વાડ જ ચીભડા ગળે / સાયલા: દારૂના જથ્થાને પોલીસનું પાયલોટિંગ, વિજિલન્સની રેડમાં થયેલા ખુલાસાથી પોલીસ બેડામાં ખળભળાટ

• સાયલામાં દારૂનો ટ્રક ઝડપી પાડવાનો મામલો
• વાડ જ ચીભડા ગળે તેવો ઘાટ
• રાજકોટ ક્રાઇમ બ્રાંચના મહિલા PSIની સંડોવણી

દારૂબંધીની વાત આવે એટલે દેશ આખામાંથી સૌની નજર ગુજરાત તરફ જાય. ગુજરાતની રાજકીય ચર્ચાઓમાં એવા પણ આરોપ લાગે છે કે ગુજરાતમાં તો દારૂબંધી માત્ર નામની છે. બીજી તરફ પોલીસ દારૂ-જૂગાર સહિત વરલી મટકાના ચાલતા અડ્ડાઓ અને બૂટલેગરોને કાબૂમાં લેવા માટે અનેક નવા અભિયાનો પણ ચલાવે છે.IPS અધિકારી નિર્લિપ્ત રાયે પણ સ્ટેટ મોનિટરિંગ સેલનો હવાલો સંભાળતા જ એક્શન લીધી અને એક નંબર જાહેર કરીને લોકોને ફરિયાદ કરવા અપીલ પણ કરી છે પણ સુરેન્દ્રનગર સાયલામાં દારૂનો ટ્રક ઝડપવા મામલે વાડ જ ચીભડા ગળે તેવો ઘાટ સર્જાયો છે. ખુદ પોલીસ જ દારૂ ભરેલા કન્ટેનરને પેટ્રોલિંગ આપી સુરક્ષા પૂરી પાડતી હોવાની માહિતી સૂત્ર દ્વારા મળી રહી છે

દારૂના ટ્રકને પોલીસ પાયલોટિંગ
સુરેન્દ્રનગર સાયલામાં દારૂનો ટ્રક ઝડપી પાડવાનો મામલે આરોપ પ્રત્યારોપમાં મોટા ખુલાસા થઈ રહ્યા છે. વિજિલન્સની રેડમાં ચોંકાવનારી વિગતો સામે આવી છે જેમાં રાજકોટ ક્રાઇમ બ્રાંચના મહિલા PSIની ભૂમિકા તેમજ PSI ભાવના કડછાની સંડોવણી સામે આવી છે. PSI પોતાની ટીમ સાથે દારૂના ટ્રકને પાયલોટિંગ આપતા હતા. જેમાં દેવા દરજીયા ,ક્રિપાલસિહં અને ઉપેન્દ્રસિંહનું પણ નામ સામેલ છે. 

95 લાખના તોડની વિગતો આવી બહાર
સમગ્ર મામલે 95 લાખના તોડની વિગતો સામે આવી છે. હજુ પણ પૂછપરછમાં મોટા ખુલાસાઓ થઈ શકે છે મોટી માછલી કોણ છે તેના પર પણ સંકજો કસાઈ શકે છે, હાલ તો પોલીસ કર્મચારીઓને પોલીસ સ્ટેશન છોડવાની મનાઇ છે બીજી તરફ સમગ્ર બાબતે સાયલા પોલીસ મથકમાં પણ પૂછપરછ હાથ ધરાઇ છે.

શું છે સમગ્ર મામલો?
સુરેન્દ્રનગરના સાયલા હાઈવે પાસે રાજકોટ ક્રાઈમબ્રાંચે વોચ ગોઠવીને દારૂ ભરેલું કન્ટેન્ટર ઝડપી પાડ્યું હતું. જેમાં તપાસ કરતા રાજકોટ ક્રાઈમબ્રાંચના જ અધિકારીની સંડોવણી ખુલી છે. તેમાં પણ હાલમાં સાયલા પોલીસ અને રાજકોટ ક્રાઈમબ્રાંચ વચ્ચે હદ વિવાદ ચાલી રહ્યો છે. દારૂના કન્ટેનર આક્ષેપ પ્રતિ આક્ષેપ વચ્ચે સ્ટેટ મોનિટરિંગ સેલ સાયલા પહોંચ્યું છે.રાજકોટ ઇન્ચાર્જ પોલીસ કમિશનરે DCP ક્રાઇમને તપાસ સોંપી છે. કન્ટેનર ભરીને વિદેશી દારૂ કોણે મંગાવ્યો તે હજુ પણ મોટો સવાલ છે.

ગુજરાતમાં નિષ્ફળ દારૂબંધી? (વિધાનસભામાં રજૂ થયેલા આંકડા મુજબ)

• નશીલા પદાર્થ                      કિંમત
• વિદેશી દારૂ                         215 કરોડ 62 લાખ 52 હજાર
• દેશી દારૂ                            4 કરોડ 33 લાખ 78
• બીયરની બોટલ                   16 કરોડ 20 લાખ
• અફીણ,ચરસ,ગાંજો,હેરોઈન   370 કરોડ 
• અન્ય નશીલા દ્રવ્‍યો               606 કરોડ 41 લાખ 84 હજાર 847 

દારૂબંધીના કડક કાયદા છે તો દારૂની રેલમછેલ કેમ થાય છે?.દારૂબંધીના અભિયાનને આખરે નિષ્ફળ કોણ બનાવી રહ્યુ છે? કેમ પોલીસ જ દારૂના વેપલા પ્રોત્સાહન આપી રહી છે? દારૂ કોણે મંગાવ્યો અને કેમ પોલીસ પાયલોટિંગ આપી રહી હતી? શું પીએસઆઈ મહોરું છે કોઈ પોલીસના મોટા અધિકારી આ સમગ્ર લિન્ક ધરાવે છે અનેક સવાલો છે પણ જવાબ એક જ છે સાચી અને યોગ્ય તપાસ..

સુરેન્દ્રનગરમાં દારૂ ઝડપાવાનો મામલે અપડેટ (5:15 વાગ્યે)

• ઇન્ચાર્જ પોલીસ કમિશનર ખુરશીદ અહેમદે તપાસના આદેશ આપ્યા
• ક્રાઇમ બ્રાન્ચના ડીસીપી ડો.પાર્થરાજસિંહ ગોહિલને તપાસ સોંપાઈ
• ACP ક્રાઇમ બ્રાન્ચ, ડી.વી.બસિયાને સાયલા મોકલવામાં આવ્યા
• ટ્રકમાં લાગેલી હતી GPRS સિસ્ટમ, ટ્રક ક્યા પહોચી તે GSRS થી ટ્રેકિંગ થતુ હતુ
• પોલીસે GPRSની ચીપ કબ્જે કરી, તમામ એંગલથી તપાસ શરૂ