જનતા રેડમાં મોટા પ્રમાણમાં દેશી દારૂનો જથ્થો જપ્ત, પોલીસે ફરાર બુટલેગર સામે ગુનો નોંધ્યો
સાબરકાંઠાના વડાલીમાં દેશી દારૂના અડ્ડા પર જનતા રેડ
વડાલી સિવિલ પાસે થતુ હતુ દેશી દારૂનુ વેચાણ
પોલીસ ઘટનાસ્થળે પહોંચતા બુટલેગર ફરાર
ગાંધીના ગુજરાતમાં માત્ર નામ પૂરતી દારૂબંધી છે. કારણ એક જ હપ્તા રાજમાં દારૂની હાટડીઓ સરેઆમ ધમધમી રહી છે. પોલીસ ફક્ત દરોડાના નામે નાટક કરી બુટલેગરોને છાવરી રહી હોય તેવુ લાગી રહ્યું છે. સાબરકાંઠાના વડાલીમા દેશ દારૂના અડ્ડા પર જનતા રેડ કરવામાં આવી છે. કોઇ નક્કર કામગીરી ન કરવામાં આવતા ગ્રામજનોએ વિડિયો ઉતારી જનતા રેડ કરી સોશિયલ મીડિયાનો સહારે વીડિયો વાયરલ કર્યો હતો. જો કે રહી રહીને જાગેલી પોલીસ જનતા રેડની સાથે દરોડા પાડવા પહોંચી ગઈ હતી પણ બુટલેગર ફરાર થઇ ગયો હતો.
વડાલી સિવિલ પાસે થતુ હતુ દેશી દારૂનુ વેચાણ
વીડિયોમાં સ્પષ્ટ જોઈ શકાય છે કે ઘરમાં તમામ જગ્યાએ દારૂની પોટલીઓ છે. આ દ્રશ્યો દારૂબંધીના દંભની વાતો કરતાં એ નેતાઓ માટે છે જે કહે છે કે ગુજરાતમાં દારૂ વેચાતો નથી અને પીવાતો નથી. વડાલી સિવિલ પાસે દેશી દારૂ વેચાણ પર જનતા આખરે જાગી છે અને રેડ કરી બુટલેગરના ધંધાનો પર્દાફાશ કર્યો છે. આવા તો ગુજરાતના કેટલાય ગામડાઓ હશે જ્યાં દારૂની હાટડીઓ હપતારાજમાં ફૂલીફાલી રહી છે અને યુવાનોને નશાના રવાડે ચડાવી રહી છે. હાલ તો પોલીસ ઘટનાસ્થળે પહોંચતા બુટલેગર ફરાર થઈ ગયો છે ગુનો નોંધી શોધખોળ હાથ ધરાઇ છે. પરંતુ મોટા પ્રમાણમાં દેશી દારૂનો જથ્થો જપ્ત થતાં અનેક સવાલો પણ ઊભા થઈ રહ્યા છે.
દેશી દારૂના વેચાણની કોણ આપી રહ્યું છે મંજૂરી?
મંજૂરી નથી આપી તો શા માટે ખુલ્લેઆમ વેચાય છે દારૂ?
બુટલેગરની હિંમત પાછળ કોનો છે હાથ?
દેશી દારૂની હાટડીઓ કેમ ધમધમી રહી છે ?
બુટલેગરો કોની રહેમ નજર હેઠળ બેફામ બન્યા છે ?
નશાની લતના કારણે યુવાનોના અકાળે મૃત્યુ માટે કોણ જવાબદાર ?