સાઉદી અરેબિયાના મક્કા શહેરમાં શુક્રવાર રાત્રે મુશળધાર વરસાદ પછી, અચાનક પૂરના કારણે શહેરમાં વાહનો અને મિલકતોને ભારે નુકસાન થયું છે
મક્કામાં મુશળધાર વરસાદ પડતા વાહનો તણાયા
શુક્રવારે મોડી રાત સુધી વરસાદથી રસ્તામાં પાણી ભરાયા
વરસાદ બાદ ઘણી ફ્લાઈટ રદ અને સ્કુલોમાં જાહેર રજા આપી
સાઉદી અરેબિયાના મક્કા શહેરમાં શુક્રવાર (23 ડિસેમ્બર) રાત્રે મુશળધાર વરસાદ પછી, અચાનક પૂરના કારણે શહેરમાં વાહનો અને મિલકતોને ભારે નુકસાન થયું છે. મક્કાથી સામે આવેલા વીડિયોમાં સ્પષ્ટપણે જોઈ શકાય છે કે કેવી રીતે પાણીના જોરદાર પ્રવાહમાં વાહનો વહેવા લાગ્યા અને ઘણા મુખ્ય રસ્તાઓ બંધ થઈ ગયા.
મક્કામાં મુશળધાર વરસાદ
વાસ્તવમાં, મક્કામાં ગુરુવારે રાત અને શુક્રવારે સવાર સુધી મુશળધાર વરસાદ પડ્યો હતો. રાષ્ટ્રીય હવામાન કેન્દ્રએ શુક્રવારે મક્કા પ્રાંતમાં હવામાન ચેતવણી જારી કરી હતી. અહીં રાનિયા, તૈફ, અધમ અને મયસાન વિસ્તારમાં પણ હળવોથી ભારે વરસાદ થયો હતો. અહીં ખરાબ હવામાનને કારણે ઘણી ફ્લાઈટ્સ પણ રદ કરવામાં આવી હતી.
નવેમ્બરમાં બે લોકોના મોત થયા હતા
હવામાન કેન્દ્રે મક્કાની ઉત્તરે આવેલા જેદ્દાહ પ્રાંતમાં ભારે વરસાદ સાથે પૂર અને વાવાઝોડાની ચેતવણી પણ જારી કરી છે. નવેમ્બરમાં પણ વરસાદના કારણે દરિયાકાંઠાના શહેર જેદ્દાહમાં પૂરમાં બે લોકોના મોત થયા હતા. ફરી એકવાર વરસાદે અહીં સ્થિતિ બગાડી છે.
વરસાદી પાણી ભરાયા
સ્થાનિક લોકોએ સોશિયલ મીડિયા પ્લેટફોર્મ પર પાણીના જોરદાર પ્રવાહમાં કાર ધોવાઈ જવાનો વીડિયો શેર કર્યો છે. વરસાદી પાણી ગટરો ઉભરાવાને કારણે રસ્તાઓ પર ભરાઈ ગયા હતા. વરસાદ એટલો બધો પડ્યો કે કિંગ અબ્દુલ અઝીઝ એરપોર્ટ પર પહોંચતા પહેલા ફ્લાઈટ્સ વિશે માહિતી મેળવવા માટે સૂચના આપવામાં આવી હતી.
વરસાદ બાદ શહેરની શાળાઓમાં રજા
તમને જણાવી દઈએ કે, મક્કા વિશ્વભરના મુસ્લિમો માટે સૌથી મોટા તીર્થસ્થાનોમાંથી એક છે. વરસાદના કારણે અહીં પહોંચેલા યાત્રિકોને પણ મુશ્કેલીનો સામનો કરવો પડ્યો હતો. વરસાદ બાદ શહેરની શાળાઓને રજા જાહેર કરવામાં આવી હતી. આ વર્ષે જાન્યુઆરીમાં પણ સાઉદીના લોકોએ તાપમાનમાં તીવ્ર ઘટાડા બાદ ભારે હિમવર્ષાનો વીડિયો સોશિયલ મીડિયા પર શેર કર્યો હતો.