જળસંકટ / નેતાઓનાં દાવા પોકળ! 110 ગામોની તરસ છીપાવનાર સાની ડેમ કેમ કોરો ધાકોર

દ્વારકા જિલ્લામાં સિંચાઈ અને પીવાનાં પાણીનાં એક માત્ર આધાર જેવો સાની ડેમ (Sani Dam) કોરો ધાકોર થઈ ગયો છે. એક તરફ ચોમાસુ (Monsoon) લંબાઈ ગયું છે તો બીજી તરફ પાણીની ભારે અછત વર્તાઈ રહી છે. જો કે આ સમસ્યા જેટલી પકૃત્તિ દત્ત છે તેનાં કરતા વધારે વહીવટી અણ આવડતનાં કારણે ઊભી થઈ છે. કેમ કે નર્મદાનાં નીરથી ડેમને ભરી દેવાની વાત માત્ર ચૂંટણી જીતવાનું ઠાલું વચન જ બની ગયું છે. ત્યારે જોઈએ આ અહેવાલમાં.

દ્વારકા જિલ્લામાં પીવાનાં અને ખેતીની પિયત માટેનો એક માત્ર આધાર એવો સાની ડેમ હાલ કોરો ધાકોર થઈ ગયો છે. તેમાં જ્યારે પાણી હતું ત્યારે આ ડેમ દ્વારકા તાલુકાનાં પિસ્તાલીસ અને કલ્યાણપુર તાલુકાનાં 65 જેટલાંથી વધુ ગામની તરસ છીપાવતું હતું. પરંતુ હાલમાં જ્યારે પાણીની ગંભીર કટોકટી સર્જાઈ રહી છે ત્યારે જ સરકાર તરફથી આ ડેમ  પ્રત્યે ઉદાસીનતા જોવાં મળી રહી છે.

આ ડેમને નર્મદાનાં નીરથી ભરવાની વાત માત્ર પોકળ વચનો બનીને રહી ગઈ છે. વિધાનસભા ચૂંટણી પહેલા અને તે પછી લોકસભા ચૂંટણી પહેલા આ ડેમને ભરી દેવાનું વચન  આપવામાં આવ્યું હતું પરંતુ ચૂંટણી પત્યા બાદ આ ડેમની દુર્દશા જોવાં કોઈ નેતાઓ આવ્યાં નથી. હાલ આ ડેમ ખાલી છે અને જાણે આ ડેમ પોતાની જ તરસની કહાની કહી રહ્યો હોય તેવો દેખાઈ રહ્યો છે. તો આ તરફ ખેડૂતો પોતાની વ્યથા ઠાલવી રહ્યાં છે.

સતત વરસાદની અછતથી દર વર્ષે જળસંકટનો સામનો કરનારા દ્વારકા જિલ્લાને આ ડેમ દ્વારા ઘણો સહારો મળતો હતો. અહીં દર ચોમાસે રહેતી વરસાદની ઘટને ધ્યાને રાખીને જ  સૂર્યાવદર અને આશિયાવદર ગામ પાસે 1989માં આ ડેમનું નિર્માણ કરાયું હતું. સાની ડેમ કુલ 13.03 મિલિયન સ્કવેર ચોરસ મીટરમાં ફેલાયેલ છે. આ ડેમ વિશાળ કદનો હોવાનાં કારણે કલ્યાણપુર તાલુકાનાં 10 જેટલા ગામોની ખેતી માટે સાની ડેમ આશીર્વાદરૂપ બનતો આવ્યો છે. પરંતુ હાલમાં આ ડેમ ખાલી થઈ જતા તેનાં પર નભતા લોકોની હાલત કફોડી બની છે.

સાની ડેમ હંમેશા ચર્ચામાં રહેતો આવ્યો છે પરંતુ આ વખતે ડેમની દુર્દશા જોઈ એવું ચોક્કસથી કહી શકાય કે 110 ગામોની તરસ છીપાવનાર સાની ખુદ જાણે પાણી બુંદ માટે તરસી રહ્યો હોય તેવાં દ્રશ્યો હાલમાં ડેમ પર જોવા મળી રહ્યાં છે. આ વર્ષે પાણીની તીવ્ર માંગ સામે ઉભો રહેલો સાની ડેમ ચોમાસુ નજીક છે ત્યાં ખાલી થઈ જતાં દ્વારકા તાલુકા તેમજ કલ્યાણપુર તાલુકાને તીવ્ર પાણીની તંગીનો સામનો કરવો પડી રહ્યો છે. ત્યારે આ ડેમમાં નર્મદાનાં નીર સરકાર જલ્દી પહોંચાડે તેવું સ્થાનિક લોકો માંગ કરી રહ્યાં છે.