કોરોનાના વધતા કેસોને કારણે રાજસ્થાન સરકાર દ્વારા પણ પ્રતિબંધો વધારવામાં આવ્યા છે. જેમા વિકેન્ડ કર્ફ્યું લાગૂ કરવામાં આવ્યો છે તેમજ લગ્નમાં પણ હવે 100ના બદલે 50 માણસોને મંજૂરી આપવામાં આવી છે.
રાજસ્થાન સરકાર દ્વારા પણ પ્રતિબંધો વધારવામાં આવ્યા
લગ્ન પ્રસંગમાં 100ના બદલે માત્ર 50 માણસોને મંજૂરી
શાળાઓ 30 તારીખ સુધી બંધ કરી ઓનલાઈન શિક્ષણ શરૂ
દેશના મોટા ભાગના રાજ્યોમાં કોરોનાને કારણે પ્રતિંબંધો વધી રહ્યા છે. મહારાષ્ટ્ર અને દિલ્હીમાં તો મિનિ લોકડાઉન જેવી સ્થિતી છે. ત્યારે આવા સમયે રાજસ્થાનમાં સરકાર દ્વારા પણ પ્રતિબંધો મોટા પ્રમાણમાં વધારવામાં આવ્યા છે. વધતા જતા કોરોનાના કેસોને ધ્યાનમાં રાખીને રાજસ્થાન સરકાર દ્વારા નવી ગાઈડલાઈન જાહેર કરવામાં આવી છે.
30 જાન્યુઆરી સુધી શાળાઓ બંધ
નવી ગાઈડલાઈન પ્રમાણે રાજસ્થાનમાં હવેથી વિકેન્ડ કર્ફ્યું લાગૂ કરવામાં આવ્યો છે. સાથેજ સ્કૂલો પણ 30 જાન્યુઆરી સુધી બંધ કરવામાં આવી છે. લગ્ન પહેલા 100 લોકોની હાજરી હતી જેના બદલે હવે લગ્ન પ્રસંગમાં 50 લોકોની હાજરી કરી દેવામાં આવી છે. જો કોઈ વિવાહ સ્થળ પર પ્રોટોકોલનું ઉલ્લંઘન જોવા મળશે તો તે સ્થળને 7 દિવસ સુધી સિલ કરી દેવામાં આવશે.
વિકેન્ડ કર્ફ્યું પણ લાગૂ કરાયો
ગૃહ વિભાગ દ્વારા રવિવારે સાંજે ગાઈડલાઈન જાહેર કરવામાં આવી જેમા પ્રતિબંધો વધારી દેવામાં આવ્યા છે. જેમા શનિવારે રાતે 11 વાગ્યાથી લઈને સોમવારે સવારે 5 વાગ્યા સુધી નાઈટ કર્ફયું જાહેર કરવામાં આવ્યો છે. વધુંમાં શાળાઓમાં પણ 30 જાન્યુઆરી સુધી ફરી ઓનલાઈન શિક્ષણના આદેશ આપી દેવામાં આવ્યા છે.
સૌથી વધારે કેસ મહારાષ્ટ્રમાં
ઉલ્લેખનીય છે કે કોરોનાના વધતા કેસ હવે એક ચિંતાનો વિષય બન્યો છે. જેમા ખાસ કરીને ઓમિક્રોન વેરિએંટને લઈને હવે લોકોમાં ભયનો માહોલ ફેલાયો છે. મહારાષ્ટ્ર સરકાર દ્વારા અત્યાર સુધીમાં સૌથી વધારે પ્રતિબંધો લગાવામાં આવ્યા છે. તે સિવાય તમિલનાડુમાં પણ પ્રતિબંધો વધારવામાં આવ્યા છે. ત્યારે વધુમાં ફરી રાજસ્થાન સરકાર દ્વારા વિકેન્ડ કર્ફ્યું સહિતના પ્રતિબંધો લાદી દેવામાં આવ્યા છે.