સૌરાષ્ટ્ર યુનિવર્સિટી એક વાર ફરી વિવાદોમાં આવી છે. જેમા યુનિવર્સિટીમાં કામ કરતા કર્મચારીએ વિદ્યાર્થીનીની ખોટી ઓળક આપી તેને ફોન અને મેસેજ કરીને તેની છેડતી કરી હોવાનું સામે આવ્યું છે.
સૌરાષ્ટ્ર યુનિવર્સિટી ફરી વિવાદોમાં
કોન્ટ્રાક્ટ પર કામ કરતા કર્મચારીએ વિદ્યાર્થિનીની છેડતી કરી
ખોટું નામ આપી ફોન કરીને વિદ્યાર્થિનીને રવિવારે યુનિવર્સિટી બોલાવી
રાજકોટની સૌરાષ્ટ્ર યુનિવર્સિટી અવારનવાર કોઈને કોઈ બાબતે વિવાદોમાં રહેતી હોય છે. ત્યારે વધુમાં ફરી વખત સૌરાષ્ટ્ર યુનિવર્સિટી વિવાદોમાં આવી છે. જેમા યુનિવર્સટીના કર્મચારીએ એક વિદ્યાર્થિનીને હેરાન કરી હોવાનું સામે આવ્યું છે. જેના કારણે યુનિવર્સિટીમાં હવે વિદ્યાર્થીનીઓની સુરક્ષાને લઈને ગંભીર સવાલો ઉઠી રહ્યા છે.
ફોર્મ ચકાસણીના બહારે યુવતીને ફોન મેસેજ કર્યા
એક્સટર્નલમાં અભ્યાસ કરતી વિદ્યાર્થીનીને કર્મચારીએ બદ ઈરાદે ફોન કરીને બોલાવી હતી અને તેને હેરાન કરી હતી. સાથેજ તેણે ફોર્મ ચકાસણીના નામે યુવતીને ફોન અને મેસેજ પણ કર્યા હતા. જેથી આ સમગ્ર મામલે યુનિવર્સિટી હવે ફરિ વિવાદોમાં આવી છે.
વિદ્યાર્થિનીની ફોન કરીને બોલાવી
આપને જણાવી દઈએ કે ભાવિન નામના કર્મચારીએ યુવતીને ખોટા નામે મેસેજો મોકલ્યા હતા. જેમા તે રૂદ્ર નામ આપીને વિદ્યાર્થીનીને મેસેજ કરતો હતો. ઉપરાંત તેણે વિદ્યાર્થીનીને ફોન કરીને રવિવારે બોલાવી પણ હતી. જેથી આ સમગ્ર મામલે પછી વિદ્યાર્થીનીએ કંટાળીને યુનિવર્સિટીમાં ફરિયાદ કરી ત્યારે યુનિવર્સિટી એકશનમાં આવી હતી.
યુનિવર્સિટી કર્મચારીને બરતરફ કર્યો
સમગ્ર મામલે વિદ્યાર્થીએ અને તેમના માતાપિતાએ યુનિવર્સિટીમાં ફરિયાદ કરી હતી. ફરિયાદ મળતાની સાથે કર્મચારીને બરતરફ કરી દેવામાં આવ્યો છે. કર્મચારી ભાવીન યુનિવર્સિટીમાં કોન્ટ્રાક્ટ બેઝ પર નોકરી કરી રહ્યો હતો. પરંતુ તેની કરતૂતને કારણે આજે તેને નોકરી ગુમાવાનો વારો આવ્યો છે.
અગાઉ પણ ભારે વિવાદ થયો હતો
ઉલ્લેખનીય છે કે અગાઉ પણ યુનિવર્સિટીમાં કાયદા ભવનના હેડ સામે એક વિદ્યાર્થીનીએ દુષ્કર્મની ફરિયાદ દાખલ કરી હતી. જેમા યુવતીએ ફરિયાદમાં એવો ઉલ્લેખ કર્યો હતો કે PHD પાસ કરાવી આપવાની લાલચે કાયદા ભવનના હેડે દુષ્કર્મ આચર્યું છે. સાથેજ તેણે એવો પણ આક્ષેપ કર્યો છેત તેને અધ્યાપક બનાવાની પણ લાલચ આપવામાં આવી હતી.