લોકડાઉનના કારણે વિશ્વમાં મહામંદી જેવો માહોલ છે. મંદીના કારણે અનેક દેશોના અર્થતંત્રએ જોરદાર ફટકો લાગ્યો છે. એવામાં માત્ર ઓઈલ પર નિર્ભર દેશોની હાલત વધુ કફોડી બની છે. માંગમાં ઘટાડાના કારણે ક્રુડ ઓઈલની કિંમતોમાં કડાકો થયો છે અને આ ઓઈલ સિવાય અન્ય કોઈ આવકનો સ્ત્રોત ન હોવાથી સાઉદી અરબની પરિસ્થિતિ વણસી છે.
સાઉદી અરબના અર્થતંત્રમાં ગાબડા
વેલ્યુ એડેડ ટેક્સ 5% થી વધારીને 15 % કરી દેવામાં આવ્યો
અરામકોના નફામાં 25 ટકાનો કડાકો
ક્રુડ ઓઈલ પર જ નિર્ભર અર્થવ્યસ્થા ધરાવતાં દેશોની હાલત ખરાબ
સમગ્ર વિશ્વમાં કોરોના વાયરસના કારણે ઘણા દેશોના અર્થતંત્રને જોરદાર ફટકો લાગ્યો છે. ત્યારે લોકડાઉનના કારણે કાચા તેલની કિંમતોમાં પણ કડાકો આવ્યો છે. એવામાં માત્ર ક્રુડ ઓઈલ પર જ નિર્ભર અર્થવ્યસ્થા ધરાવતાં દેશોની હાલત વધુને વધુ ખરાબ થઇ રહી છે. જેમાં સાઉદી અરબના અર્થતંત્રમાં પણ ગાબડા પડી રહ્યા છે. સાઉદી અરબની હાલત એટલી ખરાબ છે કે હાલમાં વેલ્યુ એડેડ ટેક્સ 5% થી વધારીને 15 % કરી દેવામાં આવેલ છે. આટલું જ નહીં કર્મચારીઓને મળતા અનેક પ્રકારના ભથ્થા ખતમ કરી દેવામાં આવ્યા છે.
મોટા પ્રોજેક્ટ બંધ કરી દેવાની ફરજ પડી
લોકડાઉનના કારણે વિશ્વભરમાં પેટ્રોલ ડિઝલની માંગમાં ખૂબ મોટો ઘટાડો નોંધાયો છે. માંગમાં કડાકાના કારણે કાચા તેલની કિંમત ગયા વર્ષ કરતા અડધી થઇ ગઈ છે. સાઉદી અરબના રાજસ્વમાં 22%નો ઘટાડો નોંધાયો છે. પ્રથમ ત્રિમાસિકમાં સાઉદી અરબની સરકારી કંપની અરામકોના નફામાં 25 ટકાનો કડાકો થયો. અર્થતંત્રની હાલાત તે સ્તરે છે કે સાઉદી અરેબિયાએ પોતાના મોટા પ્રોજેક્ટ બંધ કરી દેવાની ફરજ પડી છે.
સાઉદી અરબ પાસે ખૂબ મોટું રિઝર્વ
જોકે સાઉદી અરેબિયામાં રાજદૂત રહી ચુકેલા બ્રિટનના સર વિલિયમ પેટીનું માનવું છે કે સાઉદી અરબે તેની તિજોરીમાં અબજો રૂપિયા જમા કરી રાખ્યા છે અને આ ધનની મદદથી તે મુશ્કેલ પરિસ્થિતિમાં ફરી બેઠું થઇ શકે તેમ છે.
હવે સાઉદી અરબ ઓઈલ સિવાય અન્ય ક્ષેત્ર પર પણ ધ્યાન આપશે
માત્ર તેલ પર જ નિર્ભર રહેવાના કારણે સાઉદીને આ સમસ્યાનો સામનો કરવો પડી રહ્યો છે ત્યારે આ દેશ હવે ઓઈલ સિવાય અન્ય ક્ષેત્રને પણ અર્થવ્ય્વસ્થામાં લાવવા માટે પ્રયત્ન કરી રહ્યું છે. આ વર્ષના પહેલા ત્રિમાસિકમાં સાઉદી અરબનું બજેટ નુકસાન 9 અબજ ડોલરનું છે. જોકે હવે સાઉદી અરબ તેલ સિવાય અન્ય ક્ષેત્રો પર પણ ધ્યાન આપશે.
ક્રાઉન પ્રિન્સે શરુ કર્યો મહત્વકાંક્ષી પ્રોજેક્ટ
સાઉદી અરબનું આખું અર્થતંત્ર તેલ આધારિત છે. આ સિવાય અન્ય દેશોથી આવતા શ્રમિકો પર આ દેશ નિર્ભર છે ત્યારે તેલ અને મજૂરો પરથી પોતાની નિર્ભરતા ખતમ કરી દેવા માટે ક્રાઉન પ્રિન્સ સલમાને મહત્વકાંક્ષી યોજના વિઝન 2030 શરુ કરી છે. આટલું જ નહીં આ યોજના હેઠળ રણની અંદર એક આધુનિક શહેર પણ ઉભું કરવા જઈ રહ્યા છે. નોંધનીય છે કે અમેરિકાના ટ્રમ્પ અને રશિયાના વ્લાદિમીર પુતિન એમ બંને વિશ્વનેતાઓ સાથે ક્રાઉન પ્રિન્સના સારા સંબંધો રહ્યા છે જેનો સીધો ફાયદો પણ તેમને મળી રહ્યો છે.