મેઘરાજાએ આણંદના બોરસદ અને જૂનાગઢના વિસાવદરમાં ધડબડાટી બોલાવી છે. એવામાં હવામાન વિભાગે 4થી 7 તારીખ સુધીમાં દ. ગુજરાત અને સૌરાષ્ટ્રમાં સારા એવા વરસાદની આગાહી કરી છે.
તાજેતરમાં જ રાજ્ય (Gujarat) માં આણંદના બોરસદમાં 11 ઇંચથી વધુ વરસાદ ખાબકતા સમગ્ર બોરસદમાં જળબંબાકારની પરિસ્થિતિ સર્જાઈ હતી. બીજી બાજુ જૂનાગઢના વિસાવદરમાં 6 અને કોયલીમાં 4 ઇંચ વરસાદ ખાબકતા નીચાણવાળા વિસ્તારો પાણીમાં ગરકાવ થઈ ગયા હતા. એવામાં હવામાન વિભાગે રાજ્યમાં હજુ ચાર દિવસ વરસાદની આગાહી કરી છે.
રાજ્યમાં આજે સાર્વત્રિક વરસાદ પડી શકે છે
હવામાન વિભાગે આગાહી કરતા જણાવ્યું કે, 'રાજ્યમાં આજે સાર્વત્રિક વરસાદ પડી શકે છે. 4થી 7 તારીખ સુધીમાં દક્ષિણ ગુજરાત અને સૌરાષ્ટ્રમાં સારા વરસાદની શક્યતા સેવવામાં રહેલી છે. મધ્ય ગુજરાતમાં પણ એકંદરે સારા વરસાદની શક્યતા રહેલી છે.'
ગુજરાતના 143 તાલુકામાં વરસાદ મન મૂકીને વરસ્યો
ઉલ્લેખનીય છે કે, રાજ્યમાં એક જ દિવસની અંદર ગુજરાતના 143 તાલુકામાં વરસાદ મન મૂકીને વરસ્યો છે. જેમાં સૌથી વધુ વરસાદ વાંસદામાં ખાબક્યો છે. વાંસદામાં 5 ઈંચ વરસાદ જયારે ખંભાળીયામાં 4.5 ઈંચ વરસાદ વરસ્યો છે. જ્યારે ખેરગામ, વિરપુર, જૂનાગઢ અને વંથલીમાં પણ સારો એવો વરસાદ વરસ્યો છે. તો માળીયા, માંડવી, વાપી, નવસારી, તાલાળા અને ઉમરગામમાં પણ વરસાદે રમઝટ બોલાવી.
જણાવી દઇએ કે, આણંદ જિલ્લાના બોરસદમાં શુક્રવારે આભ ફાટતાં બાર ઈંચ જેટલો વરસાદ ખાબક્યો હતો. જેને લઈ ઠેરઠેર જળબંબાકારની પરિસ્થિતિ સર્જાઈ હતી. બોરસદના સિસ્વા ગામે તારાજી સર્જાઈ છે. વરસાદે સમગ્ર આણંદ જિલ્લાને બાનમાં લીધું હતું. તેમાં પણ સૌથી વધુ વરસાદ જો ક્યાંય થયો હોય તો તે બોરસદ છે. બોરસદમાં 12 ઈંચથી વધુ વરસાદ થતાં સિસ્વા ગામ બેટમાં ફેરવાયું હતું. બોરસદ તાલુકામાં ભારે વરસાદના કારણે નીચાણવાળા વિસ્તારો પાણીમાં ગરકાવ થઈ ગયા છે. સમગ્ર બોરસદ તાલુકો પાણી-પાણી થઈ ગયો છે. વરસાદે સિસ્વા ગામના લોકોનો આશરો પણ છીનવી લીધો. અહીં અંદાજે 300થી વધુ લોકોનું રેસ્ક્યૂ કરવામાં આવ્યું. વરસાદના કારણે આણંદ જિલ્લાના 300થી વધુ ગામ પ્રભાવિત થયાં છે. જેમાં સૌથી વધુ સિસ્વા ગામમાં અસર થઇ છે. ભારે વરસાદથી ખેતરોમાં પણ પાણી ભરાયા છે. આથી NDRFની ટીમને કામે લગાડવામાં આવી.
સિસ્વા ગામનું એક પણ મકાન એવું નથી રહ્યું જ્યાં પાણી ન ભરાયું હોય
સિસ્વા ગામની સ્થિતિ વર્ણવી શકાય તેમ નથી. 12 ઈંચ વરસાદ બાદ બોરસદનું તળાવ ઓવરફ્લો થયું અને સિસ્વા ગામમાં પાણીનો ભરાવો થઈ ગયો. સિસ્વા ગામ સમુદ્રમાં ફેરવાઈ ગયું હોય તેવા દ્રશ્ય દેખાઈ રહ્યા છે. ગામમાં ક્યાંક કેડ સમા તો ક્યાંક છાતિ સમા પાણી ભરાયા છે. સિસ્વા ગામનુ એક પણ મકાન એવું બાકી નહીં રહ્યું હોય જ્યાં પાણી નહીં ભરાયા હોય. લોકો પાસે બે દિવસથી ખાવા માટે અનાજ નથી.
લોકો રોડ પર ઝૂંપડા બાંધીને રહેવા મજબૂર
રોડની સાઈડમાં બાંધેલા આ ઝૂંપડા દર્શાવે છે કે લોકો બેઘર થઈ ગયા છે. વરસાદ એવી તો આફત લઈને આવ્યો કે લોકોને પોતાનો આસરો છોડીને ઉંચાણવાળા વિસ્તારમાં રોડની સાઈડમાં ઝૂંપડા બાંધીને રહેવાનો વારો આવ્યો. આ ગરીબ પરિવારનું પાણીમાં બધુ જ છીનવાઈ ગયું.
સિસ્વા ગામે પૂરમાં એક યુવકનું મૃત્યુ, ગરીબ લોકોને આપવા જોતો હતો ભોજન
સિસ્વા ગામમાં ભારે વરસાદ અને પૂર સમયે એક યુવક પણ તણાઈ ગયો હતો. 23 વર્ષના કિશન બારીયા નામના યુવાનનું પાણીમાં ડૂબી જતાં મોત નિપજ્યું હતું. કિશન બારીયા ગરીબ લોકોને જમવાનુ આપવા જતા સમયે પાણીમાં ડૂબી ગયો હતો. બોરસદમાં વનતલાવડી વિસ્તારમાં મોત થયેલ યુવાનને 4 લાખની સહાય ચૂકવાશે.
જૂનાગઢમાં ચોતરફ પાણી.. પાણી...ના દ્રશ્યો સર્જાયા
બીજી બાજુજૂનાગઢમાં મેઘરાજાએ તોફાની બેટિંગ કરી હતી. ભારે વરસાદથી ચોતરફ પાણી.. પાણી...ના દ્રશ્યો સર્જાયા હતા. જળબંબાકાર જેવી સ્થિતિ વચ્ચે રસ્તાઓ પર પાણી ભરાયા હતા. આથી વાહનચાલકોને હાલાકીનો સામનો કરવાનો વારો આવ્યો હતો. અને જૂનાગઢ શહેરમાંથી પસાર થતા કાળવાના હોકળામાં ઘોડાપૂર આવ્યું હતું. તથા શહેરના અનેક વિસ્તારોમાં પાણીમાં ગરક થયા હતા. બજારોમાં પાણી ભરાતા જનજીવન પ્રભાવિત થયું હતું.
વિસાવદરનો આંબાજળ ડેમ ઓવરફલો
જૂનાગઢમાં સચરાચર મેઘમહેર વચ્ચે વિસાવદરમાં પણ 4થી 6 ઇંચ જેટલો વરસાદ નોંધાયો હતો. અવકાશી વીજળીના કડાકા-ભડાકા અને મેઘાડંબર વચ્ચે મેઘરાજાએ અવિરત બેટિંગ કરી હતી. આથી પ્રથમ વરસાદમાં જ વિસાવદરના આંબાજળ ડેમમાં પાણીની આવક થતા ડેમ ઓવરફલો થયો હતો. એટલું જ નહી મેઘરાજાની સટાસટીને લઇને અનેક ગામોના નિચાણવાળા વિસ્તારોમાં પાણી ભરાયા હતા. તો બીજી તરફ લોકોએ રોડ પર નીકળી પડી પ્રથમ વરસાદની મોજ માણી હતી.