થોડા સમય પહેલાં 'કેદારનાથ' અને 'સિમ્બા' ફિલ્મથી બોલિવૂડમાં આવનારી સારા અલી ખાન નવી પેઢીની લોકપ્રિય અભિનેત્રી છે. અત્યાર સુધી તેની બે જ ફિલ્મ આવી છે, પરંતુ તેની એક્ટિંગ લોકોને ગમી છે. તેનું કહેવું છે કે અભિનેત્રી તરીકે તેનામાં ઘણી વસ્તુઓ સુધારવાની જરૂર છે.
ઇન્ડસ્ટ્રીમાં આવવાની સાથે સારાના અફેરની ચર્ચા શરૂ થઇ હતી
સારાએ કહ્યું, એક્ટિંગ મારો પહેલો પ્રેમ છે
સારાની ફેન ફોલોઇંગ સતત વધી રહી છે
ઇન્ડસ્ટ્રીમાં પગ મૂકવાની સાથે જ તેના અફેરની ચર્ચા શરૂ થઇ હતી, પરંતુ તેનું કહેવું છે કે અત્યારે તેનું સમગ્ર ધ્યાન તેના કામ અને અભિનયના નિખાર પર છે. તેના જણાવ્યા અનુસાર હાલમાં તેને કોઇ પણ વ્યક્તિ સાથે પ્રેમ નથી. તેનો પહેલો પ્રેમ એક્ટિંગ સાથે છે. તેને લઇને તે ગંભીર પણ છે. તે કહે છે કે તે અલગ અલગ ફિલ્મોમાં કામ કરવા ઇચ્છે છે અને તેને અલગ અલગ ભૂમિકાઓ પણ કરવી છે. અભિનેત્રી તરીકે પણ તેને એવાં દરેક કામ કરવાં છે, જે તેના માટે નવાં છે, જેથી તેને એક્ટિંગ સુધારવાનો મોકો મળે.
સારાની ફેન ફોલોઇંગ સતત વધી રહી છે, જોકે આ પ્રસિદ્ધિને તે પોતાના પર સવાર થવા દેવા ઇચ્છતી નથી. તે કહે છે કે લોકો કહે છે કે હું હવે સેલિબ્રિટી બની ગઇ છું, પરંતુ મને તેવું લાગતું નથી. હું આજે પણ એવી જ છું, જેવી પહેલાં હતી. જ્યારે ફેન્સ મને આટલો પ્રેમ આપે છે તો ખુશી થાય છે. તેમનો પ્રેમ મને કંઇક ખાસ હોવાનો અહેસાસ કરાવે છે. સારાને કોમેડી અને ગ્લેમરસ રોલ ભજવવાની મજા આવે છે. તે કહે છે કે હું અત્યારે યંગ છું અને દરેક પ્રકારની ભૂમિકા સ્વીકારવા તૈયાર છું. હજુ મારી શરૂઆત છે. મારે એવાં પાત્ર ભજવવાં છે, જે યાદગાર હોય, પછી તે ઐતિહાસિક હોય કે કાલ્પનિક. કોઇ એક પાત્રથી મારું મન ધરાશે નહીં.