આક્ષેપ / ગુજરાતમાં પાણીની અછત નથી, પણ સિંચાઇનું પાણી સરકારે ઉદ્યોગોને આપ્યું : AAP મહામંત્રી સાગર રબારી

• સરકારે ખેડૂતો વિરુદ્ધ પાણી ચોરી માટેનું ષડયંત્ર ઘડ્યાના આરોપો 
• 9, 43,833 લાખ એકર ફૂટ પાણી ખેડૂતોને આપી શકાય 
• સરકારે સિંચાઇના ભાગનું પાણી ઉદ્યોગોને આપ્યું 

ગુજરાતમાં પાણી પ્રશ્ને આમ આદમી પાર્ટીના  મહામંત્રી સાગર રબારીએ સરકાર વિરુદ્ધ આકરા પ્રહારો કર્યા હતા. ગુજરાતમાં પાણીની અછત નહી પરંતુ ભાજપ સરકારની દાનત ખોટી હોવાના આરોપ સાથે સાગર રબારીએ કહ્યું હતું કે સરકારે વોટર ઈન્ફ્રાસ્ટ્રક્ચર કંપની બનાવીને સિંચાઇના ભાગનું પાણી ઉદ્યોગોને આપ્યુ છે અને આર.ટી.આઈ.ના કાયદામાંથી છટકવા માટે રાજ્ય સરકારે ખેડૂતો વિરુદ્ધ પાણી ચોરી માટેનું ષડયંત્ર ઘડ્યું હોવાના પણ આક્ષેપો લગાવ્યા હતા.હાલ નર્મદા ડેમમાં પાણીની સપાટી 120.68 મીટર હોવાનું પણ તેઓએ જણાવ્યું હતું. 

 નર્મદા ડેમમાં 10,87,166 એકર જમીનમાં પથરાઈ તેટલું પાણી ઉપલબ્ધ
આપના મહામંત્રી સાગર રબારીએ જણાવ્યું હતું કે નર્મદા ડેમમાં પાણીનો જીવંત જથ્થો 1341 મિલિયન ક્યુબિક મીટર છે. એટલે કે 10,87,166 એકર જેટલી જમીન ઉપર એક ફૂટ પાણી ભરી શકાય એટલું પાણી હાલ નર્મદા ડેમમાં છે. ઉલ્લેખનીય છે કે આખા વર્ષ માટે ગુજરાતને પીવા માટે ડેમમાંથી 0.86 મિલિયન એકર ફૂટ પાણી ફાળવાયું છે. હવે ચોમાસાને ગણતરીના મહિનાઓ બાકી રહ્યા છે ત્યારે આખા વર્ષના પીવાના પાણીને બાદ કરીએ તો પણ 2. 27.166 એકર ફૂટ પાણી ખેડૂતોને આપી શકાય તેવી સ્થિતિ છે. આ ઉપરાંત  8 લાખ 60 હજાર એકર ફૂટ પાણી 12 મહિના માટે જોઈએ અને 2 મહિનાનો જથ્થો અનામત રાખવો હોય તો પણ 71 હજાર 666 એકર ફૂટ પ્રમાણે 2 મહિના માટે ગુજરાતને પીવા માટે 1 લાખ 43 હજાર 333 એકર ફૂટ પાણી જોઈએ. હાલના ઉપલબ્ધ જથ્થામાંથી અનામત જથ્થાને બાદ કરવામાં આવે તો  9, 43,833 લાખ એકર ફૂટ પાણી ખેડૂતોને ઉનાળુ પાક માટે આપી શકાય તેવી સ્થિતિ છે. 

ખેડૂતો પાણીની માંગણી કરે તો સરકાર આરોપી ગણે છે 
વધુમાં સાગર રબારી દ્વારા કરવામાં આવેલ આક્ષેપ મુજબ સાણંદ, બનાસકાંઠા સહિત કોઈ પણ જિલ્લાના ખેડૂતો પાણીની માંગણી કરે તો સરકાર તેઓની ગેરકાયદે અટકાયત કરી કાયદાના પાઠ ભણાવે છે. વધુમાં ભાજપ સરકારે વોટર ઈન્ફ્રાસ્ટ્રક્ચર કંપની બનાવીને સિંચાઇના ભાગનું પાણી ઉદ્યોગોને આપવા કારસો રચ્યો હોવાની પણ ધગધગતી રાવ કરી છે અને  RTIના કાયદામાંથી છટકવા સરકારે પાણી ચોરીનું મોટું ષડ્યંત્ર રચ્યું હોવાનું પણ સાગર રબારી અંતમાં ઉમેર્યું હતું.