ડાન્સર સપના ચૌધરીની બીજેપીમાં ગ્રેન્ડ એન્ટ્રીને મળેલ હાઇપથી પાર્ટીના ઘણા નેતા અને આરએસએસના પદાધિકારી નારાજ થયા હોવાનું બતાવાઇ રહ્યું છે. એમનું માનવું છે કે પાર્ટીના વરિષ્ઠ નેતાઓ પર સેલિબ્રિટઝને મહત્વ અપાઇ રહ્યું છે.
એક વરિષ્ઠ નેતાનું કહેવું છે કે પાર્ટીના સદસ્યતા અભિયાનમાં ઘણા વરિષ્ઠ નેતાઓ હાજર હતા. પરંતુ પ્રચાર એવી રીતે કરવામાં આવી રહ્યો છે કે જાણે કાર્યક્રમ સપના ચૌધરીના સામેલ થવા પર કરવામાં આવી રહ્યો હોય. જ્યારે બીજા દિવસે સપના ચૌધરી માટે પ્રેસ કોન્ફરન્સનું પણ આયોજન કરવામાં આવ્યું.
આપને જણાવીએ કે, નવી દિલ્હી સ્થિત જવાહરલાલ નેહરુ સ્ટેડિયમમાં રવિવારે (7 જુલાઇ) એ બીજેપીનું સદસ્યતા અભિયાન શરૂ થયું હતું. આ દરમિયાન મધ્યપ્રદેશના પૂર્વ મુખ્યમંત્રી શિવરાજ સિંહ ચૌહાણ અને પાર્ટીના રાષ્ટ્રીય મહાસચિવ રામલાલની હાજરીમાં સપના ચૌધરી બીજેપીમાં જોડાયા હતા.
સપના ચૌધરીએ બીજેપીમાં સામેલ થયા બાદ આરએસએસના રાજ્ય મીડિયા સંયોજક રાજીવ તુલીએ સપના ચૌધરીની એક ફોટો ટ્વિટ કરી હતી. એમણે લખ્યું હતું કે, ''કોરમ પૂર્ણ થઇ ગયું છે. પહેલા મનોજ તિવારી, પછી હંસ રાજ હંસ અને હવે સપના ચૌધરી''. જોકે, જ્યારે રાજીવ તુલીને સંપર્ક કરવામાં આવ્યો હતો ત્યારે એમણે તેને વ્યક્તિગત વિચાર દર્શાવ્યો હતો.