પ્રવાસીઓની ભીડ ઉમટતા સ્થાનિક વેપારીઓને રોજગારીની મોટી તક
રાજ્યમાં ધીરે-ધીરે ચોમાસાની સિઝન નજીક આવી રહી છે ત્યારે રાજ્યના કેટલાંક વિસ્તારોમાં છેલ્લાં 3-4 દિવસથી વાતાવરણ વાદળછાયું બની રહે છે. એવામાં દક્ષિણ ગુજરાતમાં તો કેટલીક જગ્યાએ હળવો વરસાદ પણ શરૂ થઇ ગયો છે. ગઇ કાલે જ વલસાડના ભીલાડમાં સવારે વરસાદ પડ્યો હતો. ત્યારે આવાં વાદળછાયા વાતાવરણ અને વરસાદી માહોલ વચ્ચે ગિરિમથક સાપુતારાનું વાતાવરણ અહલાદક બન્યું છે. ગુજરાતનું મીની કાશ્મીર કહેવાતા સાપુતારામાં પ્રવાસીઓની ભારે ભીડ ઉમટી રહી છે.
બદલાતા હવામાનના કારણે સાપુતારામાં વાતાવરણ ખૂબ જ આહલાદક બની ગયું છે. હવાફેર માટે સાપુતારા ગયેલા પ્રવાસીઓમાં ભારે આનંદ છવાઇ ગયો છે. શહેરોની ગરમી ભૂલી પ્રવાસીઓ સાપુતારામાં ધુમ્મસ ભર્યા કુદરતી સૌંદર્યની મજા માણી રહ્યાં છે. ત્યારે સાપુતારામાં એકાએક પ્રવાસીઓની ભીડ ઉમટી પડતા સ્થાનિક વેપારીઓ માટે રોજગારીની મોટી તક ઉભી થઇ છે.
ડાંગ જિલ્લાનાં ગિરિમથક સાપુતારા સહીત તળેટીય વિસ્તારનાં ગામડાઓમાં પણ ધીરે-ધીરે ઝરમર ઝરમર વરસાદ વરસતા સમગ્ર પંથકોમાં શીત લહેર વ્યાપી જવા પામી છે. ગિરિમથક સાપુતારા સહિત તળેટીય વિસ્તારનાં ગામડાઓમાં વરસાદી (Rain) માહોલની સાથે-સાથે સમયાંતરે ધુમ્મસીયા વાતાવરણની સફેદ ચાદર ઓઢાઈ રહેતા દ્રશ્યો મનમોહક બની ગયા હતા. સાપુતારામાં ધુમ્મસની ચાદર ફરી વળતા પ્રવાસીઓએ મન મુકીને આહલાદક વાતાવરણની મજા માણી હતી.
નવસારીના બીલીમોરામાં હળવો વરસાદ વરસ્યો હતો
ઉલ્લેખનીય છે કે, એક દિવસ અગાઉ વલસાડના તીથલના દરિયા કિનારે ભારે પવન ફૂંકાયો હતો. જેથી તીથલના દરિયા કિનારે ફરવા આવતા સહેલાણીઓને ગરમીથી રાહત મળી હતી. તો નવસારીના બીલીમોરામાં પણ હળવો વરસાદ વરસ્યો હતો. શહેરના સોમનાથ રોડ, દેવસર સહિતના વિસ્તારમાં વરસાદી ઝાપટું પડતા લોકોને ગરમીથી રાહત મળી હતી.
સહ્યાદ્રિ ગિરિમાળામાં આવેલું સાપુતારા ગુજરાતનું એકમાત્ર હિલ સ્ટેશન
તમને જણાવી દઇએ કે, સાપુતારા ડાંગ જિલ્લામાં મહારાષ્ટ્ર રાજ્યની સરહદ પર સહ્યાદ્રિ પર્વતમાળામાં જંગલ વચ્ચે આશરે 1000 મીટરની ઊંચાઇએ આવેલું છે. ગુજરાતના ડાંગ જિલ્લાનાં ગાઢ જંગલોની વચ્ચોવચ સહ્યાદ્રિ ગિરિમાળામાં આવેલું સાપુતારા ગુજરાતનું એકમાત્ર હિલ સ્ટેશન છે. ગુજરાતમાં જંગલની વાત આવે ત્યારે ગીર બાદ બીજું સ્થળ સાપુતારાનાં જંગલો છે. ત્યાંનું વન વૈવિઘ્ય અને પ્રકૃતિ સમૃદ્ધિ પ્રવાસીઓને આકર્ષવા સક્ષમ છે.
સાપુતારા ગુજરાતનું હોવા છતાં અમદાવાદ કરતાં મુંબઇથી વધારે નજીક છે. સમુદ્રથી 1083 મીટરની ઊંચાઇએ આવેલું સાપુતારા ગુજરાતનું એકમાત્ર હિલ સ્ટેશન છે. સાપુતારા ગુજરાતના ડાંગ જિલ્લાનાં ઘટાટોપ જંગલો વરચે સહ્યાદ્રિ પર્વતમાળા પર આવેલું છે. દૂર-દૂર સુધી ફેલાયેલી ખીણો અને લીલીછમ વનરાજીનાં દ્રશ્યો મનને હરી લે તેવાં છે. એડવેન્ચર ટુરિઝમ તરીકે પણ સાપુતારા ખૂબ જ જાણીતું બન્યું છે.