મહેસાણામાં સરપંચ પતિનો વીડિયો થયો વાયરલ, ગ્રામજનોએ મહિલા સરપંચ નહી પરંતુ તેમના પતિ દ્વારા વહીવટ કરાતો હોવાનો આક્ષેપ
સરપંચ પતિ દ્વારા ગામનો વહીવટ
મહેસાણાના ભાંડુ ગામનો વીડિયો વાયરલ
મહિલા સરપંચને બદલે એસપી કરે છે વહીવટ
હજી પણ ગુજરાતના એવા ગામો છે જ્યાં મહિલા સરપંચ પદ ધરાવે પરંતુ વહીવટ તો મહિલાનો પતિ જ કરે. ત્યારે વધુ એકવાર એક એવો વીડિયો સામે આવ્યો છે જેમાં મહિલા સરપંચ નહી પરંતુ તેમના પતિ દ્વારા વહીવટ કરવામાં આવે છે.
સરપંચ પતિ વહીવટ કરતો હોવાનો આક્ષેપ-વીડિયો વાયરલ
મહેસાણાના ભાંડુ ગામનો આ વીડિયો છે. અહીં સરપંચપતિ વહીવટ કરતા હોવાનો સ્થાનિકોએ આક્ષેપ કર્યો હતો. મહિલા સરપંચના પતિ કલ્પેશ પટેલ વહીવટ કરતા હોવાનો વીડિયો સામે આવતા અનેક સવાલો ઉભા થયા છે. ગ્રામજનોએ આ અંગે અનેકવાર રજૂઆત કરી તેમ છતાં પણ કોઇએ રજૂઆત ધ્યાને ન લેતા ગ્રામજનોએ વીડિયો ઉતારીને વાયરલ કર્યો હતો. સાથે જ ગ્રામજનોએ મહિલા સરપંચના પતિ ભાજપ નેતાની નજીકના હોવાનો પણ આક્ષેપ કરી રહ્યા હતા.
પીએમ મોદી કરી ચૂક્યા છે ટકોર
ઉલ્લેખનીય છે કે અમદાવાદ GMDC ગ્રાઉન્ડ પર પંચાયત મહાસંમેલન યોજાયુ હતું. જેમાં પીએમ મોદીએ ખાસ હાજરી આપી હતી. આ પ્રસંગે તેઓએ સંબોધન કરતા એસપી એટલે કે સરપંચ પતિ અંગે ખાસ ટકોર કરી હતી. તેઓએ જણાવ્યું હતું કે ગામમાં જો કોઈ મહિલા સરપંચ તરીકે ચૂંટાયા હોય તો તેનો વહીવટ તેઓ પોતે જ ચલાવે. જે મહિલા ચૂંટાયા છે વહીવટ પણ તેમના દ્વારા જ થવો જોઈએ તેમ પીએમ મોદીએ ટકોર કરી હતી તેમ છતાં પણ હજી ગામોમાં સરપંચ પતિ દ્વારા વહીવટ ચલાવવામાં આવે છે.
સરપંચ પતિ ક્યાં સુધી કરતા રહેશે વહીવટ ?
ત્યારે અહીં સવાલ એ થાય છે કે એસપી બની બેઠેલા સરપંચના પતિ વિરુદ્ધ ક્યારે કાર્યવાહી કરવામાં આવશે.? શા માટે સરપંચ પદ માટે ચૂંટાયેલી મહિલાને કારોબાર સોંપવામાં નથી આવતો ? મહિલાના નામનો ઉપયોગ માત્ર સત્તા મેળવવા જ કેમ ? સરપંચ મહિલા બની તે પતિ કેમ વહીવટ કરે ? મહિલા સરપંચના બેજવાબદાર પતિને કોનું પીઠબળ છે? શા માટે મહિલા સરપંચની પ્રતિભા અને ક્ષમતા પર સવાલ ઉઠાવવામાં આવે છે. ? શું મહિલા સરપંચ ન બની શકે ? મહિલા વહીવટ ન કરી શકે ? ક્યાં સુધી ચાલતો રહેશે સરપંચ પતિનો વહીવટ