BIG NEWS / હજને લઈને સાઉદીનો ઐતિહાસિક નિર્ણય: પુરુષ સાથી વગર પણ જઈ શકશે મહિલાઓ

• હજ પર જતી મહિલાઓ માટે સૌથી મોટા સમાચાર 
• હવે પુરુષ સાથી વગર પણ મુસ્લિમ મહિલાઓ કરી શકશે હજ અને ઉમરા
• હજને લઈને સાઉદી અરેબિયા સરકારનો મોટો નિર્ણય

સાઉદી અરેબિયાએ હજ કે ઉમરાહ કરતી મહિલાઓ માટે મેહરમની આવશ્યકતા નાબૂદ કરી દીધી છે. હવે કોઈપણ મહિલા મેહરમ (પુરુષ સાથી) વગર હજ કે ઉમરાહ કરવા સાઉદી અરેબિયા જઈ શકે છે. અગાઉ હજ કે ઉમરાહ કરવા માટે મેહરમનું સાથે હોવું જરૂરી હતું. જેના કારણે ઘણી મહિલાઓ વિચારીને પણ હજ કે ઉમરાહ પર જઈ શકતી નહોતી. સાઉદી અરેબિયાના હજ અને ઉમરાહ મંત્રી ડૉ. તૌફિક બિન ફૌઝાન અલ-રબિયા ( Dr Tawfiq bin Fawzan Al-Rabiah)એ કહ્યું કે, હવે મહિલાઓ કોઈ પણ મેહરમ વગર હજ કે ઉમરા કરી શકશે.

મહિલાઓ પહેલાથી જ અનેક અવરોધોનો કરે છે સામનોઃ ઈબ્રાહિમ હુસૈન
સાઉદી સરકારના પૂર્વ હજ મંત્રી ઈબ્રાહિમ હુસૈને કહ્યું કે, મહિલાઓ પહેલાથી જ અનેક અવરોધોનો સામનો કરે છે. તેમને હજ કે ઉમરાહ માટે પુરૂષ સાથી (મેહરમ) શોધવામાં મુશ્કેલીઓ પડે છે અથવા જો મળી જાય તો મોંઘવારીનો બોજ વધી જાય છે.
 
ભારતીયોને પણ થશે ફાયદો
ભારત સરકાર દ્વારા જાહેર કરવામાં આવેલા આંકડા મુજબ, આ વર્ષે લગભગ 80 હજાર ભારતીય મુસ્લિમો હજ કરવા માટે સાઉદી અરેબિયા જશે. જેમાંથી 50 ટકા મહિલાઓ છે. 2019માં સૌથી વધુ બે લાખ ભારતીય મુસ્લિમો હજ માટે મક્કા ગયા હતા.

નવા નિયમો લાગુ કરવાની તૈયારીઓ પૂર્ણ
રિપોર્ટ અનુસાર, મહિલાઓની સુરક્ષાને મજબૂત કરવા માટે સાઉદી અરેબિયાની સરકારે દેશભરમાં તમામ પરિવહન અને બંદરો પર સુરક્ષા વધારી દીધી છે. આ ઉપરાંત સરકારે તેના સંપૂર્ણ અમલીકરણ માટે એક મજબૂત ઈન્ફ્રાસ્ટ્રક્ચર બનાવ્યું છે, જેમાં ઉત્પીડન વિરોધી કાયદો પણ સામેલ છે.

સીસીટીવી કેમેરાથી દેખરેખ
ઈબ્રાહિમ હુસૈને કહ્યું કે, મેહરમ વગર આવતી મહિલાઓની સુરક્ષા માટે સાઉદી અરેબિયા સંપૂર્ણ રીતે તૈયાર છે. એરપોર્ટ, સરહદી બંદરો, શેખ ઝાયેદ ગ્રાન્ડ મસ્જિદ, પૈગમ્બર મસ્જિદ જેવા મહત્વના સ્થળો પર કેમેરાથી બાજ નજર રાખવામાં આવશે. જેથી મહિલાઓની સુરક્ષાને વધુ મજબૂત બનાવી શકાય.

હજ કરનારાઓની સંખ્યા ઘણી વધારે
હજને મુસ્લિમોનો સૌથી મોટો મેળાવડો માનવામાં આવે છે. કોરોના મહામારી પહેલા દર વર્ષે 20 લાખથી વધુ લોકો હજ કરવા માટે સાઉદી અરેબિયા જતા હતા.