આગામી 48 કલાકમાં ગુજરાતના સૌરાષ્ટ્ર અને દક્ષિણ ગુજરાતમાં હળવાથી ભારે વરસાદની આગાહી કરવામાં આવી છે. આ વચ્ચે સૌરાષ્ટ્રના અનેક જિલ્લાઓ અને કચ્છમાં ભારે વરસાદ ખાબક્યો છે. ગીર સોમનાથ, અમરેલી અને જામનગરની નદીઓ બે કાંઠે વહેતી થઇ છે. તો ભારે વરસાદથી ખેડૂતોમાં ખુશીનો માહોલ જોવા મળી રહ્યો છે.
સૌરાષ્ટ્ર-કચ્છમાં ધોધમાર વરસાદ
રાજ્યમાં અનેક જગ્યાએ મેઘરાજાની એન્ટ્રી
આવનારા ચાર દિવસ ગુજરાતમાં વરસાદની સંભાવના
સૌરાષ્ટ્રમાં મેઘરાજાની ધમાકેદાર એન્ટ્રી જોવા મળી છે. તો કચ્છ જિલ્લામાં ગાજવીજ સાથે ભારે વરસાદ વરસ્યો હતો. મુંદ્રા સહિતના વિસ્તારોમાં ધોધમાર વરસાદ ખાબક્યો છે. ગીર સોમનાથ જિલ્લામાં ભારે વરસાદ ખાબક્યો હતો. જેમાં તાલાલામાં 2 ઈંચ, ગીર ગઢડા તાલુકામાં 1 ઈંચ, પોરબંદરના કુતિયાણામાં પણ 2 ઇંચ વરસાદ પડ્યો હતો. ભારે વરસાદથી તાલાલા ગીરની હિરણ નદીમાં નવા નીર આવ્યા છે. તાલાલા શહેરના મુખ્ય માર્ગો પર વરસાદી પાણી ફરી વળ્યાં છે.
અમરેલી પંથકમાં મેઘો મંડાયો
અમરેલીના ખાંભા, ગીર અને વડિયા પંથકમાં ધોધમાર વરસાદ પડ્યો છે. ખાંભાના નાનુડી, ઉમરીયા, ભાડ ગામે વરસાદ આવ્યો છે. ભારે વરસાદના કારણે ખાંભામાં આવેલી નદીમાં પૂર આવ્યું છે. તો મિતીયાળા જંગલ વિસ્તારમાં પણ ભારે વરસાદ વરસ્યો છે.
અરજનસુખ ગામમાં ખેતરમાં રહેલું ટ્રેકટર તણાયું
અમરેલીના રામપુર સહિતના આજૂબાજૂના ગામોમાં ધોધમાર વરસાદ થયો છે. બીજા દિવસે ધોધમાર વરસાદ થયો છે. વડિયા, ખાખરીયા, અરજનસુખમા વરસાદ થયો છે. અરજનસુખ ગામમાં ખેતરમાં રહેલું ટ્રેકટર પણ તણાઇ ગયું હતું.
અમરેલીના રામપુર સહિતના આજૂબાજૂના ગામોમાં ધોધમાર વરસાદ થયો છે. બીજા દિવસે ધોધમાર વરસાદ થયો છે. વડિયા, ખાખરીયા, અરજનસુખમા વરસાદ થયો છે. અરજનસુખ ગામમાં ખેતરમાં રહેલું ટ્રેક્ટર પણ તણાઇ ગયું હતું. pic.twitter.com/tLSBYIKCtP
— VTV Gujarati News and Beyond (@VtvGujarati) June 11, 2020
સાવરકુંડલામાં નદી-નાળા છલકાયા
તો સાવરકુંડલાના ધજડીમાં ધોધમાર વરસાદથી નદી-નાળા છલકાયા છે. સાવરકુંડલાના ધજડીમાં ધોધમાર વરસાદ થયો છે. ભારે વરસાદથી નદી નાળા છલકાયા છે. નદીમાં પુર આવતા લોકો જોવા ઉમટ્યા છે. નદીમાં પાણીનો ધસમસતા પ્રવાહ જોવા મળ્યો છે.
ગોંડલમાં 6ઠ્ઠા દિવસે મેઘરાજા મહેરબાન
રાજકોટના ગોંડલ શહેરમાં પણ ગોંડલમાં સતત છઠ્ઠા દિવસે મેઘરાજા મહેરબાન થયા છે. વાદળછાયા વાતાવરણ વચ્ચે ધીમીધારે વરસાદ પડ્યો હતો. તો બોટાદના ગઢડા પંથકમાં ધોધમાર વરસાદ પડ્યો છે. આઠ દિવસથી સતત ગઢડા શહેર તેમજ ગ્રામ્યમાં ગાજવીજ સાથે વરસાદથી ખેડૂતોમાં ખુશી જોવા મળી રહી છે.
પોરબંદરના બરડા પંથકમાં ધોધમાર વરસાદ
પોરબંદરના બરડા પંથકમાં છેલ્લા 4 દિવસથી સતત વરસાદ થયો છે. અડવાણા, ભેટકડી, પરવાળા, બગવદર, ટાણા, શીંગડા, સીમર, બખરલા, કાટવાણા, ગોઢાણા, સોઢાણા સહિતના ગામોમાં ધોધમાર વરસાદ છે. જેમાં અંદાજીત 3થી 4 ઈંચ જેટલો વરસાદ થયો છે. ધોધમાર વરસાદ પડતાં ખેતરોમાં પાણી ભરાયા છે. સીમર ગામના વોકળામાં પાણી આવ્યુ છે.
દ્વારકાના જામખંભાળીયામાં ધોધમાર વરસાદ
દ્વારકાના જામખંભાળીયામાં ધોધમાર વરસાદ થયો છે. ખંભાળીયા પાસેના ભટ્ટગામ ગામે ધોધમાર વરસાદ થતા ચેકડેમો છલકાયા ગયા છે. રકા ખટિયા ગામે નદી બે કાંઠે થઇ છે. તો મોટી ખોખરી, ભાણ ખોખરી, ભીંડા, ફોટ, ગુંદા, વડત્રા, દાત્રાણા, સોનારડી, રકા ખટિયા સહિતના ગામે ભારે વરસાદ થયો છે. 2 ઇંચથી વધુ વરસાદ વરસ્યો છે.