આઈએએસ અધિકારીને સેનિટરી પેડ પર સવાલ પૂછનાર બિહારની છોકરી રિયાના સાહસની સેનિટરી પેડ કંપનીએ કદર કરી છે.
બિહારની રિયા પર સેનિટરી પેડ બનાવતી કંપની આફરીન
પાન હેલ્થકેર કંપની રિયાને વર્ષભર આપશે સેનિટરી પેડ
રિયાના ગ્રેજ્યુએશન સુધીના ભણવાનો ખર્ચ પણ પૂરો કરશે
બિહારમાં થોડા દિવસ પહેલા આઈએએસ ઓફિસરને સેનિટરી પેડ પર સવાલ પૂછનાર છોકરી રિયાના સાહસની સેનિટરી પેડ બનાવતી કંપની પાન હેલ્થકેરે કદર કરી છે અને તેને થોડી સુવિધા આપવાનો નિર્ણય જાહેર કર્યો છે. પાન હેલ્થકેરના સીઈઓ ચિરાગ પાને જણાવ્યું હતું કે, આપણા દેશમાં માસિક સ્રાવ સ્વચ્છતાને વર્જિત વિષય માનવામાં આવે છે, જેની ચર્ચા પેઢીઓથી ગુપ્ત રીતે કરવામાં આવે છે. આપણે આ ટ્રેન્ડ બદલવો પડશે.
રિયા માટે આ સુવિધા જાહેર કરી સેનિટરી પેડ બનાવતી કંપનીએ
ચિરાગે વધુમાં જણાવ્યું હતું કે, આપણે અને યુવતીઓએ આ મુદ્દે ખુલ્લી ચર્ચાની માગણી વધુ જોરશોરથી રજૂ કરવી જોઈએ. હવે સમય આવી ગયો છે કે આ વિષય પર ખુલ્લી ચર્ચા કરીને વધુને વધુ લોકોને જાગૃત કરવામાં આવે. પાને વધુમાં જણાવ્યું હતું કે, "હું રિયાની જાહેર મંચ પર આ વિષય પર આત્મવિશ્વાસથી બોલવાની હિંમતને સલામ કરું છું. રિયાની આ હિંમતને ધ્યાનમાં રાખીને અમે નક્કી કર્યું છે કે અમે રિયાને આખું વર્ષ મફતમાં ક્વાર્ટીન નીમ અને કુસુમ સેનિટરી પેડ્સ આપીશું.
રિયાના ગ્રેજ્યુએશનના ભણતરનો ખર્ચ આપશે કંપની
સીઈઓએ ચિરાગે એવું પણ કહ્યું કે અમે એવો પણ નિર્ણય કર્યો છે કે કંપની રિયાના ગ્રેજ્યુએશન સુધીનો ભણતરનો ખર્ચ ઉઠાવશે.
રિયા અને આઈએએસ અધિકારી વચ્ચે શું થયું હતું
રિયાએ કહ્યું કે હું રાજ્ય સરકારના બેટી સમૃદ્ધિ બિહાર કાર્યક્રમમાં ગઈ હતી. મેં આ સવાલ પૂછ્યો હતો કે અમારી સરકાર અમને તમામ પ્રકારની સુવિધાઓ આપે છે. પરંતુ શું આ સરકાર અમને 20 થી 30 રુપિયામાં સેનેટરી પેડ્સ ન આપી શકે? આ સવાલ પર આઈએએસ અધિકારી મેડમે ગંભીરતાથી જવાબ આપવાને બદલે તેની મજાક ઉડાવી હતી અને કહ્યું હતું કે તમારી માગનો કોઈ અંત નથી. આવતીકાલે તમે કોન્ડોમ પણ મફતમાં માગશો, શું અમારે તે પણ મફતમાં આપવાના. આઈએએસ અધિકારીના આ નિવેદનની ખૂબ ટીકા થઈ હતી અને મામલો છે સીએમ નીતિશ કુમાર સુધી પહોંચ્યો હતો.