જો તમે નોકરિયાત છો અને ઇચ્છો છો કે નોકરી ઉપરાંત પણ 5-6 હજાર રૂપિયા સુધીની આવક થાય તો પોસ્ટ ઑફિસની એક ખાસ સ્કીમ તમારી આ ઇચ્છા પૂરી કરી શકે છે. જોકે આ સ્કીમમાં તમારે એકસાથે ઇન્વેસ્ટ કરવું પડશે અને આ સ્કીમમાં તમને દર મહિને મહત્તમ 5500 રૂપિયાની આવકની ગેરેન્ટી મળી જશે. આ સ્કીમનું નામ છે 'પોસ્ટ ઑફિસ મન્થલી ઇન્વેસ્ટમેન્ટ સ્કીમ'. આજે અમે તમને અહીં આ સ્કીમ વિશે વિસ્તારથી જણાવીશું...
પૉસ્ટ ઑફિસની આ સ્કીમ એવા રોકાણકારો માટે છે જેઓ એકસાથે રૂપિયા રોકી માસિક વ્યાજ મેળવવા માગે છે. આ યોજના રિટાયર્ડ કર્મચારીઓ અને વરિષ્ઠ નાગરિકો માટે ખૂબ જ ઉપયોગી સાબિત થઇ શકે છે. આ ખાતામાં મેચ્યોરિટી પીરિયડ પાંચ વર્ષનો છે. આમાં ખાતાધારકને જમા રકમ પર દર મહિને વ્યાજ મળે છે. આ ખાતું 1500 રૂપિયા અથવા તો તેના ગુણાંકોમાં ખોલાવી શકાય છે. હાલના સમયમાં આ સ્કીમ 7.3 % વ્યાજ મળે છે. આ વાર્ષિક વ્યાજને 12 મહિનામાં વહેંચી દેવામાં આવે છે. જે તમને માસિક આધારે મળતું રહે છે.
પૉસ્ટ ઑફિસની મંથલી ઇન્વેસ્ટમેન્ટ સ્કીમમાં દેશનો કોઇપણ નાગરિક ખાતું ખોલાવી શકે છે. તમે તમારા બાળકના નામ પરથી પણ ખાતું ખોલાવી શકો છો. જો આ બાળકની ઉંમર 10 વર્ષથી ઓછી હોય તો તેના નામ પર માતા-પિતા અથવા તો કાયદાકીય વાલી તરફથી ખાતુ ખોલાવી શકાય છે. 10 વર્ષની ઉંમર બાદ બાળક પોતે એકાઉન્ટ ખોલાવવાની અને તેના સંચાલનનો અધિકાર મેળવી શકે છે.
આ ખાતું સિંગલ અથવા જોઇન્ટ બંને રીતે ખોલાવી શકાય છે. બંનેની જમા રકમની મર્યાદા અલગ-અલગ છે. સિંગલમાં મહત્તમ રોકાણ 4.5 લાખ જ્યારે જૉઇન્ટ ખાતામાં રોકાણ 9 લાખ રૂપિયા સુધીનું છે.
જો તમે ખાતામાં 9 લાખ રૂપિયા એકસાથે જમા કરવાશો તો આશરે 65700 વ્યાજ વાર્ષિક મળશે. આ રીતે તમે દર મહિને આશરે 5500 રૂપિયાની આવક થશે. એટલું જ નહીં તમારા 9 લાખ રૂપિયાની મેચ્યોરિટી પીરિયડ પછી બોનસની સાથે પરત કરવામાં આવશે.