હાલ સમગ્ર ગુજરાતમાં બાબા બાગેશ્વરનો જયજયકાર થઈ રહ્યો છે. ત્યારે બાબા સાથે તેઓનો પડછાયો બનીને રહેતા પૂર્વ મંત્રીનો બાબા ઉદ્ધાર કરશે કે નહી તે આવનારા સમયમાં ખબર પડશે. ભાજપ પ્રદેશ પ્રમુખ ફરી એક્શન મોડમાં આવી ગયા છે. અને છેલ્લા 9 વર્ષથી મોદી સરકારે કરેલ કામો લોકો સુધી પહોંચાડવાનું અભિયાન હાથ ધર્યું છે.
સૌરાષ્ટ્ર ભાજપની કારોબારીમાં ‘બિન બુલાયે મહેમાનની’ એન્ટ્રી.
રાજકોટમાં સૌરાષ્ટ્ર ભાજપની પ્રદેશ કારોબારી યોજાઈ ગઈ. અપેક્ષિત હોદ્દેદારોની આ બેઠકમાં અચાનક એક મહાશય પધાર્યા. વણનોતર્યા આ મહેમાનને જોઈ સૌ અંચબિત થઈ ગયા. કારણ કે સૌરાષ્ટ્ર ઝોનના MLA, MP અને સંગઠનના મુખ્ય હોદ્દેદારોએ જ આ બેઠકમાં ઉપસ્થિત રહેવાનું હતું. વગર અપેક્ષાએ હાજરી પુરાવનારા આ વ્યક્તિ ભાજપના એક મોટા રાજનેતાના અંગત મદદનીશ છે. અંગત મદદનીશની આગળ પડતી હાજરીથી અનેક લોકો માનો કે ડઘાઈ ગયા. સૌનો સવાલ હતો કે વરિષ્ઠ નેતાના અંગત મદદનીશ આ બેઠકમાં શું કરી રહ્યા છે ? એ વાત જુદી છે કે કોઈએ ઉભા થઈને ભાજપમાં મોટા ગણાતા નેતાના પર્સનલ આસિસ્ટન્ટને પૂછવાની હિંમત ના કરી. હવે વાત એવી મળી છે કે રાજકીય નેતાના આ અંગત મદદનીશ ‘રાજનીતિની પારી’ રમવા ઉત્સુક છે. વિધાનસભાની ચૂંટણીમાં ટિકિટનો મેળ તો ના પડ્યો, હવે મદદનીશશ્રી ભાજપમાં કોઈ મોટા હોદ્દા માટે મથી રહ્યા છે. આ બેઠકમાં પ્રદેશમાંથી રજની પટેલ અને ડૉ. ભરત બોઘરા વિશેષ હાજર રહ્યા હતા. તો શું એમનું ધ્યાન આ ‘વિશેષ’ ઉપસ્થિતિ તરફ ના ગયું કે તેમણે પણ મૌન રહેવામાં જ ઉચિત સમજ્યું તેવો ગણગણાટ પણ છે. સૌરાષ્ટ્ર પ્રદેશ કારોબારી પૂર્ણાહુતિ પછી ભાજપના સ્થાનિક અગ્રણીએ બળાપો કાઢતા કહ્યું કે ‘મારી પાસે પક્ષમાં સૌરાષ્ટ્ર કચ્છની ચોકક્સ જવાબદારી છે પણ હું પણ અપેક્ષિત નહોતો તેથી ના ગયો’. સૌરાષ્ટ્ર ભાજપમાં ચર્ચા ચાલી છે કે કારોબારીમાં વગર અપેક્ષાએ ‘એન્ટ્રી’ મારાનારા આ મદદનીશ પક્ષમાં ઉચ્ચ હોદ્દા પર હવે ક્યારે એન્ટ્રી મારશે ?
રાજકોટ ભાજપના રાજકારણમાં ‘પશ્ચિમનો સૂરજ’ આથમ્યો, હવે ‘પૂર્વનો ઉદય’
રાજકોટ પૂર્વ અને પશ્ચિમના વિસ્તારની તાસીર અને તસવીર બંને હંમેશાથી અલગ રહી છે. જનથી લઈ જનપ્રતિનિધિઓના મિજાજમાં પણ પૂર્વ-પશ્ચિમનો ભેદ વર્તાઈ આવે છે. એવું કહેવાય છે કે સૂર્ય પૂર્વથી ઉગે છે પરંતુ વર્ષો સુધી રાજકોટ ભાજપમાં સત્તાનો સૂર્ય પશ્ચિમથી ઉગતો રહ્યો. પક્ષની સ્થાપના સમયથી માંડી અનેક ચૂંટણીઓમાં પશ્ચિમના નેતાઓનું તેજ અન્યોને આંજી કે ઢાંકી દેતું હતું પરંતુ હવે સમય બદલાયો છે. રાજકોટ ભાજપમાં હવે સૂર્ય પૂર્વથી ઉગે છે. વિધાનસભા 2022ની ચૂંટણી પછી તો રાજકોટ પૂર્વના નેતા અને તેમના જૂથોનું તેજ દિવસને દિવસે વધી રહ્યું છે. અત્યાર સુધી દમદાર ગણાતાં પશ્ચિમના નેતાઓમાં હવે ચિંતા પેઠી છે કે આમ જ ‘હાલતું’ રહ્યું તો લોકસભા ચૂંટણી સુધીમાં પૂર્વના નેતાઓના તપતા ’મધ્યાહન’માં ક્યાંક કરમાઈ નો જવાય !
ગુજરાત કૉંગ્રેસ પ્રમુખની રેસમાં હવે આ નેતાજી પણ !
વિધાનસભામાં ઘોર પરાજયની ધોબી પછડાટ પછી કૉંગ્રેસને કળ વળી કે નહીં તેની ખબર નહીં, પરંતુ પક્ષના કેટલાક નેતાઓ ખુરશી માટે ફરી મેદાનમાં ઉતરવા તૈયાર થઈ ગયા છે. જો કે ખુરશી આગામી લોકસભાના સાંસદની નહીં પણ પ્રદેશ પ્રમુખ પદની છે. પ્રદેશ પ્રમુખ બનવાની રેસમાં વધુ એક નામનો ઉમેરો થયાનું ચર્ચાઈ રહ્યું છે. પક્ષમાં શિક્ષિત, બુદ્ધિજીવી વર્ગમાં સમાવિષ્ટ થતાં એક નેતાજી પણ આ રેસમાં ઉતર્યા છે. અગાઉના પ્રમુખોની ચૂંટણીમાં કેવા ‘બ્લન્ડર’ થયા અને શું ‘રીઝલ્ટ’ આવ્યા તેનું એક રૂપકડું પ્રેઝન્ટેશન ઉપર સુધી તેમણે પહોંચાડ્યું હોવાના સંદેશા વહેતા થયા છે. સ્ટ્રેટેજી, એડમિનિસ્ટ્રેશન, એક્સપર્ટાઈઝ અને પ્રેઝન્ટેશનના કૌશલ્યમાં મહારથી હોવાનું માનતા નેતાજીએ નવા કપડા પણ સીવડાવી લીધા છે. પરંતુ રાજીવ ગાંધી ભવનમાં કેટલાક નેતાઓ છાનાખૂણે ગુજરાતમાં તેમના ટ્રેક રેકોર્ડનો હળવેકથી ઉલ્લેખ કરી રહ્યા છે. 2021ની સ્થાનિક સ્વરાજની ચૂંટણીઓમાં તેમની આગેવાનીમાં શું પરિણામ આવ્યા તે આગળ કરી નેતાજીની મહેનત પર પોતું મારવાનું કામ એક જૂથે શરૂ કરી દીધું છે. દેશના અન્ય રાજ્યોમાં નિર્ણાયક ભૂમિકા ભજવતાં નેતાજીનું ગુજરાતમાં કાર્યકરોમાં વજન નહીં હોવાનું નેતાઓ ચર્ચી રહ્યા છે. જો કે અહીં વાત મહત્વની એ છે કે પ્રદેશ પ્રમુખની ખુરશી માટે તેમનું વજન કેટલું પડે છે !
બાબા કરશે નેતાજીનો ઉદ્ધાર ?
આજકાલ ગુજરાતમાં બાબા બાગેશ્વરવાળા ધીરેન્દ્ર શાસ્ત્રીનો ચારેબાજુ જયજયકાર ગૂંજી રહ્યો છે. લોકોનો ઉદ્ધાર કરતાં બાબા પોતાનો ઉદ્ધાર પણ કરી દેશે તેવી ગણતરીથી નેતાઓ બાબાની સેવામાં લાગી ગયા છે. અગાઉની સરકારના હાઈપ્રોફાઈલ પૂર્વ મંત્રીશ્રીએ પણ દરબાર બહાર પોતાના મોટા મોટા ફોટાવાળા પોસ્ટર લગાવી દીધા. હેતુ એવો કે એક સમયના મતદારો બાબાની સાથે એમના પણ દર્શન કરી લે. પૂર્વમંત્રી શ્રી બાબા સાથે કારથી લઈ સ્ટેજ સુધી પડછાયાની જેમ રહ્યાં. જો કે એક સમયે સિક્યોરીટીના અભેદ ચક્રના કેન્દ્રમાં ઘેરાયેલા આ મંત્રીજીને બાબાની પાછળ પાછળ ચાલવું પડ્યું, એટલું જ નહીં સત્તા પરથી ઉતર્યા પછીનો અનુભવ પણ તેમને પ્રાપ્ત થઈ ગયો. સ્ટેજ પરથી નીચે ઉતરી રહેલા બાબાના નજીકના દર્શન માટે ભક્તો એટલા અધીરાં થયા કે મંત્રીશ્રી સ્વૈચ્છાએ બાજુમાં થઈ ગયા, જાણે કે સાઈડલાઈન થવાના ખરાં મતલબનો અર્થ સમજાઈ ગયો હોય.
સી.આર. પાટીલ ફરી ઈલેક્શન મોડમાં !
લોકસભા ચૂંટણીને તો હજુ મહિનાઓની વાર છે પરંતુ ભાજપ પ્રદેશ પ્રમુખ સી. આર. પાટીલ એક્શન મોડમાં આવી ગયા છે. લોકસભા સુધીમાં માત્ર ઘર ઘર નહીં પરંતુ દરેક મોબાઈલ સુધી પહોંચવાની તેમણે કવાયત શરૂ કરી દીધી છે. થોડા દિવસ પૂર્વે સુરતની એક ફાઈવ સ્ટાર હોટેલમાં એક વિશેષ વર્ગનું આયોજન થયું હતું. સોશિયલ મીડિયામાં હજારો લાખો લોકો સુધી પહોંચાતા 100 જેટલા સોશિયલ મીડિયા ઈન્ફ્લુએનસરને પાટીલ મળ્યા. છેલ્લા 9 વર્ષમાં મોદી સરકારે કેવી કેવી સિદ્ધિઓ મેળવી છે, લોક કલ્યાણના શું કામો થયા છે તેની રજેરજની માહિતી તેમણે આપી. આ માહિતીને લોકો સુધી લઈ જવાની રણનીતિ પણ બેઠકમાં સમજાવી. આમ ફરી એકવાર સી. આર. પાટીલે ચૂંટણી માટેની આગોતરી તૈયારી શરૂ કરી દીધી છે. આગામી થોડા સમયમાં સોશિયલ મીડિયામાં કેટલાક જાણીતાં ચહેરાઓની સરકારની સિદ્ધિઓ ભરેલી રીલ્સ, શોર્ટસ કે વિડિયો તમારા મોબાઈલ પર દેખાય તો નવાઈ પામતા નહીં.