બોલિવૂડ અભિનેતા સલમાન ખાનની ફિલ્મ વીરગતિની હિરોઈન પૂજા ડડવાલ ગયા વર્ષે ટીબીની બીમારીને કારણે ચર્ચામાં હતી. ત્યારે હોસ્પિટલમાં દાખલ પૂજાની સલમાન ખાને આર્થિક સહાય કરી હતી. પૂજા આજે પણ સલમાન ખાનની આભારી છે અને તેને ભગવાન માને છે. પૂજા બોલિવૂડમાં કામ કરવા માગે છે. તેણે ઘણાં ફિલ્મ મેકર્સ પાસે જઈને કામ પણ માગ્યું, પરંતુ અત્યાર સુધી તેને કોઈ કામ મળ્યું નથી.
પૂજાને બોલિવૂડમાં કોઈ કામ નથી મળી રહ્યું
બોલિવૂડમાં કોઈ કામ ન મળવાને કારણે હવે પૂજા ગુજરાન ચલાવવા માટે ટિફિન સર્વિસ ચલાવવાનું કામ શરૂ કર્યું છે. એક એન્ટરટેનમેન્ટ પોર્ટલની સાથે વાતચીતમાં પૂજાએ આ અંગે જણાવ્યું હતું. પૂજાએ કહ્યું, હું ઈન્ડસ્ટ્રીમાં મારા મિત્રોને મળીને કામ માગી રહી છું. એ બધાંએ મને કામ આપવાનો વિશ્વાસ પણ અપાવ્યો છે, પણ હવે હું વધુ રાહ જોઈ શકીશ નહીં. વધુમાં તેણે કહ્યું, હું આર્થિક તંગીમાંથી ભલે પસાર થઈ રહી છું, પણ મારો આત્મવિશ્વાસ અડગ છે. જેથી હવે મેં ટિફિન સર્વિસનું કામ કરવાની શરૂઆત કરવાનો નિર્ણય લીધો છે. મારા મિત્ર અને ડાયરેક્ટર રાજેન્દ્ર સિંહે મને આ કામ શરૂ કરવાની સલાહ આપી હતી.
પૂજાના મિત્ર રાજેન્દ્ર સિંહે ટિફિન સર્વિસ શરૂ કરવાની સલાહ આપી
પૂજાના મિત્ર રાજેન્દ્ર સિંહે પૂજાને ટિફિન સર્વિસ શરૂ કરવા માટે જરૂરી સામાન અને જગ્યા પણ આપી છે. ટિફિન સર્વિસ શરૂ કરવાને કારણે પૂજાને રહેવા માટે જગ્યા પણ મળી ગઈ છે. તે ત્યાં જ કામ કરશે અને ત્યાં જ રહેશે. પૂજાને આશા છે કે તેને બોલિવૂડમાં કામ અવશ્ય મળશે.
કામ કરીને પોતાનું જીવન ચલાવવા માગે છે
ઉલ્લેખનીય છે કે, પૂજા વર્સોવા ગામની એક ચાલીમાં 5000ના ભાડામાં રહે છે. તેની પાસે ન તો ખાવા-પીવાની વ્યવસ્થા છે કે ન તો સરખા પહેરવા માટે કપડાં. હવે તે કોઈની મદદ નથી માંગી રહી પરંતુ કામ કરીને પોતાનું જીવન ચલાવવા માંગી રહી છે.
સલમાને ઈલાજ માટે લાખો રૂપિયા ખર્ચ કરી દીધાં
પોતાની બીમારીના દિવસો યાદ કરતા પૂજાની આંખમાં આંસુ આવી જાય છે. તે કહે છે જ્યારે મને ટીબીની બીમારીનો ખ્યાલ આવ્યો ત્યારે હું ગોવામાં એક કસીનોમાં રહેતી હતી. મારી સાથે કામ કરનારા લોકો મને કહેતા હતા કે દિવસેને દિવસે મારી તબિયત ખરાબ થઈ રહી છે. પરંતુ મારી પાસે પૈસા નહોતા, મારી બીમારીને કારણે પરિવાર મારાથી દૂર થઈ ગયો હતો અને પરિવાર તરફથી પણ કોઈ મદદ મળી રહી ન હતી. આ કારણથી ઈલાજ અને હોસ્પિટલથી હું દૂર રહી હતી. આગળ વાત કરતા પૂજા કહે છે કે મારું વજન 52 કિલોથી 26 કિલો થઈ ગયું હતું. રાજેન્દ્રજીએ શિવડીની ટીબી હોસ્પિટલમાં ભરતી કરાવી મારો ઈલાજ શરૂ કરાવ્યો હતો. પછી મેં સલમાન ખાન પાસેથી મદદ માગી. સલમાન ખાનની ટીમે લગભગ 6 મહિના સુધી હોસ્પિટલમાં મારું ધ્યાન રાખ્યું હતું. સલમાને મારા ઈલાજ માટે લાખો રૂપિયા ખર્ચ કરી દીધાં હતા.