કાર્યવાહી ક્યારે ? / સુરતમાં દૂધના પાઉચની જેમ વેચાઈ રહ્યો છે દારૂ, 24 જ કલાકમાં ચાર ઘટના આવી સામે

• સુરતના પાંડેસરા નાગસેન નગરનો વીડિયો વાયરલ
• દેશી દારૂનું વેચાણ થતું હોવાનો વીડિયો વાયરલ
• વીડિયોમાં એક શખ્સ દેશી દારૂ લઈ જતો દેખાયો

ગુજરાતમાં ધમધમતા દેશી દારૂના અડ્ડા પર તવાઇ ક્યારે ? ક્યારે ગુજરાતમાં દારૂબંધીનુ ખરા અર્થમાં થશે પાલન ? દારૂબંધી માત્ર કાગળો પર જ કેમ ? આ બધા સવાલો થવાનું એક માત્ર કારણ છે રાજ્યમાં બેફામ બન્યા છે બુટલેગરો, બેફામ બન્યા છે યુવાનો , નથી રહ્યો કોઇને કાયદાનો ડર.. રોજબરોજ દારૂની હેરાફેરી કે પાર્ટી થતી હોવાના અનેક સમાચારો સામે આવે છે પરંતુ કાર્યવાહીના નામે માત્ર ચેતવણી આપીને છૂટા કરી દેવાય છે. ત્યારે સુરતમાં વધુ એક વીડિયો સામે આવ્યો. 

દેશી દારૂનુ વેચાણ થતો વીડિયો વાયરલ

આ તરફ દેશી દારૂના નામે બોટાદમાં કેમિકલ કાંડ થઇ ગયો ત્યારે સુરતમાં દેશી દારૂ વેચાતો હોવાનું સામે આવ્યું છે. પાંડેસરાના નાગસેન નગરનો વીડિયો સામે આવ્યો છે જેમાં એક શખ્સ દેશી દારૂ લઇ જતો દેખાયો.  આશખ્સ દેશી દારૂનો થેલો ભરીને એક અવાવરુ જગ્યાએ જઇ રહ્યો છે અને ત્યાં લોકો આવીને તેની પાસેથી દારૂ લઇને પીતા જોવા મળી રહ્યા છે. 

સુરતમાં દેશી દારૂના અડ્ડાનો વીડિયો વાયરલ

સુરતના પાંડેસરામાં દેશી દારૂના અડ્ડાનો વીડિયો વાયરલ થયો હતો. દેશી દારૂનું ખુલ્લેઆમ વેચાણ થઇ રહ્યુ છે. લિંબાયત વિસ્તારમાં પણ દારૂ વેચાતો હોવાનો વીડિયો વાયરલ થયો હતો.  વળી 3 મહિના પહેલા પોલીસમાં આ મામલે અરજી થઇ હતી તેની પણ કોપી સામે આવી હતી.  પાંડેસરામાં દારૂના અડ્ડા ચાલતા હોવાની અરજી થઇ હતી તે વાતને 3 મહિના થયા છતાં સ્થિતિ એની એજ જોવા મળતા પોલીસની કામગીરી પર શંકાઓ ઉપજી હતી.

ખટોદરામાં દેશી દારૂના વેચાણનું સેન્ટર 

સુરતના ખટોદરા વિસ્તારમાં દેશી દારૂ વેચાતો હોવાનું સામે આવ્યું. મીડિયાના કેમેરા જોતા જ દારૂ વેચનારા શખ્સો ફરાર થઇ ગયા. દેશી દારૂનો જથ્થો મૂકીને ઘટનાસ્થળેથી થયા ફરાર થતા કેમેરામાં કેદ થયા હતા. 

ડીંડોલી વિસ્તારમાંથી ઝડપાયો દેશી દારૂ

બોટાદમાં કથિત લઠ્ઠાકાંડ બાદ સુરત પોલીસ જાગી હોય તેમ  સુરતમાં DCB દ્વારા દેશી દારૂના 12થી વધુ કેસો કરાયા.  ડિંડોલી વિસ્તારમાંથી 4.50 લાખનો વિદેશી દારૂ ઝડપાયો.  તાપી નદી કિનારે દેશી દારૂની ભઠ્ઠીઓ ચાલી રહી હતી.  જમીનમાં દાટેલા દેશી દારૂના પીપ મળી આવ્યા હતા. મહત્વનું છે કે સુરતમાં એક વિસ્તાર એવો નથી કે જ્યાં દેશી દારૂનું વેચાણ ન થતુ હોય ત્યારે આ મામલે પોલીસ દ્વારા કડક કાર્યવાહી કરવી અનિવાર્ય થઇ પડે છે.