ટેકનોલોજી / સેમસંગ, શાઓમી અને LG મોબાઈલ ધારકો માટે માઠા સમાચાર, ગૂગલની ચેતવણીથી મચ્યો ખળભળાટ

• સેમસંગ, શાઓમી અને એલજી મોબાઈલમાં સામે આવી મોટી ખામી
• હેકર્સ મહત્વનો ડેટા ચોરી શકે છે
• ગૂગલે આપી લોકોને ચેતવણી
• સોફ્ટવેર અપડેટ કરાવી લેવાની આપી સલાહ 

સેમસંગ, શાઓમી અને એલજી ફોનનો ઉપયોગ કરનાર લોકો માટે માઠા સમાચાર આવ્યાં છે. આ ત્રણ પ્રકારના મોબાઈલમાં એક મોટી ખામી સામે આવી છે. 
ગૂગલે એક મોટી ચેતવણી આપતાં જણાવ્યું છે કે સેમસંગ, શાઓમી અને એલજીના મોબાઈલ ફોનમાં એક મોટી ખામી સામે આવી છે જેનો ઉપયોગ હેકર્સ આવા ફોનમાંથી સંવેદનશીલ માહિતી ચોરી શકે છે અને યૂઝર્સને નુકશાન પહોંચાડી શકે છે. ગૂગલની એન્ડ્રોઇડ પાર્ટનર સિક્યોરિટી ઇનિશિયેટિવે અહેવાલ આપ્યો છે કે સેમસંગ અને એલજી જેવી કંપનીઓના સ્માર્ટફોનમાં ખામીને કારણે લાખો યુઝર્સ પ્રભાવિત થયા છે. એન્ડ્રોઈડ ઓઈએમ (ઓરિજિનલ ઇક્વિપમેન્ટ મેન્યુફેક્ચરર્સ) દ્વારા ઉપયોગમાં લેવાતી સાઈનિંગ કી લીક થઈ ગઈ છે, જેની મદદથી માલવેર અથવા ખતરનાક એપ્સ પોતાને 'વિશ્વસનીય' એપ્સ તરીકે ડિવાઈસમાં ટ્રાન્સમિટ કરી શકે છે.

પ્લેટફોર્મ સર્ટિફિકેટનો ઉપયોગ કરાઈ રહ્યો છે 
ગૂગલમાં કામ કરતા ગૂગલના કર્મચારી ઝુકાઝ સીવાયરસ્કીએ મોબાઈલમાં આવેલી ખામી અંગે પોતાના ટ્વીટમાં જણાવ્યું હતું કે એન્ડ્રોઇડ ફોનમાં માલવેર એપ્સ પહોંચાડવા માટે પ્લેટફોર્મ સર્ટિફિકેટનો ઉપયોગ કેવી રીતે કરવામાં આવી રહ્યો છે. આ સર્ટિફિકેટના કારણે સિસ્ટમ રિયલ એપ અને માલવેરવાળી એપ વચ્ચેનો ભેદ પારખી શકતી નથી અને નકલી એપ ડિવાઈસ સુધી પહોંચીને યુઝરને સરળતાથી નુકસાન પહોંચાડી શકે છે. સામાન્ય રીતે થર્ડ પાર્ટી એપ કે એપીકે ઈન્સ્ટોલ કરતી વખતે યૂઝર્સને ચેતવણી આપવામાં આવે છે, પરંતુ લીક થયેલી પ્લેટફોર્મ કીના કારણે આ ચેતવણી નહીં મળે. થર્ડ પાર્ટી વેબસાઇટ કે સ્ટોર પરથી ડાઉનલોડ કરવામાં આવેલી એપ કોઇ પણ ચેતવણી વગર ઇન્સ્ટોલ કરવામાં આવશે કારણ કે તેનું સર્ટિફિકેટ સિસ્ટમ સાથે મેળ ખાય છે. અને તેને કારણે સેમસંગ, એલજી, મીડિયાટેક, શાઓમી અને રેવોવ્યુના ઉપકરણોને અસર થઈ શકે છે.

લેટેસ્ટ સોફ્ટવેર વર્ઝન અપડેટ કરાવે યૂઝર્સ 
ગૂગલની આવી મોટી ચેતવણી આવી હોવાથી હવે જેમની પાસે સેમસંગ, શાઓમી અને એલજીના મોબાઈલ હેન્ડસેટ હોય તેમણે સોફ્ટવેર અપડેટ કરાવી લેવું જોઈએ અને જો આવી ચેતવણીને અવગણના કરવામાં આવે તો યૂઝર્સને મોટું નુકશાન થઈ શકે છે. ગૂગલે કહ્યું છે કે આ ખામી સૌથી પહેલા મે મહિનામાં સામે આવી હતી, ત્યારબાદ સેમસંગ અને અન્ય કંપનીઓએ તેના જોખમને ઓછું કરવા માટે પગલાં ભર્યા છે. વપરાશકર્તાઓને સલાહ આપવામાં આવી છે કે તેઓ તેમના સ્માર્ટફોનના સોફ્ટવેરને નવીનતમ સંસ્કરણમાં અપડેટ કરે. વળી, થર્ડ પાર્ટી સોર્સથી એપ્સ ડાઉનલોડ કરવાથી પણ હેકિંગ, જાસૂસી કે ડેટા લીક થઈ શકે છે.