ટેકનોલોજી / Google અને Amazon બાદ હવે Samsung લોન્ચ કરશે આર્ટિફિશિયલ ઇન્ટેલિજન્સથી સજજ્ ખાસ ડિવાઇસ ‘નિયોન’

અહેવાલો અનુસાર આ ડિવાઇસ સેમસંગની સ્ટાર લેબમાં તૈયાર કરવામાં આવ્યું છે.મુળ ગુજરાતી એવા પાલનપુરના ટેકનોક્રેટ પ્રણવ મિસ્ત્રી તેના પ્રેસિડન્ટ અને સીઇઓ છે. નિયોન ડિવાઇસ આવતા મહિને અમેરિકાના લાસવેગાસમાં યોજાનારી સીઈએસ 2020 ટેક ઇવેન્ટમાં રજૂ કરવામાં આવશે.

નિયોન ડિવાઇસમાં હિન્દી ભાષાનો પણ સપોર્ટ મળશે. સેમસંગે નિયોન ડિવાઇસ અંગે વધુ વિગતો જાહેર નથી કરી પણ ઘણાં સોશિયલ મીડિયા પ્લેટફોર્મ્સ પર તેનું ટિઝર મુકયું છે. સેમસંગે તેના વિશે અનેક ટવીટ કર્યા છે.જેમાં લખ્યું છે કે 'Have you ever met an 'ARTIFICIAL'? આ ઉપરાંત હિન્દીમાં લખ્યું છે કે આપ ઉનસે મિલે હે જો આર્ટિફિશિયલ હે.

સેમસંગે આ નવા ડિવાઇસની કિંમત,લોન્ચિંગ તેમજ અન્ય ફિચર અંગે જાણકારી આપી નથી. લીક થયેલા અહેવાલ મુજબ આ ડિવાઇસ 5 જી નેટવર્ક પર કામ કરશે. કહેવાય છે કે નિયોનમાં માણસની જેમ બોલવાની, ઓળખવાની અને વિચારવાની ક્ષમતા હશે.તે આપણી લાગણીઓને પણ સમજી શકશે અને તે પ્રમાણે પ્રતિભાવ પણ આપશે.ટેકનોલોજી સાથે સંકળાયેલા લોકો આ નવા ડિવાઇસ અંગે ખાસ્સા ઉત્સાહી અને રોમાંચિત છે. નિષ્ણાતોના જણાવ્યા પ્રમાણે હવે પછીનો જમાનો એઆઇ ટેકનોલોજીથી સજ્જ ડિવાઇસનો છે.નિયોન તે દિશામાં કદાચ એક મોટું કદમ સાબિત થશે.