠ્યા છે.
કુલદીપ પાસે નોટો ક્યાંથી આવી?
કોડીનાર શહેરમાં આવેલી એસબીઆઈ બેંકની નજીકમા જ બેંકે ગોઠવેલા કેશ ડિપોઝીટ મશીન દ્વારા એકાદ મહિના પહેલા કોઈ શખ્સ દ્વારા પોતાના એકાઉન્ટમાં રૂપિયા 2 હજારના દરની 29 નકલી નોટો જમા કરાવી હતી. જેની જાણ બેંક અધીકારીઓને થતાં બેંકના નોડલ અધીકારીએ પોલીસને ફરીયાદ કરી હતી.
ગીર સોમનાથ પોલીસે તાત્કાલિક ફરિયાદ લઈને એ.એસ.પી. પ્રવીણ કુમારે ઘટનાની ત્વરિત તપાસ શરૂ કરી હતી. પ્રાથમીક તપાસ બાદ સુત્રાપાડાનાં પ્રાચી નજીકના ખેરા ગામના કુલદીપ ખેર નામના ગ્રાહકે આ નોટો જમા કરાવ્યાના આધાર પુરાવાઓ મળતાં પોલીસે કુલદીપ ખેરની ધરપકડ કરી છે.
આ બનાવ માં ખરેખર જવાબદાર કોણ છે ? કુલદીપ પાસે નોટો ક્યાંથી આવી? આ નકલી નોટોના કારોબાર નું મૂળ ક્યાં છે ? વગેરે પ્રશ્નોના જવાબ શોધવા પોલીસે કવાયત શરૂ કરી છે.