SEOC,ગાંધીનગર ખાતે રાહત કમિશનરની ઉપસ્થિતિમાં વેધર વૉચ ગ્રુપની બેઠક યોજાઇ
રાહત કમિશનર હર્ષદભાઇ પટેલના અધ્યક્ષસ્થાને આજે સ્ટેટ ઇમરજન્સી ઓપરેશન સેન્ટર- SEOC ગાંધીનગર ખાતે વેધર વોચ ગ્રુપની બેઠક યોજાઇ હતી. આ બેઠકમાં હવામાન વિભાગના નિયામક મનોરમા મોહંતીએ વિગતો આપતા જણાવ્યું હતું કે, આગામી પાંચ દિવસમાં સૈારાષ્ટ્રના દરિયાઇ જિલ્લા તથા દક્ષિણ ગુજરાતના કેટલાક જિલ્લાઓમાં મધ્યમથી ભારે વરસાદ તથા કેટલાક જિલ્લાઓમાં હળવો વરસાદ થવાની સંભાવના છે. જે મુજબ આગામી તા.૧૪/૦૯/૨૦૨૨ના રોજ સૈારાષ્ટ્રના પોરબંદર, જુનાગઢ,ગીર સોમનાથ તથા દક્ષિણ ગુજરાતના ભરૂચ, સુરત, નવસારી અને વલસાડમાં મઘ્યમથી ભારે વરસાદ તથા તા.૧૫/૦૯/૨૦૨૨ના રોજ દક્ષિણ ગુજરાતના નવસારી અને વલસાડ જિલ્લામાં મઘ્યમથી ભારે વરસાદ ૫ડવાની સંભાવના છે.
નર્મદા જળ સપાટી 138.68.મીટરે પહોંચશે
તો બીજી તરફ નર્મદા જિલ્લામાંથી ખેડૂતો માટે આનંદના સમાચાર મળી રહ્યા છે. ગુજરાતની જીવાદોરી સરદાર સરોવર નર્મદા ડેમની સપાટી આગામી 48 કલાકમાં મહત્તમ 138.68 મીટરે પહોંચશે, હાલ 137.94 મીટરે પહોંચીચૂકી છે. 15 સેપ્ટમ્બરના રોજ ડેમ તેની મહત્તમ સપાટી પર પહોંચી જશે, હાલ માત્ર 54 સેમી મહત્તમ સપાટીથી દૂર છે.હાલ પાણીની આવક 1 લાખ 26 હજાર 413 ક્યુસેક છે જ્યારે નર્મદા નદીમાં ટોટલ જાવક 65 હજાર 076 ક્યુસેક છે. ત્રણ વર્ષ બાદ નર્મદા બંધ ફરી સંપૂર્ણ છલકાશે તે દિવસે CM ભૂપેન્દ્ર પટેલ નર્મદાના વધામણાં કરવા કેવડિયા જશે
જળાશયોની શું છે સ્થિતિ?
સિંચાઈ વિભાગના અધિકારીએ આ બેઠકમાં રાજ્યના જળાશયોની વિગતો આપતાં જણાવ્યું હતું કે સરદાર સરોવર જળાશયમાં ૩૨૪૩૭૫ એમ.સી.એફ.ટી. પાણીનો સંગ્રહ છે. જે કુલ સંગ્રહ શકિતના ૯૭.૧૦% છે. રાજયનાં ૨૦૬ જળાશયોમાં ૪૭૬૨૩૫ એમ.સી.એફ.ટી. પાણીનો સંગ્રહ છે, જે કુલ સંગ્રહ શકિતના ૮૫.૩૨% છે. હાલમાં રાજ્યમાં ૧૧૭ જળાશય હાઇ એલર્ટ ૫ર, ૧૬ જળાશય એલર્ટ ૫ર તેમજ ૧૭ જળાશય વોર્નીગ ઉ૫ર છે.
૮૪,૧૬,૭૯૫ હેક્ટર ખરીફ પાકોનું વાવેતર
કૃષિ વિભાગના અધિકારીએ રાજ્યમાં થયેલા વાવેતર અંગે વિગતો આપતાં જણાવ્યું હતું કે, ચાલુ વર્ષે તા.૧૨ સપ્ટેમ્બર સુધીમાં અંદાજીત ૮૪,૧૬,૭૯૫ હેક્ટર ખરીફ પાકોનું વાવેતર થયુ છે. ગત વર્ષે આ સમયગાળા દરમ્યાન ૮૨,૮૩,૦૧૦ હેક્ટર વાવેતર થયું હતુ. રાજયમાં હાલ NDRFની ૮ ટીમો ડીપ્લોય કરાઇ છે, જેમાં ભરૂચ-૧, ભાવનગર-૧, ગીર સોમનાથ-૧, કચ્છ-૧, નર્મદા-૧, નવસારી-૧, રાજકોટ-૧,સુરત-૧ NDRFની ટીમ તૈનાત છે. ઉપરાંત ગાંધીનગરમાં ૨- અને વડોદરામાં ૫ એમ કુલ-૦૭ ટીમો રીઝર્વ રખાઇ છે. જ્યારે રાજયમાં હાલ SDRFની કુલ-૧૧ ટીમ
સ્ટેન્ડબાય છે.
વેધર વોચ કમિટીની બેઠકમાં કોણ કોણ હતું હાજર
આ બેઠકમાં કૃષિ વિભાગ, સિંચાઇ અને સરદાર સરોવર નર્મદા નિગમ, NDRF, SDRF તથા ઉર્જા, માર્ગ અને મકાન, GSRTC, GSDMA, CWC, BISAG, કોસ્ટ ગાર્ડ, પશુપાલન, આરોગ્ય, ફોરેસ્ટ, કમિશનર(મ્યુનિસિપાલિટી), આર્મી તથા શહેરી વિકાસ વિભાગના અઘિકારીઓએ ઉપસ્થિત રહી વિસ્તૃત માહિતી પુરી પાડી હતી.