સ્ટેટ બેન્ક ઓફ ઇન્ડિયાના ક્રેડિટ કાર્ડ વિભાગનો IPO કોરોના મહામારીના ભયના ઓથાર હેઠળ ખૂલ્યો હતો. વૈશ્વિક મંદીને ધ્યાને લેતા રોકાણકારોનો ઉત્સાહ મંદ પડી ગયો હતો અને આખરે ડચકા ખાતા 775 રૂપિયાની ઓફર પ્રાઇસથી મુકાયેલો શેર માંડ 661 રૂપિયે એટલે કે 12.45%ના ડિસ્કાઉન્ટ સાથે ખૂલ્યો હતો.
16 તારીખે બપોરે 2 વાગે આ શેરનો ભાવ ટ્રેડિંગ દરમિયાન 703 રૂપિયા પહોંચ્યો હતો. આ ફટકા પાછળનું સૌથી મોટું કારણ કોરોના વાયરસને માનવામાં આવે છે જેના પગલે સમગ્ર દુનિયામાં બિઝનેસ સાયકલ અને સપ્લાય ચેઇન્સ ખોરવાઈ ગયા છે.
ભારતમાં કોરોના વાયરસની બિઝનેસ ઉપર અસર
ભારતમાં 100 થી વધુ કોરોનવાયરસના કેસ નોંધાયા છે અને 2 ના મોત થયા છે. કેટલાક રાજ્યોએ શોપિંગ મોલ્સ અને મુવી થીએટર બંધ રાખવાનો આદેશ આપ્યો છે જેથી વધુ લોકો એકસાથે ભેગા થવાનું ટાળી શકે.
નિષ્ણાતોના મતે રોકાણકારોમાં ભયનો માહોલ ફેલાયેલો છે જેથી તેઓ અસમંજસમાં છે. આ ઉપરાંત જો મોલ્સ અને દુકાનો બંધ રહેશે તો લોકોનો ખર્ચ ઘટશે જેથી અર્થતંત્ર વધુ નબળું પડે તેવી શક્યતા છે.
નોંધનીય છે કે SBI કાર્ડ IPO 755 રૂપિયાની શેરની ઓફર પ્રાઇસ સાથે 1.4 અબજ ડોલર રૂપિયાના રોકાણની અપેક્ષા રાખતો હતો જે દેશનો છેલ્લા 2 વર્ષનો સૌથી મોટો IPO છે. કંપનીએ ઓફર કરેલા શેર કરતા અધધ 22.45 ગણું બુકીંગ થયું હતું.
ભારતના GDPની વૃદ્ધિમાં પડેલા ગાબડાંના સમયગાળામાં આવેલા આ IPOને નિષ્ણાતો ખૂબ મહત્વનો ગણતા હતા. SBI કાર્ડ ઘણો સારો નફો રળી રહેલી કંપની છે જેની મુખ્ય આવક ક્રેડિટ કાર્ડની વ્યાજની ઇન્કમ અને ક્રેડિટ કાર્ડની ફી ઉપર આધારિત છે. 31 ડિસેમ્બર સુધીના આંકડા પ્રમાણે 9 મહિનામાં કંપનીનો રેવન્યુ 35% ઉછળીને 68.43 અબજ રૂપિયા સુધી પહોંચ્યો છે.