ભારતીય ક્રિકેટના ઈતિહાસમાં એવા ક્રિકેટર થઇ ગયા જેમણે સમગ્ર વિશ્વમાં ભારતની ખ્યાતિ વધારી. ભારતના ધ વોલના નામથી પ્રખ્યાત રાહુલ દ્રવિડ પણ વિશ્વના ખ્યાતનામ ખેલાડીઓમાંથી એક છે. ત્યારે તેમનો દીકરો પણ તેમની જ રાહ પર ચાલી રહ્યા હોય ટેબુ લાગી રહ્યું છે. બે જ મહિનામાં બીજી વાર ડબલ સેન્ચુરી ફટકારી સમિત દ્રવિડે પોતાની શાનદાર બેટિંગ સ્કિલનો પરચો આપી ઈતિહાસ રચી દીધો છે.
સમિત દ્રવિડે ફટકારી ડબલ સેન્ચુરી
બેટિંગની સાથે સાથે બોલિંગ કરીને 2 વિકેટ પણ ઝડપી લીધી
રાહુલ દ્રવિડના ચાહકોએ કહ્યું તેમના જ દીકરા બનશે ક્રિકેટના બીજા 'ધ વોલ'
જયારે પણ ટીમ ઈન્ડિયા માટે સૌથી ભરોસેમંદ બેટ્સમેનનો ઉલ્લેખ કરવામાં આવે ત્યારે રાહુલ દ્રવિડનું નામ સૌથી પહેલાં આવે છે. ધ વોલના હુલામણા નામે પ્રખ્યાત રાહુલ દ્રવિડે સંન્યાસ લઇ લીધો છે પરંતુ તેમની યાદગાર બેટિંગને આજે પણ યાદ કરવામાં આવે છે. રાહુલ દ્રવિડ નેશનલ ક્રિકેટ એકેડેમી પણ સંભાળે છે. રાહુલ દ્રવિડ ભલે રીટાયર થઇ ગયા હોય પરંતુ તેમના દીકરા સમિત દ્રવિડ દેશના બીજા ધ વોલ બનવાની તૈયારી કરી રહ્યો હોય તેમ લાગી રહ્યું છે. 14 વર્ષના આ ક્રિકેટરે બે મહિનામાં જ બીજી વાર ડબલ સેન્ચુરી ફટકારી છે.
સમિત દ્રવિડે જુનિયર ક્રિકેટમાં પોતાની શાનદાર બેટિંગનું કૌશલ્ય દાખવ્યું છે. સમિતે માલ્યા અદિતિ ઇન્ટરનેશનલ સ્કૂલ તરફથી 33 બાઉન્ડ્રીમાં 204 રન બનાવ્યા છે. સમિત દ્રવિડ માત્ર બેટિંગમાં જ નહીં બોલિંગમાં પણ શાનદાર પ્રદર્શન કર્યું છે.સમિતે બોલિંગ કરીને બે ખેલાડીઓને પવેલિયન ભેગા કરી દીધા. શાનદાર પ્રદર્શનની મદદથી વિપક્ષી ટીમ 110 રનમાં ભોંય ભેગી થઇ ગઈ. આ પહેલો મોકો નથી જયારે સમિતે આ પ્રકારની બેટિંગ કરી હોય, ડિસેમ્બર 2019માં 256 બોલમાં સમિત દ્રવિડે 201 રન બનાવ્યા હતા.
સંન્યાસ લીધા બાદથી રાહુલ દ્રવિડ વ્યસ્ત ચાલી રહ્યા છે. પહેલા 2015માં અન્ડર 19 ટીમના હેડ કોચ બન્યાં. તેમના સારા પ્રદર્શનના લીધે તેમનો કાર્યકાળ વધારી દેવામાં આવ્યો. વર્ષ 2019માં દ્રવિડને નેશનલ ક્રિકેટ એકેડેમીનાં ડાયરેકટરની જવાબદારી સોંપવામાં આવી. તેઓ દિલ્હી કેપિટલ્સ ટીમના મેન્ટર પણ છે.