ફિલ્મ રિવ્યૂ / 'તાનાજી'માં જોવા મળશે સૈફ અને અજયની જબરદસ્ત ટક્કર, ફિલ્મનું એક્શન જીતી લેશે તમારું દિલ

ફિલ્મઃ તાનાજીઃ ધ અનસંગ વોરિયર

સ્ટાર કાસ્ટઃ અજય દેવગણ, સૈફ અલી ખાન, કાજોલ, શરદ કેલકર, નેહા શર્મા, પદ્માવતી રાવ, શશાંક શેંડેટ

ડિરેક્ટર: ઓમ રાઉત

ડ્યૂરેશન: 2 કલાક 15 મિનિટ

ફિલ્મ તાનાજી એ વીર યોદ્ધા તાનાજીની કહાની છે. જેમણે સ્વરાજ્યના સપનાને પૂરું કરવા માટે તેઓ પોતાની સમગ્ર તાકાત લગાવી દીધી હતી. 

કહાની

આ કહાની 4 ફેબ્રુઆરી 1670માં સિંહગઢના યુદ્ધની છે. જેને કોંઢાણાના નામથી પણ ઓળખવામાં આવતું હતું. આ યુદ્ધમાં તાનાજી (અજય દેવગણ) અને મરાઠા યોદ્ધાઓએ  છત્રપતિ શિવાજી મહારાજ (શરદ કેલકર) માટે ઔરંગઝેબ (લ્યુક કેની) અને તેના ખાસ માણસ ઉદયભાન રાઠોડ સામે યુદ્ધ લડ્યું હતું. ઔરંગઝેબ આખા ભારત પર કબજો કરવા માગે છે અને તેને રોકવા માટે શિવાજીના પરમમિત્ર અને સુબેદાર તનાજી તેને રોકવા માટે પોતાનો જીવ જોખમમાં મૂકી દે છે. હવે ઉદયભાન અને તાનાજી વચ્ચેના યુદ્ધનું શું પરિણામ આવશે, તે માટે તો તમારે ફિલ્મ જોવા જવું પડશે. 

એક્ટિંગ

તાનાજીના રોલમાં અજયની એક્ટિંગ કાબિલે તારીખ છે. એક ચાલાક અને નિષ્ઠાવાન યોદ્ધા જે દેશ અને શિવાજી મહારાજ માટે કંઈ પણ કરી શકે છે. આ રોલમાં અજય એકદમ ફિટ બેસે છે, પરંતુ આ રોલમાં તેને જોઈને બાજીરાવ સિંઘમની યાદ આવી જશે. આ ફિલ્મમાં કાજોલ સાવિત્રી બાઇની ભૂમિકામાં છે, જે તનાજીની પત્ની છે. કાજોલ અને અજય દેવગણની જોડીએ હમેશાંની જેમ રૂપેરી પરદે કમાલ કરી બતાવ્યું છે. કાજોલ જે પણ સીન આવે છે તેમાં તેની જોરદાર એક્ટિંગ જોવા મળે છે. 

સૈફે કરી કમાલ

જ્યારે સૈફ અલી ખાન પોતાની દમદાર એક્ટિંગથી  અજયને જબરદસ્ત ટક્કર આપી રહ્યો છે. સૈફની સામે તમારું ધ્યાન અન્ય કોઈ અભિનેતા તરફ નહીં જાય. ઉદયભાન રાઠોડના અત્યંત ઉગ્ર પાત્રમાંસૈફે પ્રાણ ફૂંકી દીધા છે. સૈફની નિર્દયતા અને તેની ભૂખ્યા વરૂ જેવી આંખો તેને અન્ય કલાકારો પર ભારે કરી દે છે. અજય અને સૈફ વચ્ચેની ટક્કર પણ જોવા જેવી છે. તેના ડાયલોગ્સથી લઈને ધૂની વ્યવહાર દરેક વસ્તુ પ્રશંસાપાત્ર છે. આમ સૈફ, કાજોલ અને અજય દેવગણ સિવાય ફિલ્મમાં શરદ કેલકરએ શિવાજી, લ્યૂક કેની અને ઔરંગઝેબ, પદ્માવતી રાવએ જીજાબાઈ, દેવદત્તા નાગેએ સૂર્યાજી માલુસરે, નેહા શર્માએ કમલના રોલમાં પ્રાણ ફૂંકી દીધા છે. સપોર્ટિંગ કાસ્ટે પણ પોતાનું કામ સારી રીતે કર્યું છે. 

ડિરેક્શન

આ ફિલ્મ ઓમ રાઉતે બનાવી છે. ફિલ્મનું ડિરેક્શન અને એડિટિંગ ખૂબ જ સારું છે. જોકે, ફર્સ્ટ હાફમાં ફિલ્મ સ્લો લાગશે. ફિલ્મમાં પ્રાણીઓનો વધુ ઉપયોગ કરવામાં આવ્યો નથી. સાથે જ પાત્રોને ઘોડસવારી અને લડાઈ કરતાં દેખાડવા માટેં વીએફએક્સનો ઉપયોગ કરાયો છે, જે અમુક જગ્યાએ અનરિયલ લાગે છે. 

એક્શન

ફિલ્મની સૌથી સારી વાત તેના એક્શન સીકવન્સ છે. યુદ્ધના મેદાનમાં ઉતરેલા મરાઠાઓ અને મુઘલો વચ્ચેનું યુદ્ધ જોવાલાયક છે. સેકન્ડ હાફમાં ફિલ્મ તમને પકડી રાખે છે. ફિલ્મમાં બતાવેલું યુદ્ધ તમારા મનમાં એક છાપ ઊભી કરે છે. આ સિવાય ફિલ્મનું સિનેમેટોગ્રાફી પણ સારું છે. ફિલ્મમાં ભવ્ય સેટ્સ અને વિઝ્યુઅલ ઈફેક્ટ સારી બતાવી છે. સાથે જ ફિલ્મનું મ્યુઝિક અને બેકગ્રાઉન્ડ સ્કોર બહુ સારું છે. 

ફિલ્મ જોવા કે નહીં

જો તમે એક પાવરપેક્ડ એક્શનથી ભરપૂર ફિલ્મ જોવાના શોખીન છો તો આ ફિલ્મ અચૂક એકવાર જોવા જવી જોઈએ. સૈફ અને અજયની એક્ટિંગ તમારું મન મોહી લેશે.