શોકિંગ ન્યુઝ / ડિલિવરી વખતે નવજાતનું માથું ધડથી અલગ, ડોકટરે કપડામાં લપેટી લાશ પરિવારજનોને સોંપી

• નવજાત મૃત બાળકનું ધડથી અલગ હતું માથું
• મહિલાની ડિલીવરીમાં બાદ પરિવારજનોને સોપ્યું બાળક
• પરિવારજનોએ ડોક્ટર અને હોસ્પિટલની બેદરકારી દર્શાવી

મધ્યપ્રદેશના સતના જિલ્લા હોસ્પિટલમાંથી એક ચોંકાવનારો કિસ્સો સામે આવ્યો છે. મહિલાને ડિલિવરી બાદ મૃત બાળક સોંપવામાં આવ્યું હતું. નવજાત શિશુનું માથું ધડથી અલગ થયેલું હતું. મહિલાનું ઓપરેશન મહિલા ડૉક્ટર ડૉ. નીલમ સિંહ દ્વારા કરવામાં આવ્યું હતું . સ્વાભાવિક રીતે જ ડિલિવરી દરમિયાન બેદરકારી દાખવવામાં આવી છે.

ધડથી અલગ થયું માથું
મૈહરના ડેલ્હા ગામના રહેવાસી કિરણ ચૌધરીને લેબર પેઈનથી પીડાતા સિવિલ હોસ્પિટલમાં દાખલ કરવામાં આવ્યા હતા. પરંતુ તેની ગંભીર હાલતને કારણે તેને જિલ્લા હોસ્પિટલમાં રીફર કરવામાં આવી હતી. અહીં ઓપરેશન દ્વારા મહિલાની ડિલિવરી થઈ હતી. જિલ્લા હોસ્પિટલમાં ફરજ પરના મહિલા ડૉક્ટર ડૉ. નીલમ સિંહે પ્રસૂતિ કરાવી હતી. ડોક્ટરે ઓપરેશન કર્યું. બાદમાં પરિવારજનોને બાળકનું મૃત્યુ થયું હોવાનું જણાવવામાં આવ્યું હતું. લગભગ અઢી કલાક બાદ હોસ્પિટલ પ્રશાસને નવજાત શિશુના મૃતદેહને કપડામાં લપેટીને પરિવારજનોને સોંપ્યો હતો.

નવજાત શિશુની લાશ જોઈ પરિવારજનોના પગ નીચેથી જમીન સરકી ગઈ હતી. બાળકનું માથું ધડથી અલગ થઈ ગયું હતું. પરિવારજનો તેને જોઈને ચોંકી ઉઠ્યા હતા. હોસ્પિટલના લોકો કોઈ જવાબ આપવા તૈયાર નથી.

નવજાત શિશુના મૃતદેહને કપડામાં લપેટીને સોંપવામાં આવ્યો.
જણાવવામાં આવી રહ્યું છે કે બાળકના મૃતદેહને સોંપતી વખતે હોસ્પિટલ પ્રશાસને બાળકના માત્ર પગ જ બતાવ્યા. આરોગ્ય કર્મચારીઓએ નવજાત બાળકના મૃતદેહને ગુપ્ત રીતે કપડામાં બાંધીને સ્વજનોને સોંપ્યો હતો. સગાસંબંધીઓએ બાળકની લાશ જોતાં જ તેઓ ચોંકી ઉઠ્યા હતા. કારણ કે નવજાતનું માથું ધડથી અલગ હતું. અભણ સ્વજનો પણ સમજી શક્યા ન હતા કે બાળકનું મૃત્યુ કેવી રીતે થયું. જો કે હવે આ મામલો સામે આવ્યો છે.

હોસ્પિટલ પ્રશાસન આપી રહ્યું છે ઉદ્ધતાઈભર્યા જવાબો
હોસ્પિટલ પ્રશાસન આ મામલે ઉદ્ધતાઈભર્યા જવાબો આપી રહ્યું છે. જિલ્લા આરોગ્ય અધિકારીનું કહેવું છે કે સમગ્ર મામલાની તપાસ ચાલી રહી છે. ઓપરેશનમાં સામેલ લોકોના નિવેદન લેવામાં આવી રહ્યા છે. નવજાતનું મૃત્યુ ક્યારે અને કેવી રીતે થયું તે તપાસ બાદ જ સ્પષ્ટ થશે.