નેશનલ ગેમ્સમાં હોકી મેચ રમાય તે પૂર્વે સૌરાષ્ટ્ર યુનિવર્સિટીના હોકી ગ્રાઉન્ડને નુકસાન થયું છે. કોઇ વિઘ્ન સંતોષીઓએ હોકીના એસ્ટો ટર્ફ ગ્રાઉન્ડમાં નુકસાની કરતા સૌરાષ્ટ્ર યુનિવર્સિટીના કેમ્પસની સુરક્ષા પર મોટો સવાલ ઊભો થયો છે.
સૌરાષ્ટ્ર યુનિવર્સિટીના હોકી ગ્રાઉન્ડમાં નુકસાન
નેશનલ ગેમ્સમાં હોકીની મેચ રમાય તે પૂર્વે ગ્રાઉન્ડમાં નુકસાન
કુલપતિએ પોલીસ કાર્યવાહીના આપ્યા આદેશ
કોરોના સહિતના વિવિધ કારણોસર હવે 7 વર્ષના અંતરાલ પછી નેશનલ ગેમ્સનું આયોજન ગુજરાતમાં થવા જઈ રહ્યું છે. આગામી 27મી સપ્ટેમ્બરે અમદાવાદના નરેન્દ્ર મોદી સ્ટેડિયમ (Narendra Modi Stadium)માં નેશનલ ગેમ્સનો ભવ્ય ઉદ્ધાટન સમારોહ યોજાશે. ગુજરાતના ગાંધીનગર, અમદાવાદ, વડોદરા, રાજકોટ, સુરત અને ભાવનગરમાં આ રમતોત્સવની વિવિધ સ્પર્ધાઓ યોજાશે. જેમાં દેશના 36 રાજ્યો અને કેન્દ્રશાસિત પ્રદેશોના અંદાજે 8000 કરતા વધારે ખેલાડીઓ વિવિધ રમતોમાં પોતાનું કૌશલ્ય ઝળકાવશે.
નેશનલ ગેમ્સમાં હોકી મેચ રમાય તે પૂર્વે ગ્રાઉન્ડને નુકસાન
36મી નેશનલ ગેમ્સમાં રાજકોટ બે રમતની યજમાની કરી રહ્યું છે. રાજકોટમાં સ્વિમિંગ અને હોકીની રમત રમાશે. હોકીની રમત રેસકોર્સ અને સૌરાષ્ટ્ર યુનિવર્સિટીના એસ્ટો ટર્ફ ગ્રાઉન્ડમાં રમાડવાનો નિર્ણય કરાયો છે. 8 હોકી ટીમો હોકીની મેચ રમવા રાજકોટ આવવાની છે. ત્યારે શુક્રવારે રાત્રે કોઈ અજાણ્યા શખ્સોએ હોકીના ગ્રાઉન્ડને નુકસાની પહોંચાડી હતી. અજાણ્યા શખ્સો ધારદાર વસ્તુથી એસ્ટો ટર્ફ આશરે દોઢથી બે ફૂટ જેટલું ચીરી નાખ્યું હતું.
કુલપતિએ પોલીસ કાર્યવાહીના આપ્યા આદેશ
જે બાદ યુનિવર્સિટી દ્વારા ગત સાંજે ગ્રાઉન્ડ રીપેર કરાવી કેમ્પસમાં સુરક્ષા તૈનાત કરાઇ કરવામાં આવી છે. આ ઉપરાંત ગ્રાઉન્ડના ગેટ પર તાળા મારવામાં આવ્યા છે. આ ઉપરાંત યુનિવર્સિટીના કુલપતિએ તાત્કાલિક પોલીસ કાર્યવાહીના આદેશ આપ્યા છે. એવું કહેવામાં આવી રહ્યું છે કે, સૌરાષ્ટ્ર યુનિ.ના હોકી ગ્રાઉન્ડને નુકસાન થતા હવે રેસકોર્સમાં મેચ રમાડવા
દરખાસ્ત કરાઈ છે. મહત્વનું છે કે, સૌરાષ્ટ્ર યુનિવર્સિટીના વહીવટી તંત્ર દ્વારા ગ્રાઉન્ડમાં નુકસાન થયા બાદ તાળા મારવામાં આવ્યા છે. પરંતુ જો પહેલાં જ તાળા મારી દીધા હોત તો આવી નુકસાની ન થાત.
શુક્રવારે હોકી ગ્રાઉન્ડનું કરાયું હતું નિરીક્ષણ
અત્રે ઉલ્લેખનીય છે કે, શહેરના બે મેદાન રેસકોર્સ સ્થિત મેજર ધ્યાનચંદ એસ્ટો ટર્ફ ગ્રાઉન્ડ અને સૌરાષ્ટ્ર યુનિવર્સિટીના એસ્ટો ટર્ફ ગ્રાઉન્ડ પર નેશનલ ગેમ્સની હોકીની રમત રમાડવાના નિર્ણય બાદ બંને મેદાનની અસુવિધાઓને દૂર કરવા માટે સ્પોર્ટસ ઓથોરિટી ઓફ ઇન્ડિયા (સાઇ), સ્પોર્ટસ ઓથોરિટી ઓફ ગુજરાત (એસએજી) અને મહાનગરપાલિકાના અધિકારીઓ દ્વારા કામગીરીનો ધમધમાટ શરૂ કરાયો હતો. શુક્રવારે સૌરાષ્ટ્ર યુનિવર્સિટીના હોકી ગ્રાઉન્ડનું સાઇના ડિરેક્ટર અને હોકી ઇન્ડિયાના પદાધિકારીઓ નિરક્ષણ કરવામાં આવ્યું હતું.