ભારતમાં રેલ્વે બુકિંગ કંપની IRCTCમાં IPOએ બજારમાં બુમ પડાવી દીધી અને રોકાણકારોને ખુશ કરી દીધા. હવે બીજા એક IPOના સમાચાર આવ્યા છે પણ આ છે વિશ્વની સૌથી વધુ નફો કરતી ક્રુડતેલની કંપની અરામકો ના! તો આવો જાણીએ શું છે અરામકોની યોજના?
સાઉદી અરેબિયા તેમની રાજ્યની માલિકીની કંપની સાઉદી અરામકોનો initial public offering એટલે કે IPO બહાર પાડવા જઈ રહ્યા છે. નિષ્ણાતોના મતે આ વિશ્વનો સૌથી મોટો IPO હશે.
આ યોજના સાઉદી પ્રિન્સ મોહંમદ બિન સલમાને 3 વર્ષથી બનાવી છે અને હવે કેપિટલ માર્કેટ ઓથોરિટીની મંજૂરીથી આ શેર્સ ડિસેમ્બરમાં ટ્રેડ થવાના શરુ થશે.
સાઉદીની ચેનલ અલ અરેબિયાના અહેવાલ મુજબ અરામકો આ IPO વિષે 10 નવેમ્બરે સત્તાવાર જાહેરાત કરશે.
સાઉદી અરામકોના નફાના આંકડા
સાઉદી અરામકો દુનિયાના કુલ ક્રૂડઓઇલનું 10% ઓઇલ પંપ કરે છે. દુનિયાની સૌથી વધુ નફો કરતી આ કંપનીની ગયા વર્ષની આવક અધધ 111 અબજ ડોલર એટલે કે 7827 અબજ રૂપિયા હતી.
આશ્ચર્યજનક રીતે આ આંકડા એપલ, ગૂગલની પેરન્ટ કંપની આલ્ફાબેટ Inc. અને એક્ઝોન મોબીલ કોર્પોરેશન ત્રણેયના કુલ આવકના આંકડા કરતા પણ વધુ છે. અરામકો કંપનીને 2 ટ્રિલિયન ડોલરના વેલ્યુએશનમાં મુકવા માંગે છે જે એપલ કરતા બમણું છે.
સાઉદી અરામકો વિશ્વની સૌથી વધુ નફો કરતી કંપની છે. તે દિવસના 304 મિલિયન ડોલર એટલે કે 2000 કરોડથી વધુ રૂપિયાનો નફો કરે છે જયારે પ્રતિ સેકંડ તે અઢી લાખ રૂપિયાનો નફો કરે છે.
વૈશ્વિક બેન્કોને છે આ IPOનું ઘેલું
અરામકોના આ જાદુઈ આંકડાઓના પગલે વિશ્વની પ્રખ્યાત બેંકો જેવી કે સીટી ગ્રુપ, ગોલ્ડમેન સૅકસ, JP મોર્ગન ચેઝ વગેરે એ અરામકોના IPOની મેન્ડેટ મેળવવા પડાપડી કરી છે.
શું પ્લાન છે?
સાઉદી પ્રિન્સ સલમાન 2030 સુધીમાં સાઉદીના અર્થતંત્રની ઓઇલની નિકાસ પરની નિર્ભરતા ઓછી કરવા માંગે છે. નોંધનીય છે કે દુનિયામાં કલાઇમેટ ચેન્જ સામે વધી રહેલી જાગૃતિ અને બદલાતી ટેક્નોલોજીના પગલે વર્ષોથી માંગમાં રહેલા ઓઇલના ભવિષ્ય ઉપર હવે સવાલો ઉભા થયા છે.
મળશે આટલું ડિવિડન્ડ
પોતાના ભવિષ્યના શેરહોલ્ડરોને આકર્ષવા માટે અરામકોએ આવતા વર્ષે 75 થી 80 અબજ ડોલરનું ડિવિડન્ડ ઓફર કર્યું છે. તેના વેલ્યુએશનને જો 1.8 ટ્રિલિયન ડોલર ગણવામાં આવે તો રોકાણકારોને 4.4% yield મળે છે એમ કહી શકાય.